1 Tesalonika teeb 4 - Yennu Gbounpaauŋ Mɔɔr

Binbeŋ nba pent Yennu par labaar

¹ Ti naa waas, ya din tumii ti peŋ biaŋinba ki i sii tuun ki pent Yennu par ni na, nnee ki i poŋ din tuun. Mɔtana, ti barimiie ki kpaani ti Yomdaanɔ Yisa sann paak, yii ŋammit kii tuun nna man,

² kimaan i mi kpaanii nba ki ti din turi ti Yomdaanɔ Yisa sann ni na.

³ Kimaan Yennu loon ki yii tee popeendamm ki daa tuun bonchonchonn toona.

⁴ Sɔɔ kur-n bann wa sa kɔɔn poo nan binbenyeeŋ nan baakir sɔnu biaŋinba,

⁵ ki daa tuun nna nan nianbiiuk binbeŋ kaman nan binba ki mi Yennu nba be biaŋinba na.

⁶ Sɔɔ daa tuun biir u lɔɔ nba waa Masia nan li biitbooru ni, amii kii ŋmab u lɔɔ. Ti poŋ din beti li powa, ŋaan bia kpaani nan nunmɔnn a Yennu tan sa dat binba tuun nna tuba.

⁷ Yennu ki yiint a tii tee biitdamm kaa, ŋaan u yaa tii tee popeendamme.

⁸ Li paak, wunba ki sak wannu nba na, li ki tee nisaarik yar kaa ki u yêeni, ŋaan u yêen Yennu nba teeni u Seyeeŋ na mɔŋ mɔŋe.

⁹ Li ki kpaa talas ki tin sɔb gbouŋ ki tiari ya sii loon Masiaweira biaŋinba. Yennu mɔŋe poŋ wanni biaŋinba ki i sii loon i leeb.

¹⁰ Ki i poŋ set tuun li biaŋe na, ki loon ti naa waas kur nba be Masedonia tiŋ ni na. Ti naa waas, ti barimiie a yii ŋammit kii tuun nna man,

¹¹ ki ŋaan ki lii tee i dudukit ki yii be soonna, ki i baka-ii be i mɔŋ toona ni, kii tuun i tiauŋ toona kii di, kaman nan ta poŋ din beti biaŋinba sinsinn na.

¹² Ŋanne sa te ki binba ki tee Masiaweira na-n turi nibaakir, ki li ji kii kpaa talas ki yin jɔɔb i mɔŋ ki denn sɔɔ i bonlonkara paaki.

Ti Yomdaanɔ jenu labaar

¹³ Ti naa waas, ti loon ki yin bann barmɔniie ki jikit saa Masiaweira nba kpo na po, ki daa mɔk parbiir kaman nan binba ki mɔk dindann na.

¹⁴ Ti teen yada nan Yisa din kpo ŋaan bia fiir kuun niwa; li paak, ki ti bia teen yada nan Yennu tan sa te ki Yisa-n jen nan u weira nba din kpo na.

¹⁵ Ta wanti linba na tee ti Yomdaanɔ mɔmaame: ti Yomdaanɔ maŋ jenu daar, damm nba tan sii be bi manfoa ni na kan dɔŋ binba din kpo na ki chet Masia sanpaapo,

¹⁶ kimaan ti Yomdaanɔ tan sa nyi Yendɔuŋ ni ki sik nan tintian paari, nan malaka saakɔɔ yiiniie, nan Yennu kikaak mɔnii, ki Masiaweira nba din kpo na tan sa fiir sinsinn;

¹⁷ li yoo, damm nba tan sii be bi manfoa ni na nan ŋamm tan sa chet ti Yomdaanɔ sanpaapo; ki timm nan ti Yomdaanɔ ji tan sa taan leeb ki be nan yoo nba kaa gbennu.

¹⁸ Li paak, yii dia mɔmaan na kii maant i leeb para man.