1 Jɔɔnn 2 - Yennu Gbounpaauŋ Mɔɔr

Yisa Masia nba tee ti Sindantinnɔ na po

¹ N waas, n ki loon ki yii tuun toonbiiti. Li paake te ki n sɔbin ki teeni na, ŋaan li-i tee ki sɔɔ tun toonbiit, ti mɔk sindantinnɔ ti Baa Yennu boor ni, ki ŋɔɔe tee Yisa Masia, wunba tee popeendaanɔ na.

² Ki wa din sik ki tan gaar ti paak ki kpo na, ŋɔɔe ji teen ti marouŋ Yennu boor ni ti toonbiit paak; ki u marouŋ maŋ, li ki tee timm Masiaweira kuukɔɔ toonbiit paak kaa, ŋaan li tee timm nan tingbouŋ na ŋaateeb kur toonbiit paake.

³ Ti-i dia Yennu sennii, ŋanne sa wann nan ti set miu,

⁴ ki li-i tee ki sɔɔ yet a “N miu,” ŋaan bia ki dia u sennii, li yɔɔ tee faak daanɔe, ki barmɔnii kaa u ni.

^5-6 Ki bia jenna, wunba dia u maan, ŋɔɔe set loon Yennu nan u yan kur. Ki bia jenna, daanɔ nba yaa a u gaa u paak, see ki u binbeŋ-ii tee kaman nan Yisa binbeŋ nba din tee biaŋinba na. Ŋanne ki u sa bann nan u gaa Yennu paak.

Loomm sennu po

⁷ N walonkai, ma sɔbin loomm sennu nba ki teeni na, li ki tee sennpaanu kaa, ŋaan li tee sennu nba ki i din dɔŋ gbia ki li yukir na poe, ki sennkper maŋe tee Yisa maan nba ki i din gbia na.

⁸ Ŋaan mɔtana li bia daa tee kaman nan sennpaann nee ki n sɔbin ki teeni, kimaan yoo kpintire, ki bunbɔnn yentir, ki niib nunii po piint yentir nan Yisa barŋanii. Sennu nee ki Yisa binbeŋ ni din want nan mɔnii, ki i binbeŋ ni mun bia want nnee.

⁹ Li-i tee ki wunba yaa a u nɔɔk ni mɔk yentu, ŋaan nân u naa bik, ŋann nna bunbɔnn lek daa be u ni;

¹⁰ ki daanɔ nba loon u naa bik, u nɔɔk ni mɔk yentue, ki li paak, siar kaa u ni ki sa te ki wun tun biiti.

¹¹ Ŋaan wunba nân u naa bik, bunbɔnn be u ni, ki u benu ni mun bia bɔne, ki bunbɔnn maŋ dɔkin u numm po, ki u ki laat wa saa siaminba po.

¹² N waas, Yennu nyik chabi i biita, kimaan Yisa Masia sann ni; li paake te ki n sɔbin ki teeni na.

¹³ N chanbaanba, i mi Yisa nba poŋ din yɔɔ be mɔkmɔk nan mɔkmɔk na; li paake te ki n sɔbin ki teeni na. Naasimm, i nyann Sintaanii, bonbiiuk daanɔ nawa; li paake te ki n sɔbin ki teeni na.

¹⁴ N waas, ya mi ti Baa Yennu na, li paake te ki n sɔbin ki teeni na. N chanbaanba, ya mi Yisa nba poŋ din yɔɔ be mɔkmɔk nan mɔkmɔk na, li paake te ki n sɔbin ki teeni na. Naasimm, ya mɔk paŋ, ki Yennu mɔmaan bia be i ni, ki i nyann Sintaanii, bonbiiuk daanɔ maŋ na, li paake te ki n sɔbin ki teeni na.

¹⁵ I daa loon tingbouŋ na ŋaateeb sɔnu. I bia daa loon tingbouŋ na bona. Li-i tee ki daansɔɔ nba loon tingbouŋ na ŋaateeb sɔnii, u ki loon ti Baa Yennu.

¹⁶ Niib mɔk niauŋ nan bin tun bi mɔŋ loomm, ki bia nian bona nba ki bi laat na paak, ki bia mɔk parbifaant, ŋaan linba na kur lek tee tingbouŋ na ŋaateeb niauŋo; li ki nyii ti Baa Yennu boor ni kaa.

¹⁷ Tingbouŋ na tan sa gbenn, ki tingbouŋ na ŋaateeb niauŋ na mun bia sa gbenn, ŋaan wunba tuun Yennu yanbɔɔtoona, ŋɔɔe tan sii be mɔkmɔk nan yoo nba kaa gbennu.

Yisa Masia datai po

¹⁸ N waas, dunia gbennu yoo baat. I poŋ mi gbat a Masia datasɔɔ sa baar; ki mɔtana, Masia datasiab bonchiann poŋ baar na, ki ŋanne te ki ti set bann nan dunia gbennu yoo baat.

¹⁹ Masia datai maŋe nyii ti ni; ŋaan bi ki tee ti yabi. Bi-i bo-i tee ti yabie, timm nan ŋammii bo sii lakin be; ŋaan bi nyikita, ki li want nan bi kur ki tee ti yab setik nan mɔnii.

²⁰ Yisa Masia, popeendaanɔ nee, sikin u Seyeeŋ i paak, ki u te ki i kur mi wannu nba took.

²¹ Tɔn, li ki tee a i ki mi wannu nba took kaa te ki n sɔbin ki teeni na, ŋaan li tee ya poŋ mi wannu maŋ na paak, ki bia mun mi nan faak wannu fɔk nan barmɔnii wannu.

²² Ki ŋmee tee faak daanɔ? Li tee wunba yaa a Yisa ki tee Yennu Niganntɔɔ Masia wunba ki u din tumɔ tingbouŋ na ni nae. Ŋɔɔe tee Yisa dataak maŋ, ki yêen ti Baa Yennu nan u Bija Yisa mun biak.

²³ Daanɔ nba yêen Yennu Bija Yisa, ti Baa Yennu ki be nanɔ, ŋaan wunba piak ki yeen a u teen yada nan Yisa tee Yennu Bijae, ti Baa Yennu be nanɔ.

²⁴ Ya din sint gbat Yisa maan nba pinpiik ni na, yii dia nna man fanu. Li-i tee ki i dia maan maŋ, i sii gaa ti Baa Yennu nan u Bija Yisa paake,

²⁵ ki mɔsonn nba ki u senn ki turit na tee a u sa turit manfoor nba kaa gbennu na.

²⁶ N sɔbin linba na ki teeni ki chekinti ki jikit saa niib nba yaa bin kpanni na poe;

²⁷ ŋaan yimm ŋarin, Yisa sikin u Seyeeŋ maŋ i paaka. Seyeeŋ maŋ nba biar be i ni na, i ji kii loon ki sɔɔ-n wanniini, kimaan Seyeeŋ maŋ mɔŋe wanti bont kura, ki u wannu maŋe tee barmɔnii wannu, ki li ki tee faak wannu kaa. Li paak, yii gaa Yisa paak man kaman nan Seyeeŋ maŋ nba wanti biaŋinba na.

²⁸ Tɔn, n waas, yii gaa Yisa paak man. Li-i tee ki i yɔɔ gaa u paakie, ti sii mɔk parcheenn, ki ti kan di fei u boor yoo nba ki u tan sa jen na.

²⁹ I mi nan Yisa Masia tee popeendaanɔe; li paake, ki i mun bann nan binba kur tuun popeenn toona, bi mun tee Yennu waase.