1 Tesalonika teeb 3 - Yennu Gbounpaauŋ Mɔɔr

¹ Li paak, la ji daan tan paak ti nii yoonba, ti daan sak biar Atens doo nie ti kuukɔɔ,

² ŋaan daan tun ti naa bik Timoti, wunba ki timm nan ŋɔɔ taan tuun ki teen Yennu ki mɔɔntir Masia barŋanii, a wun chee i yada ki kɔɔnni para,

³ ki lin te ki i sɔɔ daa ŋmat poor muksuk na paaki. I mɔŋ mi nan li muksubooru tee Yennu loomme ki turit,

⁴ kimaan ta din daa be i boor ni yoonba na, ti din beti a bi tan sa mukisit; ki mɔtana i mɔŋ mi fanu nan li set tan baar tee nnee chib chib.

⁵ Li paak, la daan tan paak n nii yoonba, ki n daan tun Timoti, a wun saa bann a i nyik Masia sɔnu amii, ki laan Sintaanii bikini, ki ti toona fara kur teen yannee?

⁶ Mɔtana Timoti poŋ jenna, ki turit labaar nba penn ti para ni ki jikit saa i yada nan i loomm po. U betit a i kpan tun tian ti poe fanu, ki loon yin lat kaman nan ta loon tin lai biaŋinba na.

⁷ Ti naa waas, ti be fara nan parbiir kur ni, ŋaan ta gbat i yada po, li te ki ti para dɔɔre.

⁸ Mɔtana, li set maŋŋit nan ya set chib ti Yomdaanɔ sɔnu ni na paak.

⁹ Ti teen Yennu niipoouk bonchiann i paak, kimaan ta mɔk parpeenn biaŋinba u boor ni i paak na.

¹⁰ Nyiɔk nan yennu kur ti meiɔ nan ti para kura a wun te ki timm nan yimm-n la leeb ki tin ŋamm i yada.

¹¹ Ti Baa Yennu tiauŋ nan ti Yomdaanɔ Yisa-n ŋamm sɔnu turit ki ti baar i boor ni.

¹² Ya loon i leeb nan sɔɔ kur biaŋinba na, wun te ki i loomm maŋ-n pukin bonchiann kaman nan ta looni biaŋinba na.

¹³ Nnee ki u sa chee i para, ki i sii tee popeendamm nba ki mɔk biit ti Baa Yennu boor ni, nan yoo nba ki ti Yomdaanɔ Yisa tan sa jen nan u yab kura na.