1 Timoti 3 - Yennu Gbounpaauŋ Mɔɔr

Masiaweira yudamm labaar

¹ Barii nba na tee barmɔniie, ki jasɔɔ nba loon ki wun teen Masiaweira yudaanɔ, li tee toonŋanne ki u loon.

² Li ki ŋan ki Masiaweira yudaanɔ-ii mɔk bisiati. Li kpaa talase ki wuu mɔk poo yenɔkɔɔ, kii tee subindaanɔ, kii dia u mɔŋ fanu, kii gaan saamm u ŋaak ni kii chantirib, kii tee wunba sa fit wann niib Yennu maan,

³ ki daa nyu daan ki yibi, ki daa loon fuut nan kunkɔna, ŋaan kii be soonna nan parmaasir, ki daa loon likirii bonchianni.

⁴ Li kpaa talase ki u fit kii dia u mɔŋ ŋaak niib fanu, ki te ki u waas-n sak u mɔb kii mɔk nibaakir.

⁵ Ŋaadaanɔ-i kii mi wa sa dia u ŋaak niib biaŋinba, nlee ki u sa fit dia Yennu niibi?

⁶ Li kpaa talas ki wuu tee daanɔ nba poŋ waa Masia ki li yukira; nnee-i kaa, ki u tan sa mann kpet donn u mɔŋ nan karinbaanii ki la tubdatu kaman nan Sintaanii nba din tun biaŋinba ki la tubdatu na.

⁷ Li kpaa talas ki wuu tee daanɔ nba ki binba ki waa Masia na gbaa-n yet a u binbeŋ ŋan, ki u daa mi di fei ki Sintaanii baruk tan sa mann ki soorɔ.

Masiaweira sommteeb labaar

⁸ Li bia kpaa talas ki Masia niib sommteeb-ii munii mɔk binbenŋaŋ, ki daa mɔk mɔleemii. Li kpaa talas ki bi daa nyu daan bonchiann, ki bia daa tee binba di fobit bi liklommu ni.

⁹ Li kpaa talas ki bii dia yada barii nba ki Yennu fiit wannit na fanu, ki bi daa mɔk biiti.

¹⁰ Li kpaa talas ki bin bikimm sinsinn; bi-i kii mɔk biit bi bikinu maŋ ni, tɔn, bi sii fit tuun sommteeb toona.

¹¹ Li kpaa talas ki bi poob-ii munii mɔk binbenŋaŋ, ŋaan daa tee sanjanjanna. Li kpaa talas ki bii tee subindamm kii tuun bi toona kur fanu.

¹² Li kpaa talas ki Masiaweira sommtɔɔ-ii mɔk poo yenɔkɔɔ, ki bia fit dia u waas nan u ŋaak niib fanu.

¹³ Masiaweira sommteeb nba tuun bi toona fanu na sa la nibaakir Yisa Masiaweira boor ni, ki bia mɔk parcheenn ki bet niib ba teenɔ yada biaŋinba na po.

Barŋanii nba tee barjaann biaŋinba

¹⁴ Ma sɔbin gbouŋ nba teena na, ŋaan n mɔk dindann nan man baar mɔtana ki la-a,

¹⁵ ŋaan li-i yukir ki n ki baar, gbouŋ na sa te ki a bann ta sii be biaŋinba Yennu ŋaaniib sinsuuk ni, binba ki ŋɔɔ Manfodaanɔ Yennu gannib na. Ŋamme dia barŋanii nba tee barmɔnii na, ki bia set li paak.

¹⁶ Li tee barmɔniie nan Masia labaar nba ki Yennu fiit wannit na sumii bonchiann: U din dɔkit nan gbanante, Yennu Seyeeŋ wann nan u be fanu; ki malakanba din lau. Ki niib din mɔɔnt u labaar ki tur nibooru, ki bi teenɔ yada tingbouŋ na ni, ki Yennu din tan donnɔ sanpaapo ki u la dontir.