1 Jɔɔnn 1 - Yennu Gbounpaauŋ Mɔɔr

Yennu Mɔb nba tee Yisa Masia na po

¹ N sɔbin gbouŋ na ki teeni a n wanni wunba ki bi yiu Yennu Mɔb nba teen niib manfoa na poe. Yoo nba ki dunia din tan piint namu na, ŋaan sɔɔ ki Mɔb maŋ poŋ bee. Mɔmaan maŋ nba din sik tingbouŋ na ni yoonba, ki ti gbiintir u pinpauk, ki bia laatɔ nan ti ninbina ki goriiɔ, ki ti nii bia siitɔ,

² ki u din fiit ki ti set lau, ki mɔɔntir li siara ki teeni ki jikit saa manfoor nba kaa gbennu po. Manfoor maŋe din be ti Baa Yennu peŋ, ki ti Baa maŋ jiiu ki fiitɔ ki wannit.

³ Linba ki ti la ki bia gbate, ki ti mɔɔntir ki teeni na, a yin fit lian taan nant mɔtaauk ni. Barmɔniie setik, ti mɔtaauk ni, ti taant nan ti Baa Yennu nan u Bija Yisa Masia,

⁴ ki ti loon ki ti kur-n ŋamm la parpeenn bonchiann. Li paake teen ki n sɔbin teeni na.

Yentu po

⁵ Tɔn, barii nba ki ti din gbat ŋɔɔ Yisa Masia boor ni ki mɔɔntir ki teeni na, li tee nnee: Yennu tee yentue, ki bunbɔnn kaa u ni.

⁶ Ki ti-i yaa a timm nan Yennu mɔk mɔtaauk nan leeb, ŋaan ki bunbɔnn be ti ni, ŋann ti fa faake ti mɔi ni, ki ti toona nee set want nan ti fa faak.

⁷ Ŋaan li-i tee ki ti waa yentu sɔnu yoo kur, kaman nan Yennu nba be yentu ni biaŋinba na, ŋann ti mɔk mɔtaauk nan ti leeb, ki u Bija Yisa sɔme yentir ti para ni biit kur.

⁸ Tɔn, ti-i yaa a ti ki mɔk biitie, ŋann ti kpann ti mɔŋe, ki barmɔnii kaa ti ni.

⁹ Ŋaan ti-i yɔɔ nyint ti toonbiit ki teen Yennu, tii mi nan u sii nyikit chabit ti toonbiit, ki bia yentir ti para ni biit kur, kimaan u tee barmɔnii daanɔ ki bia tee popeendaanɔ.

¹⁰ Ti-i yaa a ti ki tuun toonbiitie, ŋann nna ti teenɔ faak daanɔe na, ki u maan maŋ kaa ti ni.