1 Korint teeb 10 - Yennu Gbounpaauŋ Mɔɔr

Patmannu labaar

¹ N naa waas, n loon ki yin bann nan sanpagbouŋ din tuu baak ti yejamm kur paake, ki bi tan gar poot mɔkgbeŋŋir.

² Li mun bia naan nnee nan bi kur lakin wur Yennu nyunwuru sanpagbouŋ nan mɔkgbeŋŋir na ni, ki ŋamm nan Moses lakin teen yomm.

³ Ki bi kur lakin dii jeet nba ki Yennu Seyeeŋ turib na;

⁴ ki bia lakin nyuu nyun nba ki Seyeeŋ maŋ turib na; kimaan bi lakin nyuu nyun nba nyii tanpiiuk ni; kimaan Masiae din chiamm.

⁵ Ŋaan linba na kura, Yennu din ki mɔk parpeenn nan bi siabi, ki te ki bi kpo kpo, ki bi gbanant yat dɔɔ dɔɔ fɔɔr ni.

⁶ Li paak, li tee wannue ki kpaanit a ti daa loon biit kaman nan ba loon biaŋinba na;

⁷ ti bia daa jiantir pata kaman nan bi siab nba din tuun; ki li sɔb Yennu gbouŋ ni a “Ki niib na kar ki di ki nyu, ŋaan ji fiir leŋ ki chomm.”

⁸ Ti daa tuun bonchonchonsin kaman nan bi siab nba din tuu tuun, ki dayennkɔɔ ki niib tusa piinnlee nan ŋanntaa kpo.

⁹ Ti daa bikii ti Yomdaanɔ kaman nan bi siab nba din tun, ki wai kpiib na.

¹⁰ Ti daa mɔk bunburimii kaman nan bi siab nba din tuu mɔk, ki kuun malaka kpiib na.

¹¹ Linba na kur tun ki turib ki li tee kpaanii ki tur leeb, ki li sɔb Yennu gbouŋ ni ki tee kpaanii ki tur timm nba be yoo nba ki dunia loon gbennu na.

¹² Li paak, wunba mi nan u be fanu, wun soor u mɔŋ ki daa baa.

¹³ Bikinu nba kur baar i boor ni, li tee linba yɔɔ baat niib boore; ŋaan Yennu tee barmɔnii daanɔ ki kan te ki bikinu-n baar i boor ki gar i paŋ teriki; ŋaan yoo nba ki bikinu baar i boor, u sa turi paŋ nba ki i sa nyannir ki nyi leŋ.

¹⁴ N naa waas, li paak, yi nyinn i mɔŋ patmannu ni.

¹⁵ N piak ki teen yimm yan damme, i mun dukin linba ki n pak ki turi na.

¹⁶ Niipoouk turu ŋmanbanyuutik nba ki ti tuu tur Yennu niipoouk ŋaan nyu leŋ na paak, ŋanne see Masia sɔn ni; ki boroboro nba ki ti tuu ŋmit ŋmit ki ŋman na, ŋanne mun bia see Masia gbanant ni.

¹⁷ La tee boroboro kunn na, timm ŋanin yaba ŋaan taan tee gbananyenn, kimaan ti kur lakin ŋman boroboro kunn nee.

¹⁸ Gotir Israel teeb nba mann mannu ki teen Yennu na; ŋamm nan Yennu taan yomme na.

¹⁹ Ma yeen linba na, li wann nan patir nan li nant nba ki bi mann na, li mɔk nyɔɔtii? Aaii, li ki mɔk nyɔɔti.

²⁰ N yeen a binba mann mannu ki teen pata na, bi set mann ki teen Sintaaniie, li ki tee Yennu kaa. Ki n ki loon ki sɔɔ-n taan nan Sintaanii.

²¹ N kan sak ki i lakin kar ki nyu ti Yomdaanɔ Masia ŋmanbanyuutik ni ki bia lakin kar ki nyu Sintaanii ŋmanbaŋ ni.

²² Ti bikii ti Yomdaanɔe a wun donn wutoor ti paakii? Ti paarɔee?

²³ Siab yeen a “Sɔnu be ki tin tun linba kur.” Mɔmɔmm; ŋaan bont kur kaa ŋani, bont kur kaa bia mɔk nyɔɔti.

²⁴ Daa dukii a mɔŋ kuukɔɔ po, ŋaan kii biakii dukii leeb po.

²⁵ Yi ŋman nant nba ki bi kɔi daak ni, ŋaan daa boi ki laan bee nantee, ki daa ŋaant ki li daama a dudukit ni,

²⁶ kimaan li sɔb Yennu gbouŋ ni a “Tingbouŋ na nan li bont kur tee Yennu yare.”

²⁷ Wunba ki tee Masiaweirɔ ŋaan tan baanta jeet, fii diwa, ki daa boi buboit jeet maŋ po, ki daa ŋaant ki li daama a dudukit ni.

^28-29 Ŋaan sɔɔ-i wanna a nant na bi mann patire, fa daa di ki a tan sa ŋmat u yan. Ŋaan sɔɔ sa boi a “Li sa teen nlee ki n yanbɔɔt nba loon biaŋinba sa biir lɔɔ dudukiti?

³⁰ Li-i tee ki n tur Yennu niipoouk n jeet na paak, nlee ki sɔɔ sa pak ki biir n sann jeet nba ki n tur Yennu niipoouk li paak na?”

³¹ Tɔn, li-i tee ki i di, amii ki i nyu bonnyunyuut, amii ki i tuun linba kur, yii tee man linba sa tur Yennu baakir.

³² Daa tee linba ki ŋan Juu nirɔ numm ni, amii Griik nirɔ numm ni, amii Yennu niib numm ni.

³³ Yii tuun man kaman nan ma tuun biaŋinba na; n loon ki n tun ki penn sɔɔ kur par bont kur ni; ŋaan li ki tee a n tuun linba ki n loon, amii linba ŋan ki turin kaa; ŋaan n tuun linba ŋan ki turibe, kimaan n loon ŋanne-n tinnib.