1 Piita 3 - Yennu Gbounpaauŋ Mɔɔr

Poob nan bi sɔrib benu

¹ Poob, sakin man i sɔrib mɔi, ki bi siab-i kii teen barŋanii na yada, ŋaan li pasiar bi poob binbenŋaŋ na paak, bi sa teen yadawa, li ki kpaa poo talas nan wun yet siar gbaa,

² kimaan bi-i la bi poob nba teen Yisa yada na binbeŋ ki li ŋan, bi mun sa teenɔ yadawa.

³ Poob, daa jikit i mɔŋ ki want i mɔŋ fant nan yuloru, amii sarima tuliiat, amii chinchenŋana gbabu.

⁴ Ŋaant man ki i fant-ii tee soonna nan ŋminŋminn i para ni; ŋanne tee fant nba kan biiri, ki bia ŋan bonchiann Yennu boor ni.

⁵ Yaayoo ni pooŋamm nba din teen Yennu yada na, nnee ki bi din faŋŋit bi mɔŋ, ki din saak bi sɔrib mɔi.

⁶ Nnee ki Sara din sak u sɔrɔ Abraham mɔb ki din yiu u yomdaanɔ. Li-i tee ki i tuun ki li ŋan, kii ki tiin siari, ŋann i tee Sara maŋ bonpoie.

⁷ Poosɔrib, i mun-ii be fanu man nan i poob, kii mi nan bi tee tariie i boor, kii teemm nibaakir, kimaan yimm nan ŋamm kur tan sa gaar Yennu piinŋann nba tee manfoor; ŋanne bia sa te ki Yennu sa gaar i miaru.

Masiaweira binbeŋ labaar

⁸ Linba biar na tee nnee; i kur-ii mɔk man dudukyenn, ki i baka-ii be i leeb ni, kii mɔk loomm nan Masiaweira, kii tiin i leeb ninbaauk, kii sikint i mɔŋ.

⁹ I daa tuun biit ki jiint biit paaki, i bia daa sukii ki jiint wunba sukiini, ŋaan kii jiinɔ a “Yennu-n senn mɔsonŋann a paak,” kimaan Yennu din yiini a yin gaar u mɔsonŋanne.

¹⁰ Kimaan li sɔb Yennu gbouŋ ni a “Wunba loon parpeenn manfoor, ki loon wun tan la daa nba ŋan, wun nyinn u mɔŋ barbiit nan faak maan ni,

¹¹ ki nyik bonbiir tumu, ŋaan kii tuun toonŋana, ŋaan lon parmaasir sɔnu kii waa-r,

¹² kimaan ti Yomdaanɔ kpaa u ninbina niŋamm paake, ki bia gbia bi miaru yoo kura; ŋaan kɔn nan toonbiit damm.”

¹³ I numm-i mɔn nan toonŋana tumu, sɔɔ be ki sa teeni siarii?

¹⁴ Ŋaan li-i lekii tee ki i la tubdatu i toonŋana paak, parpeenn sii tee i yare; i daa tiin nisaarik, i bia daa te ki li daamiini.

¹⁵ Tinin ti Yomdaanɔ Masia i para ni; yoo kur, i teen siir ki jiin wunba boi-i ya mɔk dindann biaŋinba na po.

¹⁶ Yi gatɔ soonna kii tiin Yennu, ki ŋaan ki i benu-ii ŋan, ki bi-i sukii-i ya tuun toonŋana Masia paak na, bi sa di fei bi sukit maŋ ni.

¹⁷ Li-i tee Yennu loomm nan i di fara toonŋana paak, li chee nan i di fara toonbiit paak;

¹⁸ kimaan Masia din gaar biitdamm kur paak ki kpo yomkɔɔe; niŋanɔ maŋe din gaar biitdamm paak ki kpo, a wun te tin saan Yennu boor. Bi din kpiu, ŋaan ki u bia din fiir kuun ni Yennu Seyeeŋ paak.

¹⁹ Li Seyeeŋ nie ki u din saan sei nba kɔɔ sarik kpeentiŋ na boor, ki saa mɔɔnt Yennu maan ki turib;

²⁰ ŋamm din tee niib nba din ki sak Yennu mɔb yoo nba ki u din dii sukuru Nowa yoo na, yoo nba ki ŋɔɔ Nowa din ŋamm ŋarungbeŋŋir; ki niib banniin kuukɔɔ din kɔɔ ŋaruŋ maŋ ni ki tinn nyun ni na.

²¹ Nyun maŋ tee Yennu nyunwuru ninnauŋ nba tinnit mɔtana nee; li ki tee ti gbanant paak wuru, ŋaan li tee ti mei Yennu a wun wuur ti para ni Yisa Masia kuun fiiru na paake.

²² U saan Yendɔuŋ nie ki be Yennu nuudiitu po, ki malakanba nan yentdamm kur saak u mɔb.