1 Korint teeb 7 - Yennu Gbounpaauŋ Mɔɔr

Pookɔɔnt buboit labaar

¹ N yaa n jiin i buboit nba ki i daan sɔb turin nee. Li ki ŋan ki jɔɔ-n kpian poo;

² ŋaan bonchonchonsin paak, li ŋan ki jɔɔ kur-ii mɔk u mɔŋ poo, ki poo kur-ii munii mɔk u mɔŋ sɔrɔ.

³ Li ŋan ki jɔɔ-n jii u mɔŋ ki chab u poo, ki poo mun-n jii u mɔŋ ki chab u sɔrɔ.

⁴ Poo ki yen u mɔŋ gbananti, u sɔrɔe yen. Jɔɔ mun ki yen u mɔŋ gbananti, u pooe yen.

⁵ I daa yêen leeb i gbanant loomm nakira yoo nba ki i tan taan mɔyemmkɔɔ a yin miar Yennu; ki li poorpo ki yii bia taan nan leeb, ki Sintaanii daa fit ki bikinti ki nyanti ya kan fit soor i mɔŋ na paak.

⁶ Li tee maame ki n yet, ŋaan li ki tee sennu kaa.

⁷ N bo loon ki sɔɔ kur-ii be kaman nan ma be biaŋinba nee, ŋaan sɔɔ kur nan u piiniie ki li nyii Yennu boor jiak jiak.

⁸ N yeen na ki teen jakpaka nan pookarankaana nan pakɔi, a bi-i sa sak be bi kɔɔ kaman nan ma be biaŋinba na, li bo sii ŋan ki turib.

⁹ Ŋaan bi-i kii fit so bi mɔŋi, ŋann nna bin kɔɔn poob, ki poob mun-n kun jab; li sɔ nan ya sii mɔk li niauŋ ŋaan kan fit maakiri.

¹⁰ Binba mɔk jab, n sent sennue, li ki tee min kaa senti, ŋaan ti Yomdaanɔe sent, a poo daa mi nyikit u sɔrɔ.

¹¹ Ŋaan fi-i nyik a sɔrɔ, a ji daa kun jaganɔ, ŋaan kii tee pookarankaan; amii fan di sindant ki ŋmat a sɔrkperɔ na boor. Jɔɔ-ii munii mi wun yêt u ŋaapoo.

¹² Binba biar nee ki min yeen, ti Yomdaanɔ kaa yeti. Masiaweirɔ-i mɔk poo, ki poo na ki tee Masiaweirɔ, ŋaan ki li tee poo maŋ loommue a wuu be u boor ni, jɔɔ na daa lubinɔ.

¹³ Poo nba tee Masiaweirɔ mun-i mɔk sɔrɔ nba ki tee Masiaweirɔ, ŋaan ki li tee jɔɔ maŋ loommue a wuu diau, poo maŋ daa yaatir ŋaan nyikit u sɔrɔ na.

¹⁴ Jɔɔ nba ki tee Masiaweirɔ, ŋaan ki u ŋaapoo tee Masiaweirɔ na, poo maŋ paake teen ki jɔɔ na tan sii yeen; ki poo nba ki tee Masiaweirɔ na mun, ŋaan ki u sɔrɔ tee Masiaweirɔ, jɔɔ maŋ paake teen ki poo na tan sii yeen. Li-i bo-i kii tee nna, bi waas bo kii yeeni, ŋaan la tee nna na paak, bi waas maŋ mun tan sii yeene.

¹⁵ Ŋaan wunba ki tee Masiaweirɔ-i loon wun yêt u lɔɔ, fan ŋaanɔ wuu saa. Ŋann ŋanin sennu ji ki so bi sɔɔ. Yennue yiinit a tii be nan parmaasir.

¹⁶ Fin poo, a teen nlee bann nan a kan tinn a sɔrɔ? ki fin poodaanɔ, a teen nlee bann nan a kan tinn a poo?

I be binbeŋ nba ni ki Yennu senna

¹⁷ I be binbeŋ nba ni ki Yennu senna. Nnee ki n lin ki want Masiaweira.

¹⁸ Wunba dɔŋ pot u punn ŋaan tan teen Masiaweirɔ, ŋaant ki wun dian nna; wunba mun ki pot ŋaan teen Masiaweirɔ, wuu kii loon u ji daa porii u punni.

¹⁹ Wunba pot nan wunba ki pot, li kur tee yanne. Linba mantik tee barkpaann tee i dia Yennu sennu bonŋann.

²⁰ Sɔɔ kur-ii be binbeŋ nba ni ki u tuu beewa ŋaan tan teen Masiaweirɔ.

²¹ Li-i tee ki a din tee daabir yoo nba ki a teen Masiaweirɔ na, a daa te ki li daamiiani, ŋaan fi-i sa la yaak ki nyinn a mɔŋ daabsin ni, fan teen nna.

