1 Korint teeb 4 - Yennu Gbounpaauŋ Mɔɔr

Masia toontunna labaar

¹ Ŋann amii, i jiit ki tii tee Masia toontunna nba ki Yennu jiit ki guunit u woonin ni maan na.

² Li paak, linba tee majaann tee nnee, li ŋan ki toontunnɔ-n tuun nan barmɔnii.

³ Ŋaan li-i tee ki i bu n buut kaman nan nifosaarii nba tuu bu bi leeb buut na, n baka kaa; n mɔŋ gbaa ki bu n mɔŋ buute.

⁴ N nɔɔk ni yeene, ŋaan li ki want a n ki tuun biiti, ŋaan ti Yomdaanɔe tee wunba bu n buut.

⁵ Li paak, i daa bu sɔɔ buut mɔtana, kii guu yoo nba ki ti Yomdaanɔ tan sa baar na, wunba tan sa jii linba be bunbɔnn ni ki fiit wannir paanu ni, ki tan sa fiit para ni maan ki wann paanu ni; ki li yoo na ki sɔɔ kur tan sa la u nyɔɔt nba tee biaŋinba Yennu boor.

⁶ N naa waas, i paake ki n bikin linba na kur ki tur n mɔŋ nan Apolos, a i tumii ti boor ki wei Yennu gbouŋ nba wann biaŋinba na bonŋann, ki sɔɔ daa dont u mɔŋ ti yenɔkɔɔ paak ki gar u lɔɔ.

⁷ Ŋmee tura saakatuk a leeb ni? Yennu kaa tura linba kur ki a mɔk na-aa? ki bee teen ki a dont a mɔŋ, ki li tee nan linba ki a mɔk maŋ ki tee piinii kaa na?

⁸ I poŋ mɔk linba kur ki i loonii? i poŋ teen gordammaa? ta lek kaa i boor nna, ŋaan i tee kpanbara-aa? N poŋ loon yin set tee kpanbara nan barmɔnii, ki timm nan yimm-n taan teen kpanbara.

⁹ Min yaa boor n dukin nan Yennu gann timm nba tee toomiinba na ki ti tee tariie, ki tee kaman nan niib nba ki bi sa kpib paanu ni, ki teemm yaarlituk niib, ki tingbouŋ na teeb kur nan malakanba goriit.

¹⁰ Ti tee jatite Masia paak, ŋaan yimm ŋanin tee yandamme Masia sɔnu ni; ti ki mɔk paŋ, ŋaan yimm ŋanin mɔk paŋ; ki niib teeni nibaakir ŋaan yisin timm.

¹¹ La nyii sianyoowa mɔkmɔk nan mɔtana, ti lin nan kome nan nyunyukiru, ki lia tachiat, ki bi boot, ki ti lin yirib ki kaa binbeboori.

¹² Ti niŋinniie ki ti tuun ki di; bi-i sukirit, ti tuu jiimm mɔŋamme; bi-i dintit fara, ti tuu mɔk sukurue;

¹³ bi-i pak biir ti sana, ti tuu pak jiimm nan loomme. Ti kpant tariie, ki tee kaman nan tingbouŋ na tanpenn paak mɔɔt na, ki bia tee kaman nan tingbouŋ na jakint na ki tan tuu mɔtana.

¹⁴ N ki sɔbin na ki teeni a n dinni fei kaa, ŋaan n kpaaniie ya tee n walonkai na paak.

¹⁵ Ŋaan li-i tee ki i lek mɔk wannteeb tusa piik Masia ni, i ki mɔk baanba bonchianni; kimaan Yisa Masia nie ki n mari barŋanii nba ki n wanni na paak.

¹⁶ N barimiie, yii waa n binbeŋ man.

¹⁷ Linba na paake ki n tuun Timoti i boor, wunba tee n bilonkak ki tee barmɔnii daanɔ ti Yomdaanɔ ni; u sa tiari ma be biaŋinba Masia ni, nan ma lin want Masiaweira biaŋinba siaminba kur.

¹⁸ Siab mɔk dontinmɔŋe, ki dukii a n kan baar ki gɔniini.

¹⁹ Li-i tee ki ti Yomdaanɔ loon, n sa gɔni mɔtana, ki la dontinmɔŋ damm na, li ki tee bi pinpakit paak kaa, ŋaan n yaa n laan bi set mɔk paŋ amii bi ki mɔki.

²⁰ Yennu naan ki tee mɔb ni, li tee paŋe.

²¹ I loon lanne? I loon ki n baar i boor nan ninmɔnn amii n baar soonnee?