Yokana 15 - Baibuli I Leb Kumam 2013

Yesu en Olok me Ateni

¹ “Ango en olok me ateni, doko Papa na en kame ngapur.

² Ajange dedede kame tie i koma di likame kinyako anyakini, en elwero gi tenge; ajange dedede kame tie di kinyako anyakini, en etemuno gi, tetekeny kinyak nyige atot kalamo.

³ Kope kame ango awaco ne wu otieko lonyo wu.

⁴ Dongunu i ango, ada ako dong i wun. Bala kite kame ajange likame twero nyako kede anyakini en kene, kwanyo ka edong i kom olok, kamanono da, wuda likame itwerunu nyako anyakini wun kenu, kwanyo ka idongunu i ango.

⁵ “Ango en olok; wun en ajange mege. Ngat kame dong i ango di ada ako dong i en, ngat nono en kame bino nyako anyakini atot. Pien likame itwerunu timo gimoro abongo ango.

⁶ Ka dano moro likame odong i ango, kouce bala ajange di eko tuo; di oko coko ajange nogo oko uco gi i mac kiko wang.

⁷ Ka idongunu i ango, di kop na da oko dong i wun, ibinunu kwano gikame imitunu di ikounu udo.

⁸ Papa udo deyo ka wun inyakunu anyakini atot di ikounu doko josiao na.

⁹ Bala kite kame Papa omara kede, kamanono ada amaro wu; dongunu i amara na.

¹⁰ Ka igwokunu cik na, ibinunu dong i amara na, bala kite kame ada agwoko kede cik ka Papa na di ako dong i amara mere.

¹¹ “Ango awaco ne wu gi nogi tetekeny kilel na bed i wun, kede tetekeny ibedunu kede kilel kame romo.

¹² Cik na en ine be, marerenu kenu kenu bala kite kame ango amaro wu kede.

¹³ Likame tie amara kame dano moro tie kede kame dwong kalamo man, kame dano yei jalo kede kuo mere pi jowote.

¹⁴ Ka itimunu gikame aciko wu iye, udo wun jowota.

¹⁵ Likame abino bobo lwongo wu be ipasoi, pien epasoit likame ngeo gikame ngadwong mere tie timo; do ango atie lwongo wu be jowota, pien amio wu ingeunu gi dedede kame ango awinyo kibut Papa na.

¹⁶ Wun likame iyeranu, do ango ayero wu ako cwano wu be poore iotunu di ikounu nyako anyakini, doko da be, anyakini wu poore bedo nakanaka, tetekeny Papa mi wu gimoroni kame ikwaenu i nyinga.

¹⁷ Gikame ango aciko wu iye en ine be, marerenu kenu kenu.

Adagadaga me Piny

¹⁸ “Ka piny odagi wu, ngeunu be egeo kong dagi ango di pwodi likame edagi wun.

¹⁹ Ka koto di oudo wun ibedunu jo me piny, koto piny omaro wu bala jo mege, do pien wun likame ibedunu jo me piny, do ango ayero wu ki piny, manono en komio piny ni dagi wu.

²⁰ Yutununu kop kame oudo awaco ne wu be, ‘Epasoit likame pire dwong kalamo ngadwong mere.’ Ka kitidilo ango, kibino tidilo wuda; ka kiwinyo kop na, kibino winyo kop wuda.

²¹ Do kibino timo ne wu gi nogi dedede pi ango, pien likame gin kingeo ngat kame oora.

²² Koto oudo likame ango abino ako yamo kede gi, koto ki li kede dub, doko nan ki li kede kagengere me pido pi dub gi.

²³ Ngat kame daga, udo edagi Papa na da.

²⁴ Koto oudo likame ango atimo i diere gi tice kalikame tie ngatamoro kotimo, koto oudo ki li kede dub; do nan kitieko neno gikame ango atimo, doko kiko daga karacel kede Papa na.

²⁵ Man otimere pi mino cobere kakare kop kame kowandiko i Iswil gin be, ‘Gin kidaga abongo tien kop moro.’

²⁶ “Do ka Ngakony obino, kame ango abino cwano ne wu kibut Papa, en Tipo me ateni ka Rubanga, kame wok kibut Papa, en ebino jurao ango.

²⁷ Doko wuda ijurak na, pien wun oudo itienu keda cako ki agege.