1 Korint teeb 8 - Yennu Gbounpaauŋ Mɔɔr

Patmannu nant dinu labaar

¹ Tɔn, ki jikit saa patmannu nant po, ti mi nan ti kur mɔk bannu, ki li set tee mɔnii. Bannu te ki nirɔ dont u mɔŋ, ŋaan loomm ŋanin sommit nirɔe Masia waanu ni.

² Wunba dukii nan u mi siar, li daanɔ daa ki mi nan wa bo sii mi na.

³ Daanɔ nba loon Yennu, ŋɔɔe ki Yennu miu.

⁴ Tɔn, ki jikit saa nant nba ki bi jii mann pata na; ti mi nan patir tee bont nba ki fo, ki bia mi nan Yen-yenɔkɔɔe be.

⁵ Pata-i lekii ji be gbaa, ki be sanpaapo amii tingbouŋ nna, kimaan pata bonchiann nan yomdamm nba ki niib jiantir na bonchiann be,

⁶ ŋaan timm yaa boor ni ŋanin, Yen-yenɔkɔɔe be; ŋɔɔe tee ti Baa Yennu nba din nan bonsiar kur, ki u nie ki ti fo; ki Yomdaan-yenɔkɔɔe be, wunba tee Yisa Masia. U paake ki bonsiar kur nan; u paake biak ki ti fo.

⁷ Sɔɔ kur kaa mɔk li yami. Siab mantik maan patmannu nant dinu ki yukir, li paak, bi-i dii li jeboorik, bi bia tuu daa dukiie nan nant maŋ set tee patir nante. Bi dudukit ki paari, ki bi dukii a li mɔk biit.

⁸ Ŋaan nant kaa sa te ki ti ki fɔk nan Yennu; kimaan ti-i dii, li ki pukint siari; ti-i biakii kii dii, li bia ki jiintit poori.

⁹ I mi man, li pasiar yin tan jii i yaak na ki lin kpant baruk ki tur niib nba yada waar na ni.

¹⁰ Ki wunba yada waar-i la yimm nba mɔk bannu na ki i be pochianfeek ni ki di, li sa te ki ŋɔɔ mun-n di nant nba tee pata yare.

¹¹ Fin nba tee banntɔɔ na, a bannu na sa biir a naa bik nba yada ki paar na, wunba ki Masia din gaar u paak ki kpo na.

¹² Fi-i tee nna ki tuun biit ki teen a naa waas, ki biir bi dudukit nba ki chee na, li want nan a tuun biit ki teen Masiae.

¹³ Li-i tee jeet nba ki n di na paakiie te ki n baant n naa biki, ŋann n ji kan ŋman nant nba sa te ki wun baa.