1 Korint teeb 1 - Yennu Gbounpaauŋ Mɔɔr

¹ Min Pɔɔl nba ki Yisa Masia yiinin a n teen u toomii Yennu loomm ni, min nan ti naa bik Sosenes sɔbin gbouŋ na ki teen Yennu mɔtaauk niib nba be Korint doo ni.

² Yisa Masia paake ki i tee Yennu niib, ki u yiini kii teen u niib nan binba kur yi ti Yomdaanɔ Yisa Masia sann siaminba kur; ŋɔɔe tee bi Yomdaanɔ ki mun bia tee ti Yomdaanɔ.

³ Ti Baa Yennu nan ti Yomdaanɔ Yisa Masia-n sommi ki bia turi parmaasir.

Pɔɔl nba teen Yennu niipoouk biaŋinba

⁴ N teen Yennu niipoouk yoo kur i paak nan wa turi sommir Yisa Masia paak na,

⁵ kimaan i la bonsiar kur i pinpakit ni nan i minu ni u boore.

⁶ Masia labaar nba ki ti din wanni na, i gaarir fanuwa.

⁷ Li paak, i ki pɔt Yennu Seyeeŋ piinii na yenn gbaa nan ya guu daar nba ki ti Yomdaanɔ Yisa Masia tan sa jen na.

⁸ U sii guui nan ti Yomdaanɔ Yisa Masia jenu daar maŋ ki i tan daa mɔk biiti.

⁹ Yennu-i yaa u sa tun linba, u tuun ŋanne. U yiinie a yimm nan u bik ti Yomdaanɔ Yisa Masia-ii mɔk mɔtaauk nan leeb.

Masia niib bɔkitu labaar

¹⁰ N naa waas, n barimiie ti Yomdaanɔ Yisa Masia sann ni a yin taan mɔb, ki mɔniɔk daa be i sinsuuk ni, ki yii taa mɔyemmkɔɔ nan dudukyennkɔɔ.

¹¹ N naa waas, Kloe ŋaatesiab betin a i mɔk mɔniɔk nan leeb i sinsuuk ni.

¹² Linba ki n yeen na tee a i siab yaa a bi tee Pɔɔl yabe, ki leeb mun yaa a bi tee Apolos yabe, ki siab mun bia yaa a bi tee Piita yabe, ki yemm mun yaa a bi tee Masia yabe.

¹³ Masia maŋ bɔkit bɔkitee? Bi din kpaa min Pɔɔl dapunpunn paak i paakii? amii bi wuri Yennu nyunwuru min Pɔɔl sann paakii?

¹⁴ N teen Yennu niipoouk nan ma ki wur i sɔɔ Yennu nyunwuru na, see Krispus nan Gaius.

¹⁵ Li paak, sɔɔ kan fit yet a bi wurɔ Yennu nyunwuru n sann ni.

¹⁶ N bia wur Stefanas ŋaateeb Yennu nyunwurue, ŋaan n ji ki tian ma wur wunba ki pukini.

¹⁷ Kimaan Masia ki tumin a n tan wur niib; u tumin a n tan mɔɔnt u barŋanii nee ki tur niib. Li ki tee a n jikit nisaarik mir kaa ki beeribi; mi-i bo-i kii tuun nna, li bo sa te ki Masia nba kpo dapunpunn paak na, u kuun maŋ-n teen yanne.

Masia kuun nba wantit Yennu yan po biaŋinba

¹⁸ Nisiab nba bot Yennu sɔnu ni na jii Masia kuun dapunpunn paak labaar na ki li tee yanne, ŋaan timm nba tinn na mi nan li tee Yennu paŋe.

¹⁹ Li sɔb Yennu gbouŋ ni a u yet a “N sa biir yandamm minu na ki te ki bannteeb bannu na-n biar yann.”

²⁰ Li paak, tingbouŋ na yandamm nan mirteeb nan mɔnɔdamm na be lee? Yennu te ki tingbouŋ na yandamm teen yanne.

²¹ Yennu nba mɔk yan na te ki tingbouŋ na teeb yan kan fit te ki niib-n bannɔ. Li paak, ki u te ki binba teen Yisa yada na tinn; jatii labaar nba ki ti mɔɔntir ki teen niib na paak ki bi tinn.

²² Juu teeb loon bin la bakitnauŋ toonaewa ki fit lian teen yada; ki Griik teeb mun loon yan;

²³ timm ŋanin mɔɔntir ki wantib biaŋinba ki Masia kpo dapunpunn paak nee, ki maan maŋ dont Juu teeb wutoa, ki bia tee jatmaan ki teen binba ki tee Juu teebi.

²⁴ Juu teeb nan binba ki tee Juu teeb ki Yennu gannib na ŋanin mi nan Masia kuun labaar na tee Yennu paŋ nan u yame.

²⁵ Linba ki Yennu tuun ki nisaarik jiir ki li tee jatii na, li mɔk yan ki gar nisaarik yan; ki linba ki Yennu teen ki nisaarik dukii a li ki mɔk paŋ na, ŋaan li mɔk paŋ ki gar nisaarik yar.

²⁶ N naa waas, dukint man ya din tee biaŋinba yoo nba ki i din sak Yisa barŋanii na. Nisaarik minu ni, i waaminne mɔk yan amii paŋ amii ki tee nijaana.

²⁷ Ŋaan Yennue gann binba tee jatit tingbouŋ na teeb boor ni, a wun te ki yandamm-n di fei; ki bia gann tatimm tingbouŋ na teeb boor ni, a wun te ki paŋ damm-n di fei.

²⁸ Yennue gann tarii nan binba ki mɔk nyɔɔt, nan binba ki tee siar, a wun teen linba ki niib dukii a li mɔk nyɔɔt na yann.

²⁹ U teen nnee a sɔɔ daa nyu bara u boor.

³⁰ Ŋɔɔ Yennue taan timm nan Yisa Masia ki u tee ti yan. U paake ki Yennu nyinnit daabsin ni, ki yet a ti tee niŋamm u boor, ki ji tee u niib.

³¹ Li paak, yii tuun linba sɔb Yennu gbouŋ ni a “Wunba nyu bara, wun nyu bara maŋ ti Yomdaanɔ Yennu paak.”