1 Piita 4 - Yennu Gbounpaauŋ Mɔɔr

Toonbiit nyiku labaar

¹ Masia nba din dii fara ti paak na, i mun chee i para kii dukii nna, kimaan wunba dii gbanant fara, u nyii toonbiit tumu niwa.

² La jii yoo na ki saa, i daa jikit i gbanant ki tuun nisaarik loonbiiti, ŋaan kii waa Yennu loomm.

³ Yoo nba gar, i din jii i yoo ki tuun toonbiit bonchiann; i din tuun i mɔŋ loonbiite, ki nyu daan ki yib, ki di diina ki mɔk fuut, ki tikii leeb danyuboa, ki mann pata, ki tuun kaman nan binba ki tee Masiaweira na nba loon bii tuun biaŋinba.

⁴ Ŋaan mɔtana, ya ji ki waab ki tuun li toonbiit na, li bakitibe, ki bi ji biir i sana.

⁵ Ŋaan bi tan sa bu bi mɔŋ buut ki tur Yennu nba teen siir ki sa bu footib nan kpeemm buut na.

⁶ Ŋanne teen ki bi din mɔɔnt Masia barŋanii ki tur binba kpo na gbaa; bi lek din kpo kaman nan sɔɔ kur nba kpenn biaŋinba nee; bi din mɔɔnt barŋanii maŋe ki turib a bin la yaak kii mɔk manfoa bi sei ni, Yennu paak.

Yan nba ki Yennu teeni na dianu labaar

⁷ Bont kura gbennu ji ki fɔk; li paak, yi soor i mɔŋ kii sub kii mei Yennu.

⁸ Linba gar bont kur tee a yii loon i leeb man fanu, kimaan loomm dɔkint biit bonchiann.

⁹ Yii gaar leeb saauŋ ki daa burimi.

¹⁰ Sɔɔ kur nan wa gaar yan nba nyii Yennu boore, i diar fanu ki jii yan maŋ ki somm i leeb.

¹¹ Wunba ki Yennu sennɔ a wuu mɔɔntir barŋanii na, wuu mɔɔntir linba ki Yennu teenɔ nee; wunba mun ki Yennu sennɔ a wuu sommit leeb, wuu sommitib nan u paŋ nba ki Yennu teenɔ na, ki Yennu-n la paku bonsiar kur ni Yisa Masia paak; ŋɔɔ Yennu yen paku nan paŋ kur yoo nba kaa gbennu. Mɔmɔmm.

Masiaweiu paak fara dinu labaar

¹² N naa walonkai, ya di fargbeŋŋa nba bikii-i na, i daa te ki li bakitiri ki li tee barsaann i boori.

¹³ Ya di fara Masia paak na, yii mɔk parpeenn man, ki yoo nba ki u tan sa nyi paanu nan yentsaakar ni, i sa la parpeenn bonchiann.

¹⁴ Bi-i sukii-i Masia sann paak, parpeenn tee i yare, kimaan Yennu Seyeeŋ nba mɔk paŋ bonchiann be i ni.

¹⁵ Ŋaan sɔɔ fardinu-i be nikpinu amii nanyuk amii toonbiit tumu amii kpikpiruk toona paak, li ki ŋani;

¹⁶ ŋaan fi-i di fara fa tee Masiaweirɔ na paak, a daa tiin fei, ŋaan dont Yennu, Masia sann paak.

¹⁷ Yoo baara ki Yennu sa piin ki bu niib buut; ki u sa bu u tiauŋ niib buute sinsinn; ki li-i tee ki u bu timm nba tee u niib na buut sinsinn, ki binba ki sak u barŋanii na sa joont nlee?

¹⁸ Li sɔb Yennu gbouŋ ni a “Li-i paar ki niŋamm-n tinn, ki biitdamm nan binba ki tiin Yennu ji sa teen nlee ki tinni?”

¹⁹ Li paak, binba di fara Yennu loomm paak na, bii tuun toonŋana, ki jii bi mɔŋ ki pet tur bi nantɔɔ Yennu nba tee barmɔnii daanɔ na.