1 Korint teeb 6 - Yennu Gbounpaauŋ Mɔɔr

Buut bunu labaar

¹ I yenɔ-i mɔk maan nan u lɔɔ nba waa Masia, ŋaan ki ki jiir ki saan nann Masiaweira boor ki bi saa ŋammir, ŋaan jiir ki saan nann binba ki waa Masia na buut bunu boor, li sii mɔk fei hei.

² I ki mi a Masiaweira tan sa bu tingbouŋ na teeb buutii? ki li-i tee ki i tan sa bu tingbouŋ na teeb buut, ŋann i kan fit ki bu barbisbis mɔtana?

³ I ki mi a ti tan sa bu malakanba buutii? Nlee ki i kan fit bu mɔtana binbeŋ na barii?

⁴ Li-i tee ki i mɔk maan, bee ki i jikitir ki saa nann binba ki tee Masiaweira na boori?

⁵ Na tee feie ki turi. Mɔniɔk-i baar yimm Masia niib sinsuuk ni, sɔɔ kaa i sinsuuk ni ki mɔk yan nba sa fit ŋamm maan maŋii?

⁶ Ŋaan ki i naawayemm saa nan bi leeb barbuurɔ wunba ki teen Masia yada na boor, ki u bu bi buut.

⁷ Ya lek mɔk barii nan i naa waas na gbaa, ŋaan li tee biite. A naa bik-i tun biira amii ki u ŋmaba, ki a kurint sikin, li ki sɔ-ɔɔ?

⁸ Ŋaan yimme tuun leeb biit ki jaan leeb, ki bia lek tee nna ki teen i leeb nba tee Masiaweira na.

⁹ I ki mi nan biitdamm tan kan kɔɔ Yennu naan ni-ii? I daa kpann i mɔŋ; binba tee joonbaarit amii bonchonchona amii patmannteeb amii jab nba mɔk niauŋ ki dɔɔ nan bi jaleeb

¹⁰ amii nanyukii amii nianchiauŋ damm amii danyuyuukpeena amii sanjanjanna amii fatiteeb, binba na kur nan yenɔkɔɔwa kan kɔɔ Yennu naan ni.

¹¹ I siab din tuu tee nnee; ŋaan ki Yennu wuur i biit na ki i ji tee u niib ki bia tee popeendamm u peŋ, ti Yomdaanɔ Yisa Masia nan Yennu Seyeeŋ na paak.

Jiim i gbanant kii tuun linba sii dont Yennu sann

¹² I siab yeen a “Bont kura ki kɔɔ.” Li tee mɔniie; ŋaan bont kur kaa ŋan ki turani. I yaa a bont kur ki kɔɔ, ki li set tee mɔniie, ŋaan min ŋanin kan sak ki bonsiar-n yentimi.

¹³ I siab yeen a “Jeet tee poor yare, ki poor mun tee jeet yar.” Mɔniie; ŋaan Yennu sa gɔɔr li ŋannlee na kur. Yennu ki nan ti gbanant a ti jiir kii chommi, ŋaan a ti jiir ki lii tee ti Yomdaanɔ yar. Ti Yomdaanɔe yen ti gbanant na.

¹⁴ Yennue din fiin ti Yomdaanɔ kuun ni, ki mun bia tan sa jii u paŋ ki fiint.

¹⁵ I ki mi nan i gbanant na gaa nan Masia gbanantee? Li paak, daa jikit gbanant nba gaa nan Masia gbanant na ki gaant nan poochonchonna.

¹⁶ Wunba jii u mɔŋ ki taan nan poochonchonn, ŋɔɔ nan li daanɔ ŋanin taan gbananyennkɔɔwa. Li sɔb Yennu gbouŋ ni a “Jɔɔ nan u poo sa taan ki tee gbananyennkɔɔe.”

¹⁷ Wunba taan u mɔŋ nan ti Yomdaanɔ, ti Yomdaanɔ nan li daanɔ taan ki tee seyennkɔɔe.

¹⁸ Yi nyinn i mɔŋ man bonchonchonsin ni. Toonbiit kur nba biar, li ki tuun gbanant ni; ŋaan wunba chomm ŋanin biir u mɔŋ gbanante.

¹⁹ I gbanant na tee Seyeeŋ nba ki i gaar Yennu boor na diiuko, ki u be i ni. I ki mi nnee-ee? I ki yen i mɔŋi, Yennue yeni;

²⁰ u daaie; li paak, yii jii i gbanant kii tuun linba sii dont u sann.