1 Timoti 4 - Yennu Gbounpaauŋ Mɔɔr

Faakdamm kpinkpannii labaar

¹ Tɔn, Yennu Seyeeŋ set wantit yeenin ni nan yoo nba waa poorpo na ki nisiab tan sa nyik Masia labaar nawa, ŋaan sak narinbiit nba sa kpannib na, ki bia wei Sintaanii wannu na.

² Binba want li kpinkpannii wannu na fa faak, ki bi dudukit ji ki mukisib li paaki.

³ Li nibooru want a jakunt nan pookɔɔnt ki ŋani, a ki jesiat bia ki ŋan nan dinu; ŋaan timm nba bann Masia barŋanii ki teenɔ yada na, ti mi nan Yennu din nan jebooru kura a niib-ii die, ki turɔ niipoouk li paak.

⁴ Bonsiar kur nba ki Yennu din nan na ŋan ki tee jeete; ti-i turɔ niipoouk li paak ki di, li ŋan nan dinu; ti daa yêen li siari,

⁵ kimaan Yennu yet a li kura ŋan; ki ta meiɔ ki teenɔ niipoouk li paak na, ŋanne bia te ki jeet maŋ yeen.

Yisa Masia toontunŋanɔ labaar

⁶ Li-i tee ki a jii kpaanii nba na tur Yisa Masiaweira na, a sii tee u toontunŋanɔe, ki sii dint a mɔŋ nan maan nba ki ti teen yada na nan wannŋanu nba ki a waa maŋ na.

⁷ Daa saak faak labaar kimaan li ki tee Yennu yari; li ki mɔk nyɔɔti; ŋaan tumii yentinu binbeŋ nan nunmɔnn.

⁸ Toona tumiiu nba pukii gbanant paŋ mɔk nyɔɔt waaminnee, ŋaan yentinu tumiiu nyɔɔte yab gar bonsiar kur. Kimaan li mɔk nyɔɔt ki turit tingbouŋ na ni mɔtana, nan Yendɔuŋ ni yoo nba baat na.

⁹ Linba na tee barmɔniie, ki li ŋan nan i gaarir.

¹⁰ Ti gbaae ki tuun nan nunmɔnn kimaan ti mɔk dindann Manfodaanɔ Yennu paak, kimaan u be ki tee sɔɔ kur Tinntɔɔ, ki sa tinn sɔɔ kur nba teenɔ yada.

¹¹ Wantib ki kpaamm linba na kura.

¹² Daa te ki sɔɔ-n sianna kimaan fa pɔ na paaki. A te ki a pinpauk nan a binbenŋaŋ, nan a loomm, nan a yada, nan a binbenyeeŋ-n wann Masiaweira nba bo sii be biaŋinba.

¹³ Jiin a yoo nan a yaak ki karin Yennu gbouŋ ki wannib li paak, kii mɔɔntir Masia barii mɔkmɔk nan yoo nba ki n tan sa baar.

¹⁴ Daa tammit Yennu Seyeeŋ piinii nba be a ni na po; ki Yennu din tura piinii maŋ kimaan sɔkiniinba din pak a po yoo nba ki yudamm din yii bi nii a paak.

¹⁵ I tuun linba na nan ninmɔnn, ki sɔɔ kur-n la a pukinu.

¹⁶ I mi a mɔŋ nan a wannu po. I dia wannu nba na, kimaan li-i tee ki a diar, a sa tinn a mɔŋ nan binba ki a wantib na.