1 Jɔɔnn 3 - Yennu Gbounpaauŋ Mɔɔr

Timm Yennu waas

¹ Lek gotir man loonbooru nba ki ti Baa Yennu mantik loont na. U loomm maŋ mantik ji sa yabite, ki u jiit ki teenit u waas, ki ti set mun tee u waase. Ŋaan tingbouŋ na ŋaateeb ki mi ta tee niboorsiab nba, kimaan bi ki mi Yennu.

² N walonkai, mɔtana ti tee Yennu waase, ŋaan li lek daa ki wann yent nan ta tan sii be biaŋinba. Ŋaan ta daa mi linbae na, a Yisa-i taŋŋi jeni, ti tan sa la wa set tee biaŋinba, ki li paak, ti tan sa kpint ki naan nan ŋɔɔ nee.

³ Ki bia jenna, binba kur daan u jenu po maŋ, ŋamme dia bi mɔŋ fanu, kaman nan wa be fanu biaŋinba na.

⁴ Binba kur tuun biit, ŋamme biir Yennu sennu, kimaan toonbiit tumu biir Yennu sennue.

⁵ I mi nan Yisa Masia din sik baar tingbouŋ na ni a wun nyinn niib biite; ki biit kaa u ni.

⁶ Ki wunba kur gaa u paak, u ki tuun biiti. Ŋaan wunba tuun biit, u daa ki bann Yisa nba tee wunba, ki bia ki miu.

⁷ N waas, i daa saak ki sɔɔ-n kpanniini; daanɔ nba tuun popeenn toona, ŋɔɔe tee popeendaanɔ, kaman nan Yisa nba tee popeendaanɔ na.

⁸ Sintaanii poŋ tee biitdaanɔe piinu niwa nan mɔtana, ki daanɔ nba tuun biit, ŋɔɔe tee Sintaanii yɔɔ. Ŋaan ki Yennu Bija Yisa sik baar a wun biir Sintaanii toona.

⁹ Binba kur tee Yennu waas nyii bi Baa Yennue, ki ki tuun biiti. Bi ki fit tuun biiti, kimaan ba gaar bi Baa Yennu binbeŋ na paak.

¹⁰ Ŋaan binba kur ki tuun popeenn toona, bi ki tee Yennu waas kaa. Ki bia jenna, binba kur mun bia ki loon bi naa waasi, bi bia ki tee Yennu waas kaa. Ŋannii want binba tee Yennu waas nan binba tee Sintaanii waas.

Ta sii loon ti leeb biaŋinba

¹¹ Ya din dɔŋ gbat Yisa maan nba pinpiik ni na tee nnee: a tii loon ti leeb man.

¹² Li ki ŋan ki tii be kaman nan Keenn nba din be biaŋinba na; ŋɔɔ din tee bonbiiuk daanɔ Sintaanii yɔɔe, ki din kpii u waarɔ. Bee paake te ki u din kpiiu? U din la u waarɔ tuun toonŋana, ŋaan ki u yar bi.

¹³ Tɔn, n naa waas, li-i tee ki tingbouŋ na ŋaateeb nami, i daa te ki li teei bakitnauŋu.

¹⁴ Ta loon ti naa walees na, ŋannii want nan ti nyii kuun paŋ ni, ki be manfoor nba kaa gbennu ni. Ŋaan daanɔ nba ki mɔk li loonbooru, ŋɔɔ ŋarin biar be kuun paŋ nie.

¹⁵ Ki bia jenna, wunba mun nân u naa bik, u tee nikpiiruko; ki i mi nan manfoor nba kaa gbennu kaa nikpiiruk ni.

¹⁶ Gotir man, Yisa nba din gaar ti paak ki kpo nee wantit loomm nba tee biaŋinba; ki li mun kpaa talase ki tii nyint ti manfoa ti naa waas paak.

¹⁷ Daanɔ nba mɔk linba jaŋitɔ, ŋaan la ki u naa bik kɔŋ siar, ki u baka kaa u ni, Yennu loomm kaa daanɔ maŋ ni.

¹⁸ N waas, ti loomm maŋ daa be ti mɔi ni kuukɔɔ kaa; see ki lii tee barmɔnii loomm nba sommit niibe.

Biaŋinba ki ti sii mɔk parcheenn Yennu boor

¹⁹ Li-i tee ki ti tuun nna, ŋanne ki ti sa bann nan ti waa barmɔnii wannu, ki bia sii mɔk parcheenn Yennu boor.

²⁰ Li-i tee ki ti dudukit wannit nan ti mɔk biit, ŋaant man ki ti tiar nan Yennu chee ti dudukit ki bia mi barii kura.

²¹ Tɔn, n walonkai, ti dudukit-i kii wannit nan ti tun bonkpetiri, ŋann ti mɔk parcheenn Yennu boor.

²² Ki bia jenna, ti-i dia u sennii ki tuun linba pent u parie, ŋannii sa te ki u teent linba ki ti meiɔ na.

²³ Ki nee tee u sennu maŋ, a ti teen u Bija Yisa Masia yada kii loon ti leeb kaman nan wa din sennit sennu biaŋinba na.

²⁴ Binba kur dia u sennii maŋ, ŋamme gaa u paak, ki u mun bia be bi ni. Ŋannii teen ki ti bann nan u yɔɔ be ti ni, kimaan u Seyeeŋ be ti ni.