Yosua 14 - Baibuli I Leb Kumam 2013

Poko Lobo atie i Bad tetu Tim me Yorodan

¹ Kop kame lubo noni mako kite kame bin kopoko ne kede jo me Isirael lobo me Kanan kame oudo tie i bad tetu tim me Yorodan. Eleasar ngasaseredoti, Yosua wot ka Nun, kede jotel me miere me ikekon me Isirael en kopopoko lobo nono negi.

² Gin kiuco alulu me poko lobo nono ne jo me ikekon me Isirael kanyangon kede dul, bala kame oudo Rwot ociko ne Musa.

³ Musa oudo otieko mino lobo me bad tetu kide me Yorodan but jo me ikekon are kede dul;

⁴ jo me ot ka Yosepu oudo opokere i ikekon are, ekeko ka Manase kede me ka Epuraimu. Musa oudo likame opoko ne Jolebi lobo moro pi bedo mergi, kwanyo kenekene bomban kame komio gi pi bedo iye, kede kabedere me kwano doke gi, romini kede diegi.

⁵ Jo me Isirael oko popoko lobo me Kanan bala kame oudo Rwot ociko ne Musa.

Komio Kaleb Bomba me Keburon

⁶ Ceng moro acel di jo me Isirael oudo pwodi tie Giligal, jo mogo me ekeko ka Yuda oko ot but Yosua. Ngat acel kikom gi kame oudo nyinge Kaleb wot ka Jepune me ot ka Kenisi oko waco ne Yosua be, “In ingeo kop kame Rwot owaco ne Musa dano ka Rubanga i Kades Barenea i komi kede ango.

⁷ I kare kame Musa ngatic ka Rubanga bin ocwa kede yai ki Kades Barenea pi bino ngingico lobo noni, mwaka nango me dongo oudo oromo ot ongwon. Ango bin ako dwoko bute kop me ateni me gikame oudo wan aneno.

⁸ Jo kame bin ango aupere kede gi pi ot ngingico lobo nono oko dubo cuny jo kede lworo; do ango ako lubo kop ka Rwot Rubanga na kede cunya lung.

⁹ Pi mano, Musa oko kwongere buta cenge nono di ewaco be, ‘Ateteni lobo kame tieni onyono nono bino doko meri kede idwe ni atwal, pien itieko lubo kop ka Rwot Rubanga na kede cunyi lung.’

¹⁰ Aso, neningo nataman Rwot otieko gwoka atie akuo bala kame en oudo ewaco. Cako i kare kame Rwot bin owaco kede kop noni but Musa di jo me Isirael tie beo i wi tim, nan do mwakini oromo ot ongwon kiwie kany. Ango ine do nan mwakini na me dongo otieko romo ot kanyauni kiwie kany.

¹¹ Ango tin pwodi atie atek bala kite kame oudo atie kede i kare kame bin Musa ocwa kede. Ango pwodi atek akaruno ot i yi arabo timo gimoroni kenekene.

¹² Aso, in mia lobo kobedo mori mori noni kame bin Rwot ocikere iye buta i ceng kame wan odwoko kede kop. Ida cenge nono iwinyo di wan oudo owaco be jo Anak tie kunono, doko bomban gi dongodongo di kocelo gi kede apama atek. Cengemogo Rwot bino konya di ango ako riamo gin tenge bala kame en oudo ewaco.”

¹³ Di do Yosua oko lamo ne Kaleb wot ka Jepune winyo di eko mine bomba me Keburon pi doko mere.

¹⁴ Aso, Keburon oko doko me ka Kaleb wot ka Jepune dano me ot ka Kenisi atwal, piento en oudo elubo kop ka Rwot Rubanga me jo me Isirael kede cunye lung.

¹⁵ Sek ber oudo kolwongo Keburon be bomba me Kiriat Araba. (Araba oudo obedo nying icuo kame oudo tek kalamo kikom jo Anakim.) Di do anapakin oko bedo tie i lobo nono.