²² Wunba poŋ tuu tee daabir yoo nba ki u teen Masiaweirɔ na, u ji tee ti Yomdaanɔ yɔɔe; nnee mun, li-i tee ki a yen a mɔŋ yoo nba ki a teen Masiaweirɔ na, a ji tee Masia daabire.

²³ Yennu daaie; li paak, i daa tee niib daaba.

²⁴ N naa waas, i be nan Yennu man kaman nan ya tuu be binbeŋ nba ni yoo nba ki i teen Masiaweira na.

Jakpaka nan pookarankaana nan pakɔi labaar

²⁵ Mɔtana, n ji piak ki teen binba daa ki kɔɔn poob amii ki daa ki kun jab nee, ŋaan ti Yomdaanɔ ki chabin a n betib nna; ŋaan ti Yomdaanɔ ninbatinu paake ki n teen barmɔnii daanɔ.

²⁶ Mɔtana ninmɔnn na paak, n dukin nan li ŋan ki nirɔ-ii be biaŋinba ki u tuu be na.

²⁷ Li-i tee ki a mɔk poo, ŋann ŋanin a daa beerɔ. Li-i tee ki a ki kɔɔn poo, ŋann ŋanin a ji daa kɔɔnt poo.

²⁸ Fi-i dak poo jii a ki tun biiti; poo mun-i kun jɔɔ u ki tun biiti; ŋaan n loon ki n nyinni muksuk nba ki binba mɔk poob nan binba mɔk sɔrib sa la tingbouŋ na nie.

²⁹ N naa waas, n loon ki n wanni nan yoo na ki fɔk, li paak mɔtana li ŋan ki binba mɔk poob-ii be kaman nan bi ki kɔɔn poob na;

³⁰ ki binba mɔ, bii be kaman nan bi ki mɔ na; ki binba mɔk parpeenn, bii be kaman nan bi ki mɔk parpeenn na; ki binba kpentir, bii be kaman nan bi ki mɔk na;

³¹ ki binba di tingbouŋ na manu, li ŋan ki bii be kaman nan bi baka kaa leŋ na. Kimaan tingbouŋ na nba tee biaŋinba mɔtana, li sa gara.

³² N ki loon ki siar-n daamiini. Jakpakir ŋanin gorii wa sa teen biaŋinba ki tun ti Yomdaanɔ toonae ki te ki lin penn ti Yomdaanɔ par;

³³ ŋaan pookɔɔntɔɔ baka be tingbouŋ na bona nie, wa sa teen biaŋinba ki penn u ŋaapoo par.

³⁴ Li paak, u niauŋ bɔkit munnlee-e. Pookarankaan amii sapaamɔ baka mun be ti Yomdaanɔ toona nie nan wa sa teen biaŋinba ki u gbanant nan u seek-ii taŋŋii tee Yennu yar fanu; ŋaan wunba mɔk jɔɔ ŋanin gorii tingbouŋ na bona nan wa sa teen biaŋinba ki penn u sɔrɔ pare.

³⁵ N piak linba na i mɔŋ sommir paake, li ki tee a n yaa n bari baruk kaa, ŋaan n loon yii be fanu, ki jii i mɔŋ kur ki pet tur ti Yomdaanɔ.

³⁶ Jɔɔ-i mɔk sarkpeŋ ki u tan beer poo, ki jɔɔ na mɔk dudukit u po ki kan fit soor u mɔŋi, ŋaant ki wun tun biaŋinba ki u loon; li ŋan ki bin kɔɔn leeb. Li ki mɔk biit bi sinsuuk ni.

³⁷ Ŋaan wunba par chee, ki u mi nan siar kan daamɔ, ki u sa fit soor u mɔŋ niauŋ, ki dukin u par ni a u kan kɔɔnɔ, ŋann ŋan.

³⁸ Ŋaan wunba kɔɔn u sarkpeŋ, li ŋan; wunba mun ki kɔɔn u sarkpeŋ, u tun linba ŋan ki gar wunba kɔɔn nawa.

³⁹ Poo nba mɔk u sɔrɔ ki u daa be u manfoor ni, u ki yen u mɔŋi; ŋaan u sɔrɔ-i kpo, u ji mɔk yaak nba ki sa kun wunba ki u loon, ŋaan li ŋan ki u jɔɔ maŋ-ii tee Masiaweirɔ.

⁴⁰ Ŋaan min yaa boor ŋanin n dukin nan li-i tee ki wuu be ki ki kun jɔɔ, li sii manɔ ki gar nan wa bo sa kun jɔɔ; nnee ki n dukin, ŋaan n mun mi nan n mɔŋ mɔk Yennu Seyeeŋ.