1 Tesalonika teeb 2 - Yennu Gbounpaauŋ Mɔɔr

Pɔɔl toona Tesalonika doo ni labaar

¹ Ti naa waas, i mɔŋ mi nan ta din baar foonti na, li tan ki teen yanni.

² I mi nan ta lek daa din be Filipi doo ni, ki bi dinnit fara nan fei biaŋinba, ki see ti paak bonchiann na, ŋaan ta din baar i boor ni, ti din mɔk parcheenn nba nyi Yennu boor ni nan tin mɔɔnt barŋanii maŋ turi.

³ Kimaan ta din beeri linba na din ki tee linba din nyii faak nan dudukbiit ni, amii ti din ki kpanni kaa,

⁴ ŋaan ti mɔɔntir kaman nan Yennu nba loon tii mɔɔntir u maan biaŋinbae, kimaan u poŋ la ki ti jaŋ nan tin dia barŋanii maŋ. Li paak, ti ki mɔɔntir ki pent nisaarik par ni kaa, ŋaan ti pent Yennu nba bikii ti dudukit na par nie.

⁵ Kimaan i mɔŋ mi fanu nan Yennu tee ti siara daanɔ nan ti din ki baar i boor ni nan mɔmant kaa, amii maan nba dɔkin ti nianchiauŋ.

⁶ Ti din ki loon i sɔɔ-n pakiti, amii nisɔɔ.

⁷ Ta tee Masia toomiinba na, ti din mɔk paŋ nba ki ti din bo sa fit boi li powa, ŋaan ti din be i sinsuuk ni soonnae, ki din tee kaman nan biyɔɔrɔɔ nba yɔɔr waas biaŋinba na.

⁸ Ta din looni bonchiann na paak, ti din mɔɔntir Yennu barŋanii ki teeni; li kuukɔɔ kaa, ŋaan ti bia din jii ti mɔŋ mɔŋ manfoa ki likin saaŋmanii i paak, kimaan i mantik teen ti niloonkab ki li yabita.

⁹ Ti naa waas, setik nan barmɔniie, i mi ta din tuun di fara biaŋinba. Ta din be i boor ni ki mɔɔntir Yennu barŋanii maŋ ki teeni na, ti din tuun yennu ni nan nyiɔko, a ti daa teeni farsiari.

¹⁰ Yimm nan Yennue tee ti siaradamm ki jiin ta din be nani nan binbenyeeŋ nan yentinu, ki kaa biit biaŋinba na po.

¹¹ I mi biaŋinba ki ti din kpaani kaman nan waas baa nba tuu kpaamm biaŋinba na,

¹² ki maant i para, ki lek tun kpaani a yii be binbensiak nba sa gboo Yennu numm. Ŋɔɔe yiini a wun kɔɔni u tiauŋ naan ni nan yentchiauŋ.

¹³ Linba yaa paak bia te ki ti piak Yennu yoo kura na tee nnee: ta din baar nan Yennu maan i boor ni, i din gbatir ki gaarir; i din ki gaarir kaman nan nisaarik yar na kaa, ŋaan i din gaarir kaman nan li tee Yennu yare. Ki li set tee ŋanne, kimaan yimm nba teenɔ yada na, maan maŋ tuun i para ni.

¹⁴ Ti naa waas, li muksubooru nba baari na, li muksubooru mun din baar binba tee Yennu niib Yisa Masia paak na Judea tiŋ ni; yimm nan ŋamm dii muksuboor-yeŋkɔɔe. I mɔŋ mɔŋ niib nba mukisi biaŋinba na, li muksuboorue ki bi niib, Juu teeb, mun din mukisib.

¹⁵ Ŋamm Juu teebe din kpii ti Yomdaanɔ Yisa Masia nan Yennu sɔkiniinba, ki bia mukis timm na. Linba na paak, bi ki penn Yennu par ni, ki bia ki penn nirɔ kur par ni.

¹⁶ Bi yabii bi mɔŋ paak gbaa a bin gɔɔrit ki ti daa mɔɔntir Yennu barŋanii ki tur binba ki tee Juu teeb na a bin la tinnu. Linba nee want nan bi poŋ pukin bi toonbiit nba ki bi tuu tuune mɔkmɔk nan Yennu wutoor nba ji daan tan baar nan tubdatu bi paak.

Pɔɔl nba loon wun bia gɔn Tesalonika teeb biaŋinba

¹⁷ Ti naa waas, la jiit yoo waaminna ki ti ki be i boor ni na, ti tee nan kpeebii nee, ŋaan ti dudukit ŋanin be nani, ki ti lek bia yabii a ti baar lai nan ti ninbina,

¹⁸ kimaan yoo kur, min Pɔɔl lek loon ki n baar i boor nee, ŋaan ki Sintaanii gɔin sɔnu.

¹⁹ Ti Yomdaanɔ Yisa-i jen yoonba, yimme sii tee ti dindann nan ti nyɔɔt, ki i paake ki ti tan sa set u boor nan parpeenn nan yuugontir.

²⁰ Setik nan mɔnii, i paake ki ti mɔk sann nan parpeenn.