1 Korint teeb 5 - Yennu Gbounpaauŋ Mɔɔr

Bonchonchonsin nba din baar Masia niib sinsuuk ni na po

¹ Li set tee mɔniie ki bi yeen a bonchonchonsin be i sinsuuk ni, linba ki binba ki waa Yisa Masia na mɔŋ kan tumi. N gbat a sɔɔ be i sinsuuk ni ki dɔɔ nan u baa poo;

² ŋaan ki i mɔk dontinmɔŋ ki ki tiin fei li paaki. Li ki jaŋ nan i para-n biirii? Li ŋan ki yin nyinn li nibooru i sinsuuk ni.

³ Ma lek be banfɔkir nani na, ŋaan n dudukit be i ni, ki n poŋ dukin bu daanɔ maŋ buut ti Yomdaanɔ Yisa sann niwa, ki li tee kaman nan n lakin ki be nani nee.

⁴ Ti Yomdaanɔ Yisa sann paak, n seek nan yimm-i taŋŋi lakin, ti Yomdaanɔ Yisa paŋ ni,

⁵ jiin nirɔ nba tun toonbiit maŋ ki teenɔ Sintaanii nuu ni ki wun biir u gbanant, ki ti Yomdaanɔ baaru daar maŋ u seek tan sa la tinnu.

⁶ I dontinmɔŋ maŋ ki ŋani. I ki mi a datiŋ waaminnae te ki boroboro yon kur fuutir piirii?

⁷ Li paak, yi nyinn i binbenkper biit, kii tee nipaamm, kaman nan ya set tee niib nba nyik biit ni biaŋinba na, kimaan Masia nba tee ti marouŋ na gaar ti paak ki kpo.

⁸ Li paak, ta waa u sɔnu biaŋinba na, ŋaant ki tin nyik binbenkper na, ki nyinn dudukbiit nan biit kur na, kii ji kii tee u weira nan barmɔnii, ki biit-ii kaa ti ni.

⁹ N poŋ sɔb gbouŋ ki turi ki yet a i daa waa bonchonchona na.

¹⁰ Li ki tee a n yaa a i nyinn i mɔŋ nan tingbouŋ na bonchonchona, amii nianchiauŋ damm, amii nanyukii, amii patmann teeb kaa; li-i tee nna ŋanimi, see ki i nyii tingbouŋ na ni.

¹¹ N sɔb ki yeeni a i daa tɔk nan daanɔ nba yaa a ŋɔɔ waa Masiae ŋaan tuun bonchonchonn toona, amii ki mɔk nianchiauŋ, amii ki mann pata, amii ki mɔk sanjaauŋ, amii ki tee danyuyuukpeen, amii ki tee nanyukɔɔ na; a poŋ daa kaar nan li nirɔ ki di jeeti.

¹² Li ki tee n toonn kaa ki n sii bu binba ki waa Masia buut. Yennue sa bu bi buut; ŋaan i leeb nba tee Masiaweira nee ki i sii bu ŋamm buut.

¹³ Li poŋ sɔb Yennu gbouŋ ni a “I ber biitdaanɔ na ki nyinnɔ i sinsuuk ni.”