1 Korint teeb 9 - Yennu Gbounpaauŋ Mɔɔr

Toomiinba binbeŋ labaar

¹ N ki yen n mɔŋii? N ki tee Masia toomii kaa-aa? N ki la ti Yomdaanɔ Yisa-aa? N toona nba ki n tuun ki teen ti Yomdaanɔ na paak kaa ki i mun tee mɔsakdammii?

² Siab-i kii sak a n tee Masia toomii, ŋaan yimm ŋanin, li kpaa talas yin sak, kimaan ya tee mɔsakdamm na, ŋanne sa wann nan n set tee toomiie.

³ Niib-i piak ki biir n sann, n sa jii nnee ki nyi leŋ.

⁴ Ti ki mɔk yaak nba ki ti sii di ki nyu-uu?

⁵ Ti bia ki mɔk yaak nba ki sa jii poo kii lin nanɔ kaman nan toomiinba siab nan ti Yomdaanɔ naa waas nan Piita nba tee biaŋinba na-aa?

⁶ I dukii a min nan Banabas kuukɔɔe ki mɔk yaak nba sa nyik ti toona tumu ŋaan ki yii dintitii?

⁷ Lanjima lannɔe tuun toonn ŋaan pa u mɔŋi? ki ŋmee sii wuu tiinii ŋaan kan di li lɔɔna? amii ŋmee sii kpaar bonkobit ŋaan kan nyu li biimi?

⁸ N jii nifosaarik binbeŋe ki yet nna; ŋaan Moses sennu na ki yet ŋann biakii?

⁹ Li sɔb Moses sennu na ni a “Naab-i ŋmaan dii ki pinii dibin, fa daa bobint u mɔbi.” Yennu baka be nei kuukɔɔ niee?

¹⁰ amii u ki mantik yeen timm kaa-aa? Mɔmɔmm, li sɔb ki teen timme. Wunba ko nan wunba jaan tun nnee ki mɔk dindann ki bi tan sa chent dii maŋ.

¹¹ Ti din turi Yennu Seyeeŋ yare; ki li bo ki jaŋ nan i turit gbanant yarii?

¹² Siab-i mɔk yaak ki sa gaar bona i boor, ki timm ŋanin ki mɔk li yaakii? Ŋaan ti ki jii yaak na ki tun nan toonni, ŋaan ti di fara bonsiar kur ni, kimaan ti ki loon ki tin te ki Masia barŋanii na-n jir poori.

¹³ I poŋ mi nan binba tuun Yennu jiantu ŋasaakak ni na, bi jeet nyi bi toonn maŋ nie; ki binba mann mannu ki teen Yennu ki ŋammii binbintir na mun gaan bi yar leŋe.

¹⁴ Nnee mun ki Yennu tur mɔb a binba mɔɔntir u barŋanii, bi jeet mun sii nyi leŋe.

¹⁵ Ŋaan n ki jii yaak na ki tun nan toonni, ki bia ki sɔbin na a i turin siari. Mi-i kpo, li sɔ nan sɔɔ-n te ki n parbifaant-ii tee yann.

¹⁶ Li ki tee a n mɔk parbifaanu barŋanii nba ki n mɔɔntir na paak kaa, kimaan li kpaa talas ki n mɔɔntir. Mi-i kii mɔn barŋanii na, parbiir sii tee n yare.

¹⁷ Mi-i bo-i gann toonn maŋ n tiauŋue, n bo sa la nyɔɔt, ŋaan min-i kaa gann n mɔŋi, li tee Yennue guunin toonn maŋ.

¹⁸ Lanne tee n nyɔɔti? N nyɔɔt tee ma mɔɔntir barŋanii na yann, ki ki jii yaak nba ki n mɔkir barŋanii toona ni na ki gaan siari.

¹⁹ N ki tee sɔɔ daabir, ŋaan n jii n mɔŋ ki kpant daabir ki tur sɔɔ kur a n te ki niib bonchiann-n baar Yisa Masia boor.

²⁰ Juu teeb boor ni, n jii n mɔŋ ki teen kaman nan ŋamm nee a n te bin tinn. Binba mun waa Moses sennu na, n jii n mɔŋ ki teen kaman nan bi yenɔ na, ŋaan n mɔŋ ki be sennu na ni, ki loon ki binba waa sennu na-n tinn.

²¹ Binba ki waa sennu na, ki n jii n mɔŋ ki teen kaman nan bi yenɔ na, a bin tinn. Na ki wann nan n ki waa Yennu sennu na; n waa Masia sennu na.

²² Binba yada waar na ki n kpint ki teen kaman nan bi yenɔ na a bin tinn. N lebit n mɔŋ bonsiar kur ni ki tur niib kur ki loon bi siab-n tinn.

²³ Barŋanii na paake ki n tee linba na kur a n tan la li nyɔɔt.

²⁴ Li-i tee nantaar, nantatinna kur tuu tiine, ŋaan yenɔkɔɔe tuu tan di ki gaar piinii. Li paak, yabit ki tin di ki gaar piinii maŋ.

²⁵ Nantatinna kur so bi mɔŋe bont kur ni a bin gaar piinii nba ki wa nan lin gbenni; ŋaan timm so ti mɔŋ a ti tan gaar piinii nba kaa gbennu.

²⁶ Ŋannii teen ki n tiin a n sa baar li paak; ŋannii teen ki n ki gbaa yanni.

²⁷ N ki loon min nba mɔɔntir barŋanii na ki teen niib na-n tan kɔŋ piinii na. Ŋannii teen ki n mukis n gbanant ki u saakin.