1 Timoti 1 - Yennu Gbounpaauŋ Mɔɔr

¹ Min Pɔɔl tee Yisa Masia toomii, kimaan ti Tinntɔɔ Yennu nan Yisa Masia binba tee ti dindann na turin yaak;

² mine sɔbin gbouŋ na ki teen fin Timoti, wunba tee n bimɔŋ, yada teenu nie. Ti Baa Yennu nan ti Yomdaanɔ Yisa Masia-n somma, ki bia tina ninbaauk, ki bia tura parmaasir.

Faak damm kpinkpannii labaar

³ I be Efesus kaman nan ma poŋ meia biaŋinba yoo nba ki n din be sɔnu ni ki saa Masedonia na. A kpaan nisiab nba want wannboorganu na ki bin nyik

⁴ ki daa fiin bi yejamm ni barkpera nan yaadindɔnfɔkit nba baat nan mɔniɔk. Ŋann ki mɔk sommir ki teen niib ki bi sa tumii Yennu sɔnu; yada paake te ki ti bannir.

⁵ Ŋaan n kpaanii maŋ paak tee a lin fiin loomm nan popeenn nan dudukŋant nan yada nan mɔnii.

⁶ Ki nisiab nyik linba nawa, ŋaan bot kɔɔ jat labafaanu ni.

⁷ Bi loon bii tee Yennu sennu wannteebe, ŋaan ki mi bi mɔŋ mɔŋ mɔbona paak, ki bia ki mi ba piak linba po maŋ paaki.

⁸ Ti mi nan sennu maŋ ŋan, li-i tee ki sɔɔ diar ki tuun kaman nan la want a tii tuun nann biaŋinba na.

⁹ I tian nan sennu ki see nifoŋamm paak kaa, ŋaan li see binba tee mɔyêtdamm na paake, nan binba ki tiin Yennu, nan biitdamm paak, nan jakint damm, nan binba ki teen Yennu nibaakir paak, nan binba kpi bi baanba nan bi naanba, nan nifokpiira,

¹⁰ nan bonchonchona paak, nan binba mɔk niauŋ ki dɔɔ nan bi jaleeb, nan binba jaan niib, nan binba tee faak damm, nan binba tee faak siara na, nan linba kur ki waa barmɔnii wannu paake;

¹¹ ki Masia barŋanii nba wann Yennu nba ŋan bonchiann biaŋinba na mun wann nnee; ki ŋɔɔ Yennu din teen barŋanii maŋ n nuu ni ki n mɔɔntirir.

Yennu ninbatinu labaar

¹² N teen ti Yomdaanɔ Yisa Masia wunba turin paŋ a man tun u toona niipoouk, kimaan ŋɔɔe yet a n jaŋ nan toona maŋ, ki te ki n tuun teenɔ,

¹³ ma lek din biir u sann ki mukis u niib, ki sukiiɔ na, ŋaan u bia gaarin u ninbatinu niwa, kimaan n din ki mie, ki bia ki teenɔ yada, ki tuun nna.

¹⁴ Ki ti Yomdaanɔ Yisa Masia din tan tinin ninbaauk nba yab ki kaa bikinu, ki te ki n teenɔ yada ki loonɔ.

¹⁵ Ki ŋɔɔ Yisa Masia din baar tingbouŋ na ni, a wun tan tinn biitdamme; labaar maŋ tee barmɔniie ki ŋan ki ti gaarir ki teenn yada; ki mine din bi ki gar biitdamm kura,

¹⁶ ŋaan ki u tin min nba din tee biitdamm yudaanɔ ninbaauk ki dii sukuru n paak, a lii tee siara ki wann binba tan sa teenɔ yada ki gaar manfoor nba kaa gbennu na.

¹⁷ Dont Yennu ki turɔ nibaakir yoo nba kaa gbennu. Ŋɔɔe tee kpanbar nba kan mi kpo ki sii be yoo nba kaa gbennu; ki sɔɔ ki laatɔ; ki u tee Yen-yemmir na. Mɔmɔmm.

¹⁸ N bik Timoti, n jikit kpaanii maŋ ki tee a nuu ni. Kpaanii maŋ tee kaman nan mɔbona nba ki sɔkiniinba din poŋ pak a po sianyoo nba gar na. Jiin barii maŋ ki teenn jatiat ki kɔn kunkɔnŋann,

¹⁹ ki teen barmɔnii wannu yada, kii tuun linba ki a mi nan li tee toonŋana. Nisiab ki sak nnee; li paak te ki bi yada biir gbenn.

²⁰ Bi siabe tee Haimeneus nan Aleksander, binba ki n daan jiib teemm Sintaanii nuu ni a wun mukisib. Linba nee sa wannib yan ki bin nyik Yennu sann biiru.