1 Korint teeb 12 - Yennu Gbounpaauŋ Mɔɔr

Yennu Seyeeŋ piinii labaar

¹ N naa waas, n loon ki yin bann Yennu Seyeeŋ piinii nba tee biaŋinbae nan barmɔnii.

² I mi nan yoo nba ki i daa din ki teen Masia yada na, i din lin waa patae, linba ki piaki, ki kɔɔnti bonbiir ni.

³ N loon ki yin bann nan Yennu Seyeeŋ na-i be wunba ni, li daanɔ kan fit yet mɔb ki biir Yisa; sɔɔ mun kan fit yet a Yisae tee ti Yomdaanɔ, see ki Yennu Seyeeŋ na be u ni ki te ki u yet nna.

⁴ Seyeeŋ piinbooru booru be, ŋaan Seyeeŋ yenɔkɔɔe be.

⁵ Yenjiantbooru booru mun be; ŋaan Yomdaan-yenɔe be.

⁶ Toonbooru booru mun be, ŋaan Yen-yenɔkɔɔe te ki sɔɔ kur tuun u toonn.

⁷ Seyeeŋ na teen Masiaweira kur linba want Seyeeŋ na benu a tin somm Masiaweira na kur.

⁸ Seyeeŋ na sa tur sɔɔ ki u mɔk yan paku; ki bia tur sɔɔ bannu ki u piak bannu maan; ŋaan ki li kur nyi Seyeen-yenɔ nie.

⁹ Seyeeŋ maŋe teen sɔɔ ki u mɔk yada, ki bia teen sɔɔ paŋ nba te ki baatib paak na;

¹⁰ ki bia teen sɔɔ yaak ki u tuun bakitnauŋ toona; ki bia teen sɔɔ ki u sɔkint Yennu maan; ki bia teen sɔɔ ki u bant piinii nba nyi Yennu Seyeeŋ ni nan linba ki nyi Seyeeŋ na ni; ki bia teen sɔɔ ki u piak mabooru booru; ki bia teen sɔɔ ki u fit kpintir mabooru maŋ.

¹¹ Linba na kur tee Seyeeŋ maŋ toonae, ki u pi sɔɔ kur piinii kaman nan ŋɔɔ Seyeeŋ nba loon biaŋinba.

Gbanant paak barjouk labaar

¹² Masia tee kaman nan gbanant nee; gbanant tee gbananyennkɔɔ nee, ŋaan ki li ji bɔkit bɔkit, ŋaan lek tee gbananyenn, nan la lek bɔkit bɔkit na gbaa.

¹³ Ti kura nba tee Juu teeb, nan binba ki tee Juu teebi, nan daaba, nan yentinmɔŋ damm, bi wur ti kur Yennu nyunwuru u Seyeeŋ yenɔkɔɔ sann ni a ti taan teen gbananyennkɔɔ; ki li Seyeeŋ yenɔkɔɔ maŋ bia gbeen ti kura.

¹⁴ Gbanant na ki mɔk linba gaa li paak na yennkɔɔ kaa, ŋaan li yaba.

¹⁵ Li-i tee ki taar yet a u ki tee gbanant bɔkirii ŋaan yaa kimaan u ki tee nuu, ŋann kaa sa te ki u ki tee gbananti.

¹⁶ Ki tubir mun-i yet a wa ki tee ninbinn na, li paak amii u ki tee gbanant bɔkirii, ŋann kaa sa te ki u ki tee gbananti.

¹⁷ Ki gbanant na kur-i taan tee ninbinnie, li sa teen nlee kii gbia? ki li-i taan tee tubir, nlee ki li sa gbat nubiru?

¹⁸ Ŋaan Yennu taan gbanant na kur ki teen gbananyennkɔɔ ni nan wa loon biaŋinba.

¹⁹ Li kur-i bo-i taan tee bonyennkɔɔ, li bo sii tee gbanantaa?

²⁰ La tee biaŋinbae na, linba gaa gaa gbanant paak yaba, ŋaan li tee gbananyennkɔɔe.

²¹ Ninbinn kan fit yet nuu a u ki loonɔ; ki yur mun kan fit bet taabira a u ki loomii.

²² Ki ti gbananbɔka nba gaa nan gbanant paak ki tee kaman nan bi ki mɔk paŋ na-i kaa, gbanant na kan tun.

²³ Gbananbɔka yenn yenn nba gaa gaa ki ti gorii ki li ki ŋan na, ŋamme mantik fan toona nba ki li tuun na ni ki gar gbananbɔka nba gaa gaa ki ti gorii ki li fan ki tee bonŋann na.

²⁴ Gbananbɔka yenn yenn nba gaa ki ŋan na, li ki loon sommiri. Yennu maŋe ŋamm li gbanant na ki tur gbananlia nba gaa gaa na ki ti gorii ki bi ki mɔk nyɔɔt na, ki ji teen gbananlia fant ki gar.

²⁵ Li paak, ti gbanant ki mɔk lukitimi. Gbanant kur nba gaa gaa na, bi fiin bi leeb po.

²⁶ Gbananbɔka yennkɔɔ-i di fara, gbananbɔka lia na mun tuu di li farae; gbananbɔka yennkɔɔ-i la baakir, lia na mun tuu mɔk parpeenne.

²⁷ Yimme lakin tee Masia gbanant, ki sɔɔ kur tee u gbanant nba gaa na yenninba.

²⁸ Ŋanne ki Yennu gann toomiinba u niib sinsuuk ni ki bi tee saakab; ki wei gann sɔkiniinba; ki gann wannteeb; ki wei paan binba tuun bakitnauŋ toona; ki gann binba te ki baatib paak, ki gann sommteeb; ki wei paan saakab nba ŋan ki gorii toona paak; ki wei paan binba piak mabooru booru.

²⁹ Ti kur kaa tee toomiinba, amii sɔkiniinba, amii wannteebi. Ti kur kaa sii mɔk yikoo ki sa tun bakitnauŋ toona.

³⁰ Ti kur kaa bia mɔk yikoo ki sa te ki baatib paaki, amii ki pak barganii, amii ki kpint barganii.

³¹ Yii loon man piinii nba tee piinjaana nan ninmɔnn. Ki n sa wanni sɔnu nba gar li kur.