1 Korint teeb 15 - Yennu Gbounpaauŋ Mɔɔr

Masia kuun fiiru labaar

¹ N naa waas, n loon ki n tiari barŋanii nba ki n din mɔɔnt ki turi, ki i gaar ki diar fanu na poe.

² Li-i tee ki i diar fanu, i sa tinn, ŋaan nnee kaa, i yada na sii tee yanne.

³ Kimaan n din beti labaar nba ki n mun din gaar na, ki li tee barjaann ki gar barii kura; a Masia din gaar timm biit damm paak ki kpo, kaman nan la sɔb Yennu gbouŋ ni biaŋinba na;

⁴ ki bi din piiu; ki u fiir kuun ni daa ŋanntaa daar kaman nan la sɔb Yennu gbouŋ ni biaŋinba na;

⁵ ki u dɔkit Piita paak, ki bia dɔkit toomiinba piik nan bannlee na ni.

⁶ Li poorpo biak ki u dɔkit yomm ki wann u poorpoweiteeb nba yab gar niib kobiiŋŋmu na. Bi siab bonchiann daa be bi manfoa ni, ki bi siab mun kpowa.

⁷ Li poorpoe ki u bia tan dɔkit Jems paak, ki ji tan dɔkit toomiinba kura paak.

⁸ Linba na kur poorpo, ki u bia dɔkit n paak, min nba tee kaman nan poonyiir na.

⁹ Toomiinba na kur ŋaan mine tan joont, ki n bo ki jaŋ nan bii yin toomii, kimaan ma din dinn Yisaweira fara na paak.

¹⁰ Ŋaan Yennu sommir paake ki n tee ma tee wunba, ki sommir nba ki u jii ki turin na, li ki tee yanni; n tun ki gar toomiinba na kura, ŋaan li ki tee a mine tumi, li tee Yennu sommir nba be n ni nee tun.

¹¹ Li-i tee minie, li-i bia tee ŋammie, ŋanne ki ti kur want niib barŋanii na, ŋanne ki i mun teen yada.

Kuun fiiru labaar

¹² Li paak, ta mɔɔntir barii na ki yaa a Masia din fiir kuun ni, ki nlee ki i siab yeen a binba kpo na tan kan fiiri?

¹³ Li-i tee ki kuun fiiru kaaie, li want nan Masia din ki fiir kuun ni;

¹⁴ ki Masia-i diŋŋi kii fiir kuun nie, ŋann ŋanin ti ki mɔk labaar nba ki ti ji sa mɔɔnti; ki i mun ki mɔk linba ki i sa teen yada.

¹⁵ Ki li-i tee nneeie, ŋann ŋanin ti teen fai siara damme na ki tur Yennu, kimaan ti poŋ teen Yennu siara damm a u din fiin Masia kuun ni; ŋaan kuun fiiru-i kaa, u set din ki fiinɔ kuun ni.

¹⁶ Kpeemm fiiru-i kaa, ŋann ŋanin Yennu din ki fiin Masia kuun ni.

¹⁷ Masia-i diŋŋi bo-i kii fiir kuun ni, i yada tee yanne, ki i bia daa be i toonbiit ni.

¹⁸ Li bo bia want nan binba teen Yisa yada ŋaan kpo na, bi bote.

¹⁹ Ta teen Masia yada na, li-i tee ki li mɔk nyɔɔt tingbouŋ na benu ni kuukɔɔie, ŋann ŋanin ti bo sii mɔk ninbaauk ki gar sɔɔ kura.

²⁰ Ŋaan li tee barmɔniie, Yennu set din fiin Masia kuun niwa. Ŋɔɔ Masia tee sinsinn daanɔ nba fiir kuun ni; ki li want nan binba kur kpo na mun tan sa fiir kuun ni.

²¹ Nirɔe baar nan kuun tingbouŋ na ni; nnee mun ki nirɔ bia baar nan kuun fiiru.

²² Kimaan Adam paake ki nifosaarii kur kpenn; nnee mun Masia paak nifosaarii sa la manfoa.

²³ Sɔɔ kur sa fiir u kuun fiiru yoo; Masiae fiir sinsinn, ki binba tee u niib mun tan sa fiir u baaru daar maŋ.

²⁴ Li poorpo ki li joontu tan sa baar, ki u tan sa nyann naandinu kur, nan yent nan paŋ kur; ŋaan jii naan na ki tur u Baa Yennu.

²⁵ Masia tan sii yen yent kur mɔkmɔk ki tan baar yoo nba ki u sa nyann u datai kur ki teemm u nuu ni.

²⁶ Dataak nba ki u tan sa joont ki biir tee kuume.

²⁷ Li sɔb Yennu gbouŋ ni a “U jii bont kur ki teen u nuu ni;” ŋaan li ki wann a Yennu mɔŋ pukin bont kur maŋ ni.

²⁸ Ki bont kur-i taŋŋi be Masia nuu ni, ŋann ŋanin u mɔŋ tan sii be Yennu nuu ni, wunba te ki bont kur be u nuu ni na; Yennu sii tee bont kur saaka yɔɔ.

²⁹ Nirɔ-i kii fi kuun ni, bee ki bi wur siab Yennu nyunwuru ki ki wurib bi mɔŋ paak, ŋaan wurib ki teen kpeemmi? Kpeemm-i kii fi, bee ki bi tee nna?

³⁰ Ki bee ki ti kɔɔ maan ni yoo kuri?

³¹ N naa waas, n mɔk parbifaant i paak nan ya be biaŋinba nan ti Yomdaanɔ Yisa Masia na, linba na paake ki n yeen a n tookit kuun yoo kur na.

