1 Korint teeb 16 - Yennu Gbounpaauŋ Mɔɔr

Ba sa lakin likirii biaŋinba

¹ Tɔn, n loon ki n wanni likirii nba ki i lakin ki yaa a i somm Yennu niib nba be Judea tiŋ ni na; yi tun biaŋinba ki n wann Masiaweira nba be Galasia tiŋ ni na.

² Lasir daar kur, sɔɔ kur-n tuu nyinn likirii, wa tun ki la biaŋinba, ki bir, ki mi-i taŋŋi baar, ki i ji daa lakii likirii.

³ Mi-i taŋŋi baar, n tan sa sɔb gbouŋ ki tun binba ki i gann na ki bin saan nan i piinii na Jerusalem.

⁴ Li-i taŋŋi jaŋ nan man saan n mɔŋ, tin tɔk ki saan.

Pɔɔl nba soor wun tun biaŋinba labaar

⁵ N lor soor ki loon ki n tɔkin nyi Masedonia tiŋ ni; li poorpo ki n baar ki gɔni.

⁶ Dasiar n tan sii be i boor yoo waaminna amii piar yoo kur; ki i tan sa sommin ki n gar ki saan siaminba kur ki n saa.

⁷ N ki loon ki n baar i boor ki gɔni waaminna ŋaan gar kaa, ŋaan ti Yomdaanɔ-i sak, n loon ki n jii yoo bonchiann i boor.

⁸ N sii be Efesus doo ni nna mɔkmɔk nan yukitgar tiaru jaamm dinu dapiiŋŋmu poorpo.

⁹ Sɔnu loot ki yaa bonchiann ki turin ki n sa tun Yisa toona, ŋaan datai bonchiann mun be.

¹⁰ Timoti-i taŋŋi baar i boor, i mi man ki yin kɔɔnɔ jaŋmaanii, kimaan u tuun ti Yomdaanɔ toonae kaman nan ma mun tuun biaŋinba na.

¹¹ I mi man ki sɔɔ-n siannɔ, ŋaan te ki wun nyi i boor nan parmaasir ki baar n boor, kimaan n gorii ŋɔɔ nan ti naa waas sɔnu.

¹² Ti naa bik Apolos ŋanin, n barimɔe ki loon ŋɔɔ nan ti naa waas na-n tɔk ki baar i boor, ŋaan u ki loon wun baar mɔtana; li-i tee ki u tan sa la yoo, u sa baara.

Kpaanii nan foontii labaar

¹³ Yii guu man kii be fanu i yada ni, kii mɔk par nan paŋ.

¹⁴ Yii tuun man bont kur nan loomm.

¹⁵ I poŋ mi Stefanas nan u ŋaateeb po, ŋamme din tee sinsinn niib nba be Akaya tiŋ ni ki din teen Masiaweira, ki bi jii bi mɔŋ ki tuun ki teen Yennu niib.

¹⁶ N naa waas, n barimiie, yii tokii nibooru na binbeŋ nan bi toontunleeb kur binbeŋ, nan binba tuun bonchiann ki teen Yennu niib na.

¹⁷ N mɔk parpeenn Stefanas nan Fotunatus nan Akaikus baaru na paak, kimaan ya daan kaa n boor nna, n daan mɔk parbiir, ŋaan ba baar na, n ji ki mɔk parbiiri,

¹⁸ kimaan bi chee min nan yimm para; li paak, yi tur li nibooru nibaakir.

¹⁹ Masiaweira nba be Asia tiŋ ni na foonti. Akuila nan Prisika nan Masiaweira nba lakii ki jiantir Yennu bi ŋaak ni na foonti fanu ti Yomdaanɔ sann ni.

²⁰ Ti naa waas na kur foonti. I foont leeb kpammii man.

²¹ Min Pɔɔle jii n mɔŋ nuu ki sɔbin foonti.

²² Wunba kur ki loon ti Yomdaanɔ, mɔpor-ii be u paak. Maranata; li paak tee “Ti Yomdaanɔ, baat.”

²³ Ti Yomdaanɔ Yisa-n sommi.

²⁴ N loon i kur nan barmɔnii Yisa Masia sann paak. Mɔmɔmm.