1 Korint teeb 3 - Yennu Gbounpaauŋ Mɔɔr

Yennu toontunna labaar

¹ N naa waas, li tee mɔniie, n din ki fit pak ki turi kaman nan ma din bo sa pak ki tur niib nba mɔk Yennu Seyeeŋ na; n din pak ki turi kaman nan ma bo sa pak ki tur tingbouŋ na teeb nee, ki i binbeŋ bia tee kaman nan waas binbeŋ nee Masia sɔnu ni.

² N mɔɔnti biime, ki li ki tee jekpabaa kaa, kimaan i ki jaŋ nanni. Mɔtana gbaa i bia lek daa ki jaŋ nanni,

³ kimaan i binbeŋ bia daa be kaman nan tingbouŋ na niib binbeŋ nee; kimaan funfunn nan mɔniɔk-i be i sinsuuk ni, i ki waa tingbouŋ na teeb binbeŋ kaa-aa?

⁴ Ki sɔɔ-i yet a u tee Pɔɔl yɔɔe, ki lɔɔ mun yet a u tee Apolos yɔɔe, ŋann i ki tuun kaman nan tingbouŋ na teeb binbeŋ na kaa-aa?

⁵ Ŋmee tee Pɔɔli, ki ŋmee mun tee Apolosi? Ti kpan tee Yennu toontunna nba din te ki i sak Yisa mɔb nee. Ti kur na tuun toona nba ki ti Yomdaanɔ turit a tii tuume.

⁶ Min din bur bonbooriie ki Apolos mun maant nyun, ŋaan Yennue te ki li pia ki kpaat.

⁷ Wunba bur nan wunba maant nyun ŋanin tee yanne; Yennu ki tee yanni, kimaan ŋɔɔe te ki li kpaat.

⁸ Bɔkitu kaa wunba buur nan wunba maant nyun na sinsuuk ni. Yennue sa turib nyɔɔt ba tun linba na paak.

⁹ Ti lakin tuun ki teen Yennue. I tee kaman nan Yennu kpaab nee, ki bia tee kaman nan Yennu diiuk na.

¹⁰ Yennu nba sommin biaŋinba na paak, n tee kaman nan tanmaaŋanɔ nee, ki piin fiakir, ki sɔɔ mun maa ki tɔɔnt li paak. Ŋaan wunba kur maa ki tɔɔnt li paak, wun soor u mɔŋ.

¹¹ Yennu poŋ din jii Yisa Masia ki u tee fiakire, ki fiaksiar ji kaa ki sɔɔ ji sa fit piinii.

¹² Siab sa jii sarimae, amii nabint, amii tanchincheena, ki maa fiakir maŋ paak; siab mun sa jii daate, amii mɔɔt, amii kakaa, ki chaan fiakir maŋ paak.

¹³ Masia baaru daar maŋ nie, ki sɔɔ kur toona nba tee biaŋinba tan sa nyi paanu. Muue tan sa fiit wannir, ki bikin sɔɔ kur toona ki wann la tan sii tee biaŋinba.

¹⁴ Li-i kii dii linba ki nirɔ maa tɔɔn fiakir maŋ paak na, ŋann ŋanin u sa la nyɔɔta.

¹⁵ Ŋaan wunba yar dii muu, u sa kɔŋ li nyɔɔta, ŋaan u mɔŋ ŋanin sa tinna ki li sii tee nan u chiare ki nyii muu ni na.

¹⁶ I tee Yennu diiuko, ki Yennu Seyeeŋ be i ni; i ki mi nna-aa?

¹⁷ Li paak, wunba biir Yennu diiuk, Yennu mun sa biir li yɔɔwa. Kimaan Yennu diiuk tee diyeeŋe; ki yimme tee u diiuk maŋ.

¹⁸ Sɔɔ daa kpann u mɔŋi. Sɔɔ-i be i sinsuuk ni ki dukii nan u tee yan daanɔe tingbouŋ na binbeŋ ni, li ŋan wun kpant u mɔŋ jatuk ki set teen yan daanɔ.

¹⁹ Linba ki tingbouŋ na teeb dukin ki li tee yan na, li tee jatiie Yennu boor, nan la sɔb Yennu gbouŋ ni a “Yennu biir yan damm bannu.”

²⁰ ki bia sɔb leer boor a “Ti Yomdaanɔ mi nan yan damm dudukit tee yanne.”

²¹ Li paak, sɔɔ daa mɔk dontinmɔŋ nisaarik paaki. Siar kur tee i yare;

²² min Pɔɔl nan Apolos nan Piita nan tingbouŋ na, nan manfoor nan kuun, nan mɔtana nan yoo nba baat na, yimme yen linba na kura.

²³ Ki Masia mun yeni, ki Yennu mun yen Masia.