³² Ki min nan Efesus doo ni bonkobibiit kɔn, ki mi-i tee nifosaarik nba kan fiir kuun nie, li nyɔɔt tee lanne ki turimi? Kpeemm-i kii fi kuun ni, ŋaant man ki tii di kii nyu ŋaan kii mi nan ti won sa kpo.

³³ I daa sak ki sɔɔ-n kpanniini. Niŋamm nan nibiit-i tɔkii nan leeb, li sa biir niŋamm maŋ binbenŋaŋ.

³⁴ Ŋaant ki i yan-n jen, ki ji daa tuun toonbiiti. I siab ki mi Yennu; ŋanne ki n sɔbin na ki yaa n dinni fei.

Gbanant fiiru labaar

³⁵ Sɔɔ sa boi a “Nlee ki binba kpo na tan sa fiir kuun ni? a bi gbanant tan sii tee nlee?”

³⁶ Jatuk na, linba ki a bur, li kan fit pia li yoo; see ki li kpo daanna ki tan fit lian pia.

³⁷ Fi-i yaa a bur bonboorik, li kii tee kaman nan linba sa pia na kaa; a buur bonboorik nee, li pasiar fan bur dii amii linba kur;

³⁸ ŋaan Yennue sa tur bonboorik maŋ lin kpaat nan wa loon lii tee biaŋinba na; ki bonboorik kur mɔk li mɔŋ naauŋo.

³⁹ Gbanant bont kur ki taa naauŋo, nifosaarii gbanant tee yomme, ki bonkobit yar mun tee yomm, ki nɔɔnii yar mun tee yomm, ki janii yar tee yomm.

⁴⁰ Sanpaapo bona mɔk bi gbanant bi kɔɔe, ki tingbouŋ na ni bona mun mɔk li gbanant li kɔɔ. Sanpaapo bona gbanant fant be li kɔɔe, ki tingbouŋ na bona gbanant fant mun be li kɔɔ;

⁴¹ yennu mɔk yentu li kɔɔe, ki ŋmaarik mun mɔk yentu li kɔɔ, ki ŋmaabira mɔk yentu li kɔɔ, ki ŋmaabira sinsuuk ni mɔk yentu kɔɔt kɔɔt.

⁴² Li tee nnee kuun fiiru ni; bi-i pii gbanant tiŋ ni li tuu tan pɔɔke, ŋaan li-i fiir li kan mi pɔɔki.

⁴³ Bi ki piit nan fanti, ŋaan ti tan fiir nan fante; bi bia ki piit nan paŋi, ŋaan ki ti tan fiir nan paŋ.

⁴⁴ Bi piit nan tingbouŋ na gbanante, ŋaan ti-i fiir ti sii tee gbanant nba sii tee Seyeeŋ yare. Gbanant nba tee tingbouŋ na yar be; ki gbanant nba tee Seyeeŋ yar mun be.

⁴⁵ Kimaan li sɔb Yennu gbouŋ ni a “Sinsinn nirɔ Adam na din tee nifosaarike;” ŋaan nirɔ nba joont ki baar na tee Seyeeŋ nba teent manfoore.

⁴⁶ Gbanant nba tee Seyeeŋ yar na kaa baar sinsinni, ŋaan tingbouŋ na gbanant nee baar sinsinn, li poorpo ki Seyeeŋ yar na wei.

⁴⁷ Sinsinn nirɔ na din nyii tant nie, ki nirɔ nba wei na nyii Yendɔuŋ ni.

⁴⁸ Tingbouŋ na teeb tee kaman nan jɔɔ nba ki Yennu jii tant ki namɔ nee; ki binba tee Yendɔuŋ ni yab tee kaman nan jɔɔ nba nyii Yendɔuŋ ni na.

⁴⁹ Ti kura gbanant tee kaman nan Adam wunba nyii tant ni yar nee; dasiar ti bia tan sii tee kaman nan jɔɔ nba nyii Yendɔuŋ ni na yar nie.

⁵⁰ N naa waas, n beerie nan gbanant nba tee nant nan sɔn na kan fit kɔɔ Yendɔuŋ ni; ki gbanant nba pɔɔk kan fit la manfoor nba kaa gbennu.

⁵¹ N yaa n beti woonin ni maame. Ti siab tan sa kpo; ki siab mun tan sii be mɔkmɔk nan Yisa baaru daar; ŋaan ti kur sa lebita.

⁵² Li daar maŋ, kikaak-i taŋŋi bui, ti kur sa lebit yomme yian yiama kaman nan ninbinn kabintu na; kikaak sa bui, ki kpeemm-n fiir nan gbanant nba kan mi kpo, ki timm nba tan daa sii be manfoor ni daar maŋ, ti gbanant sa lebite.

⁵³ Li kpaa talas nan gbanant nba pɔɔkit na tan sa kpant gbanant nba ki pɔɔkite, ki gbanant nba kpenn na tan sa kpant gbanant nba ki kpennie.

^54-55 Li paak, linba na kur-i tan teen, li yoo na ki linba sɔb Yennu gbouŋ ni na-n gbee a “U nyann kuun gbenna.” Li bia sɔb a “Kuun, a nyannu na be lee? Kuun, a tonu na be lee?”

⁵⁶ Kuun tonu tee biite, ki biit kpit sennu paŋ ni.

⁵⁷ Ti teen Yennu nipoouk nan wa teent nyannu ti Yomdaanɔ Yisa Masia paak na.

⁵⁸ Li paak, n naa waas, i be man fanu ki daa baa Masiaweiu ni. Yii jii i mɔŋ kii tuun ti Yomdaanɔ toona yoo kur, kimaan i mi nan toona nba ki i tuun ki teen ti Yomdaanɔ na, li tan kan baa yanni.