Yuda 1 - Baibuli I Leb Kumam 2013

Amot

¹ Baluwa kowok kibut Yuda ngatic ka Yesu Kirisito, kame obedo omin me Yakobo. But jo kame kolwongo, jo kame tie i amara ka Rubanga Papa, jo kame kotie gwoko di kodaro kede Yesu Kirisito.

² Okwao cuny me kisa, mulem, kede amara nyai ne wu.

Jopwony me Angalo

³ Jo na kame amaro, bala kame atie kede mit adwong me wandiko ne wu kop i kom alako kame wan onywakunu, omio aneno be emitere pi ango wandiko ne wu baluwa kame supo cunyu pi yi pi yei kame Rubanga omio jo mege tien acel atwal.

⁴ Pien jo mogo otieko lwidar odonyo i diere wu, jo kame bin kotieko iiko sek pi ngolo ne gi kop noni bala jo kame dagi woro Rubanga, gin jo kame dwadwanyo kop me kisa ka Rubanga pi gin timo tim me caro. Gin kidagi Ngadwong wa acel kenekene kame obedo Rwot wa, en Yesu Kirisito.

⁵ Nan amito medo niango wu, bed bala oudo kotieko niango wu iye kiber, be, Rwot ngat kame bin olako jo ki piny me Misiri tien acel atwal, bin i cen mere eko neko jo kalikame oyei.

⁶ Doko imalaikan kame bin okalamo wang loc gi, di kiko weko kabedo gi, Rubanga otweo gi kede irikoi pi ikar kede ikar kakacol cucucuc, pi kuro Ceng adwong kame kobino ngolo iye kop.

⁷ Iepone nono da, bala bin imalaikan nogo, Sodoma kede Gomora karacel kede bomban koluko gi, kame bin odonyo gida i tim me caro kede i mit kalikame upere kede anywali ka dano, oko udo alola me mac kalikame to di kiko doko anyut me anena.

⁸ Doko iepone acel nono da, jo nogi udo lek mogo kame mio gi kitimo tim me emuna i kom gi ken gi, kede dagi akarunikin ka Rubanga, kede waco kope areco i kom wegi deyo kame tie i malo.

⁹ Do kakame Emikairi malaika adwong opiemo kede Sitani pi kom Musa, Emikairi likame oko mito ngolo ne Sitani kop di eyamo ne kope areco, do en ewaco ne be, “Rwot bunano in!”

¹⁰ Do jogi tie kede anywar i gi dedede kalikame gin kiniang, di gikame gin kitimo pi ekite me cwec gi, bala leini gi kalikame tamo, ko kelo ne gi to.

¹¹ Kitie i can tin benyo! Pien kilubo ekite me kuo ka Kain, doko gin kidonyo i tim me angalo bala Balaam pi mito bedo kede ud, di kiko to bala bin Kora pi tim me jemo.

¹² Gin kitie bala kakocukukao i ibagai wu me amara, di kicamo kede wu ibagai abongo lworo, kede di kilelemo abongo lewic. Gin kiparo pirgi kenekene; kical bala idoun kame yamo tero do di likame kicwei; kical bala yen kame li kede anyakini i atiekini me kare me oro, yen kame koputo aliasin gi; pi mano gin kitieko to tien are.

¹³ Kical bala ebuka ager me nam, kinyuto lewic gi kakaler bala buo. Gin kical bala acer kame rimo, kame Rubanga otieko iiko ne gi kabedo me nakanaka kakacol cucucuc.

¹⁴ Enoka, ngat kame obedo akwar me kanyaare cako kibut Adamu, oko mino ikwenyar di ewaco be, “Nenunu, Rwot tie bino kede imalaikan mege kacil tutumian kede tutumian,

¹⁵ pi ngolo kop ne jo dedede, kede pi ngolo rac i wi jo dedede pi tim dedede me dagi woro Rubanga, kame gin kitimo iepone nono kalikame nyuto wor but Rubanga, kede pi kop dedede me gero kame jodubo kalikame woro Rubanga oyamo i kome.”

¹⁶ Gin kibedo joingungur kame mito turo raco i wi jo apat; gin jo kame paro pi mit gi kenekene; jo kame bwoto kop kede ewaka, jo kame waco ne jo kope me abe kame winyo mit pi mito udo bero moro kibut gi.

Ikwenyar kede Pwony

¹⁷ Do wun jo na kame amaro, miero iyutununu gikame bin joor ka Rwot wa Yesu Kirisito oudo ogeo waco sek.

¹⁸ Gin bin kiwaco ne wu be, “I kare me ajikini jo acae bino bino, di kilubo mit gi kalikame nyuto wor but Rubanga.”

¹⁹ Jo nogi kame lubo mit me kom, jo kalikame Tipo telo, en kame tie kelo apokapoka.

²⁰ Do wun, jo na kame amaro, meedenu kede dongo di icungunu i yei wu kacil. Legunu kede twer me Tipo Kacil.

²¹ Meedenu maro Rubanga; bedunu di idarunu cuny me kisa ka Rwot wa Yesu Kirisito kame mio wu i udunu kuo kame bedo nakanaka.

²² Bedunu kede kisa but jo kame cuny gi gung;

²³ warasonu jo icegun tenge ki mac di ikounu lako gi; bedunu kede cuny me kisa but jo apat do di itimunu kamanono kede lworo, di idagunu kiton igoen kame kom gi opwoko.

Ilega me Pak

²⁴ But Rubanga ngat kame karuno gwoki kur ipoti ki yei ni, doko etwero mini icungo abongo raco moro di itie kede kilel i nyim kom me deyo mere,

²⁵ but Rubanga acel kenekene, ngat kobedo Ngalak wa, deyo bed bute, kede dwongo, kede twer, kede akarunikin pi Yesu Kirisito Rwot wa, bala lem sek, nataman kede ikar kede ikar! Amen.