1 Korint teeb 2 - Yennu Gbounpaauŋ Mɔɔr

Masia dapunpunn paak kuun labaar

¹ N naa waas, ma din baar i boor ni na, n din ki mɔɔntir Yennu labaar na ki teeni nan mɔmant amii nifosaarik minu ni kaa.

² Ŋaan ma din be nani na, n din ki mɔk duduksiat ki pukin Yisa Masia po, nan u dapunpunn paak kuun na po.

³ Ma baar i boor ni yoonba, n baar nan chɔkinte, ki jaŋmaanii nan jijekit soorin.

⁴ N ki pak labaar maŋ nan minu nba sa maŋ niib kaawa ki bin sak li, ŋaan n pake ki Yennu Seyeeŋ na wann u paŋ,

⁵ a ya teen Yisa Masia yada na, li ki tee nisaarik yan paak kaa, ŋaan li tee Yennu paŋ paake.

Yennu yan po

⁶ Mɔmɔmm, ti piak nan yame ki teen binba ki bi para chee nan Yisaweiu ni na. Li ki tee tingbouŋ na niib yan amii tingbouŋ na paŋ damm nba ki bi panii sa teen yann na.

⁷ Yan nba ki ti piak na tee Yennu woonin ni yan nba woon ki nirɔ ki mi, linba ki Yennu poŋ dɔŋ gann a wun donnit, ki sɔɔ ki dunia daa din ki nan na.

⁸ Tingbouŋ na ŋaayudamm sɔɔ kaa ki mi yan na. Bi-i bo-i mir, bi din bo kan kpaa ti Yomdaanɔ wunba yen paku kura na dapunpunn paaki.

⁹ Li sɔb Yennu gbouŋ ni a “Linba ki nirɔ ki la, ki bia ki gbati, ki bia ki dukin a li sa fit teen na, ŋanne ki Yennu teen siir ki guun binba loonɔ na.”

¹⁰ Ŋanne ki Yennu Seyeeŋ na te ki ti bannir, kimaan Seyeeŋ na mi bont kur nan Yennu woonin ni maan gbaa.

¹¹ Nifosaarik seek nba be u ni na kuukɔɔe mi nisaarik dudukit. Nnee mun, sɔɔ ki mi Yennu dudukit see Yennu Seyeeŋ na kuukɔɔ.

¹² Seek nba ki ti gaar na, u ki tee tingbouŋ na seek kaa, ŋaan u tee Yennu Seyeeŋ nba sa te ki tin bann piinii nba ki u turite.

¹³ Li paak, ki ti ki piak maan nba tee nisaarik wannu yami; ŋaan ti piak linba ki Yennu Seyeeŋ wantit, ki bia want Yennu barmɔnii na ki teen niib nba ki Yennu Seyeeŋ be bi ni na;

¹⁴ ŋaan wunba ki mɔk Yennu Seyeeŋ maŋ, li yɔɔ ki gaan Yennu Seyeeŋ na maami, kimaan li sii tee jatiie ki turɔ, ki u kan bann li paaki, kimaan li bannu nyi Seyeeŋ na boor nie.

¹⁵ Ki wunba mɔk Seyeeŋ na bant bona kur paake, ŋaan nirɔ kan fit ki bann u binbeŋ ni,

¹⁶ kaman nan la sɔb Yennu gbouŋ ni a “Ŋmee sa fit bann Yennu dudukit ki ŋmakitɔɔ?” Ŋaan timm ŋanin mɔk Masia dudukit.