1 Korint teeb 11 - Yennu Gbounpaauŋ Mɔɔr

¹ Li paak, i waa n binbeŋ kaman nan ma waa Masia binbeŋ biaŋinba na.

Yur yitu Yenjiantu yoo labaar

² N naa waas, n mɔk parpeenn nan ya tian linba ki n wanni na kur, ki bia tee nnee.

³ Ŋaan bonyennkɔɔe be ki n loon ki n tiari, nan Masia tee jɔɔ kur yudaanɔ, ki jɔɔ kur mun tee u poo yudaanɔ, ki Yennu mun tee Masia yudaanɔ.

⁴ Li paak, jɔɔ nba yaa wun miar Yennu amii ki mɔɔnt barŋanii na, ŋaan yir siar ki dɔkin u yur, u ki tur Masia baakiri.

⁵ Poo nba yaa wun miar Yennu, amii ki mɔɔnt barŋanii na ŋaan ki ki yir siar, u dinn u sɔrɔ feie; ki li tee kaman nan u koor u yur nee.

⁶ Ŋaan li-i tee ki poo ki yir siar ki dɔkin u yur, ŋaan li ŋan wun koor u yut; ŋaan la tee fei ki poo-n koor u yut, amii ki pɔɔ u yut na, li ŋan wun yir siar ki dɔkin u yur.

⁷ Li ki kpaa talas nan jɔɔ-n yir u yur siari, kimaan u naan nan Yennue ki bia tee Yennu paku; ŋaan poo ŋanin tee jɔɔe paku.

⁸ Kimaan jɔɔ naauŋ ki nyii poo ni kaa, ŋaan poo naauŋo nyii jɔɔ ni.

⁹ Yennu ki nan jɔɔ ki tur poo kaa, ŋaan u nan pooe ki tur jɔɔ.

¹⁰ Ŋaan malakanba paak, li ŋan ki poo-n yir siar ki dɔkin u yur ki lin wann nan jɔɔ na mɔk poo na yaak.

¹¹ Ŋaan ti Yomdaanɔ boor ni ŋanin, jɔɔ-i bo-i kaa, poo mun bo kaa, ki poo-i munii kaa, jɔɔ sii kaa;

¹² kimaan sintansimm dinn Yennu din jii jɔɔ kapirue ki nan poo, ki pooe mun maar jɔɔ, ŋaan bont kur nyi Yennu boore.

¹³ Yi boi i mɔŋ ki laan li ŋan ki poo-ii mei Yennu ki kan dɔkin u yur siari.

¹⁴ Ŋaan ti binbeŋ ni, li poŋ wann nan jɔɔ-i mɔk yuumunt li tee feie ki turɔ;

¹⁵ ŋaan poo yut-i tee yuumunt, li teenɔ fante, kimaan poo yuumunt tee u yuubobike.

¹⁶ Ŋaan sɔɔ-i loon wun nɔi mɔniɔk ki jiin li po, n sa yet a timm amii Yenweiraleeb nba kur ki mɔk sennleer ki pukin na po.

Ti Yomdaanɔ jeet dinu labaar

¹⁷ Ma yaa n beti linba na ŋanin, n ki piaki li paak kaa, kimaan ya tuu lakin leeb na, ya tuun biaŋinba, li ki mɔk nyɔɔt ki turiini, ŋaan li mɔk biite.

¹⁸ Sinsinn, n gbia ki bi yeen a ya tuu lakin leeb na, a lukitin tuu be i sinsuuk ni, ki n set gaar yenninba ki li tee mɔmɔmme.

¹⁹ Li set tee mɔniie nan lukitin kpan be i sinsuuk ni, kimaan ŋanne sa wann binba set waa barmɔnii sɔnu na yeenin ni.

²⁰ Li-i tee ki i lakin leeb ki di, li ki tee ti Yomdaanɔ jeet kaa ki i dii.

²¹ Kimaan ya lakin leeb yoonba na, sɔɔ kur di u dinue, ki siab mɔ kon, ki yemm gboot.

²² I ki mɔk i mɔŋ ŋei nba ki i sii be ki di ki nyu-uu? amii i loon yin sian Yennu niibe ŋaan dinn tarii fei-ii? N sa yeti a nlee? N sa paki linba na paakii? Aaii, n kan pakiini.

²³ N gaar wannu na ti Yomdaanɔ boore ki mun tɔɔt ki turi, a nyiɔk nba ki bi fikit ti Yomdaanɔ na, ki u jii boroboro

²⁴ ŋaan tur Yennu niipoouk, ki ŋmit ŋmit ki tur u poorpoweiteeb a bin ŋman, ŋaan yetib a “Nee tee n gbanant nba ki n yaa n tur ki bin kpir i paak na, a li paak, yii yɔɔ kii tee nna kii tian n po.”

²⁵ Jeet na dinu poorpo, ki u bia jii nyunyuŋmaŋ nan tilɔɔna nyun, ŋaan yetib a “Tilɔɔna nyun na tee n sɔn nyinn, ki wann nan Yennu senn mɔsonpaann ki tur niib; a ki yoo nba kur ki i yaa i nyu, nyun man kii tian n po.”

²⁶ Linba na wantit nan yoo nba kur ki i tan ŋman ti Yomdaanɔ boroboro ki nyuu tilɔɔna nyun maŋ, li want nan u din kpo ti paake. I sii tee nnee mɔkmɔk nan yoo nba ki u tan sa jen.

²⁷ Ŋannimi, wunba kur ŋman ti Yomdaanɔ boroboro na ki nyuu u bonnyunyuut na, ŋaan bo ki jaŋ nan wun tun nna, li daanɔ tun biit ki tur ti Yomdaanɔ gbanant nan u sɔn nawa.

²⁸ Sɔɔ kur-n ŋamm u mɔŋ fanuwa, ŋaan lian fit ŋman boroboro na ŋaan nyu bonnyunyuut na.

²⁹ Wunba ki bann ti Yomdaanɔ gbanant na paak ŋaan ŋman ki nyuu, u sa la tubdatu nba bi u paak, wa ŋman ŋaan nyuu na paak.

³⁰ Ŋannii teen ki i bonchiann chɔk ki yiar, ki siab mun kpo.

³¹ Ŋaan li-i tee ki i ŋamm i mɔŋ fanu ki ŋman, i kan la tubdatu.

³² Ŋaan ki ti Yomdaanɔ-i bu ti buut ki ti la tubdatu, u ji tan kan biir timm yoo nba ki u tan sa biir tingbouŋ na nileeb.

³³ Li paak, n naa waas, li-i tee ki i lakin leeb a i ŋman ti Yomdaanɔ jeet na, yin guur leeb.

³⁴ Ŋaan wunba ki kon mɔkɔ, ki u kan fit guur ti Yomdaanɔ dinu na, ŋann wun di u ŋaak niwa, ki fit lian baar, ŋanne kan baar nan tubdatu ki turɔ yoo nba ki i lakin nan leeb. Maan nba biar na, mi-i taŋŋi baar, n sa pak ki turi.