1 Jɔɔnn 4 - Yennu Gbounpaauŋ Mɔɔr

Ta sa bann Yennu Seyeeŋ biaŋinba

¹ N walonkai, i daa tee nisiab kur nba yaa a bi mɔk Yennu Seyeeŋ na maan yada, ŋaan bikintib man, ki got laan bi sei maŋ nyii Yennu boor ni amii lee, kimaan faak sɔkiniinba bonchiann nba kpann niib na poŋ baar na ki yat lin niib ni.

² Wunba kur ki seek piak u ni, ki u yaa a u teen yada a bi din mar Yisa Masia nisaarike, ŋɔɔe mɔk Seek nba nyii Yennu peŋ. Li-i tee ki u yeen nna, ŋanne ki ti sa bann nan li tee Yennu Seyeeŋe.

³ Ŋaan wunba ki seek piak u ni, ki u yaa a u ki teen yada nan bi mar Yisa nisaarike, ŋɔɔe ki mɔk Yennu Seyeeŋi. Li daanɔ seeke tee Yisa dataak seek na. Bi din poŋ beti nan Yisa dataak maŋ sa baar na, ki mɔtana u poŋ set baar tingbouŋ na niwa.

⁴ N waas, yimm tee Yennu yabe, ki Yennu Seyeeŋ be i ni, ki u mɔk paŋ ki gar Sintaanii wunba be tingbouŋ na ni. Ŋanne te ki i nyann faak sɔkiniinba maŋ.

⁵ Ŋamme tee tingbouŋ na yab. Li paak te ki bi piak tingbouŋ na niauŋ po, ki tingbouŋ na ŋaateeb fiin bi po.

⁶ Ŋaan timm ŋarin tee Yennu yabe; ki binba mi Yennu, ŋamme fiin ti maan po. Ŋaan binba ki tee Yennu yabi, bi ki fiin ti maan po. Ŋanne sa te ki ti sa bann wunba mɔk Yennu Seyeeŋ nba want barmɔnii wannu, nan wunba mɔk Sintaanii seek nba want faak wannu.

Yennu tee loomm

⁷ N walonkai, tii loon ti leeb man, kimaan loomm tee Yennu yare, ki binba mɔk loomm, ŋamme tee Yennu waas ki bia miu.

⁸ Yennu tee loomme, ki binba ki mɔk loommu, bi ki miu.

⁹ Yennu din sikin u Bijayemmir tingbouŋ na ni a ti la manfoor u paak, ki nee fiit wannit nan Yennu set loont.

¹⁰ Loomm nba set tee loomm nan barmɔnii ki tee a timm din loon ŋɔɔ Yennu kaa, ŋaan li tee a ŋɔɔ Yennu din loon timm, ki din sikin u Bija tingbouŋ na ni ki u tan gaar ti paak ki kpo, ki teen ti marouŋ ŋɔɔ Yennu boor ni, a tin fit la nyikinchab ti biit paak na.

¹¹ N walonkai, Yennu nba loont biaŋinba na, li kpaa talas ki tii munii loon ti leeb nna.

¹² Sɔɔ kaa ki mi la Yennu nan u ninbina, ŋaan ti-i loon ti leebie, Yennu sii yɔɔ be ti ni, ki ti sii mɔk loomm nba ki u teent na nan barmɔniie.

¹³ Ŋɔɔe bia sikin u Seyeeŋ ki turit, ki ŋanne te ki ti bann nan ti gaa u paak, ki u mun bia be ti ni.

¹⁴ Ki linba pukin biak, ti din laat u Bija, ki mɔtana ti mɔɔntir nan u Baa Yennu din sikinɔ tingbouŋ na ni, a wuu tee tingbouŋ na ŋaateeb Tinntɔɔ.

¹⁵ Wunba yaa a u teen yada nan Yisa tee Yennu Bija, ŋɔɔe ki Yennu be u ni, ki u mun bia gaa Yennu paak.

¹⁶ Ki ti mɔŋ mɔŋ mun bann Yennu nba loonit biaŋinba, ki bia teen yada nan u set loonit. Yennu tee loomm, ki daanɔ nba yɔɔ mɔk loomm nna, ŋɔɔe gaa Yennu paak, ki Yennu mun bia be u ni.

¹⁷ Ki bia jenna, li-i tee ki ti waa loomm sɔnu nan barmɔnii, Yennu barbuut daar-i taŋŋi baar, ti kii mɔk jijeeti, kimaan Yisa binbeŋ nba tee biaŋinba na, ti binbeŋ mun tee nnee tingbouŋ na ni.

¹⁸ Ti-i mɔk loomm, jijeet sii kaa. Li-i tee ki loomm mantik be nan mɔnii mɔnii, jijeet kan la yaak kii be ti ni, kimaan tubdatu paake ki ti tuu jee. Li-i tee ki nirɔ jee jijeeti, u ki mɔk loomm nan barmɔnii.

¹⁹ Yennue sint loonit; ŋanne teen ki ti mun mɔk loomm.

²⁰ Daanɔ nba yaa a u loon Yennu, ŋaan bia nân u naa bik, u tee faak daanɔe. Li-i tee ki u ki loon u naa bik nba ki u laatɔ nan u ninbina, nlee ki u sii fit loon Yennu nba ki u ki laatɔ nan u ninbina?

²¹ Ki Yisa din senn sennu ki yet a wunba loon Yennu, see ki wuu biakii loon u naa bik mun.