1 Tesalonika teeb 1 - Yennu Gbounpaauŋ Mɔɔr

¹ Min Pɔɔl nan Sailas nan Timotie sɔbin gbouŋ na ki teen niib nba be Tesalonika ki tee ti Baa Yennu nan ti Yomdaanɔ Yisa Masia nigannkab na; ŋɔɔ Yennu-n sommi, ki bia turi parmaasir.

Tesalonika teeb yada nan bi binbeŋ labaar

² Ti teen Yennu niipoouk i kura paak, ŋaan tian i po yoo kur ti Yenmiaru ni,

³ kimaan Yennu nba tee ti Baa na tɔɔnn po, ti tian biaŋinba ki i teenɔ yada ki tuun toonŋana, nan i loomm nba te ki i tuun nan nunmɔnn biaŋinba, ki i dindann be ti Yomdaanɔ Yisa Masia ni chib chib biaŋinba.

⁴ Ti naa waas, ti mi nan Yennue looni ki poŋ ganni a yii tee u yab,

⁵ kimaan barŋanii na din ki tee ti mɔb ni mɔmaan kuukɔɔ kaa ki ti din baar nann turiini, ŋaan li bia din mɔk Seyeeŋ yikooe ki ti piakir ki birsuk kaa. Yoo nba ki ti din be i peŋ na, i mi ta din be biaŋinba; i sommir paake ki ti din be nna maŋ.

⁶ I din tokii biaŋinba ki ti din waa ti Yomdaanɔ, ki din gaar barŋanii maŋ i farchiauŋ ni nan parpeenn nba nyi Seyeeŋ boor ni na.

⁷ Ki ya din tuun biaŋinba na din wann ti naa waas nba be Masedonia nan Akaya tinii ni na mun nba sii tuun biaŋinba na.

⁸ Kimaan ti Yomdaanɔ barŋanii maŋ din nyii i boore, ki lin Masedonia nan Akaya tinii ni, ki linba bia pukin, ya teen Yennu yada biaŋinba poŋ lin lokir kur powa. Li paak, li ji ki kpaa talas nan ki ti pak siar bi boori.

⁹ Niib na kur piak jiint ya din gaarit biaŋinba ta din foonti yoonba na, bi piak biaŋinba ki i tunn nyik pata ŋaan baar Yennu boore, a yii jiantir ŋɔɔ Yennu nba tee manfodaanɔ na,

¹⁰ ki guur u Bija Yisa, wunba tan sa nyi Yendɔuŋ ni ki baar na; wunba ki u din fiinɔ kuun ni, ki u fatit Yennu wutoor nba baat na ni na.