Yobu 12 - Baibuli I Leb Kumam 2013

Kop kame Yobu Odwoko

¹ Yobu oko dwoko be,

² “Ateteni wun ibedunu dwan jo, ka itounu udo itounu kede rieko.

³ Do ada atie kede ngec arom aroma kede meru; wun likame iloanu. Iparunu be tie ngatamoro akwia gikame wun iwacunu nogi?

⁴ Ango do atieko doko gi me anyera but jowota; ango ngat kame bin alwongo Rubanga di en eko gamo doga, ango ngat kopoore doko ali kede raco moro, adoko do gi me anyera.

⁵ Jo ali kede peko cao jo atie i can, kimedo peko ne jo kame tie neno can cuto.

⁶ Do miere me joyak tie i mulem, doko da jo awango cuny Rubanga bedo abongo lworo moro, gin jo kame rubanga gi obedo teko gi.

⁷ “Do ber peny leini, di gin kiko bino pwonyo wu; peny winy me wi yamo, di gin kiko bino waco ne wu;

⁸ peny yen me wi lobo, di gin kiko bino pwonyo wu; doko da peny aporogo me nam, di gin kiko bino tuco ne wu.

⁹ Ngai kikom gin dedede kalikame ngeo be Rwot en kotimo manoni?

¹⁰ Kuo me gi akuo dedede tie i cinge, doko da wei me dano tie i cinge.

¹¹ Mam yit dano ngeo poko kope adonyo iye, bala kame leb dano da ngeo bilo kede cam?

¹² “Rieko lubere kede cato me dano, doko da niang lubere kede ceng me kuo ka dano.

¹³ Rubanga tie kede rieko kede teko; en etie kede tam kede ngec atut.

¹⁴ Ka en etuturo, likame tie ngatamoro atwero gero bobo; ka en ecego dano i ot, likame tie ngat atwero yabe.

¹⁵ Ka en egengo kot, piny tuo; ka en ecwao kot, pii lamar i wi lobo.

¹⁶ “Rubanga tie kede teko kede rieko; joangalo kede jo kame kingalo dedede tie i twer meren.

¹⁷ En etero tenge jo kamio tam di etieko kwanyo rieko gi, di eko mino jopug doko bala jomingo.

¹⁸ En egonyo ausi kame abakai ngapo pi nyuto twer gi, di eko lunyo rwano i pier gi igoen me ipasoi.

¹⁹ En etero josaseredoti tenge di etieko kwanyo rieko gi, doko da eko mano twer me jopug atek.

²⁰ En etwero tieko kop me ayama ki dog jo kame kogeno, di eko kwanyo rieko me poko bero kede raco kibut joadongo.

²¹ En etwero kelo acae i kom jopug, doko ekwanyo teko me jo atek.

²² En enyuto mung kopwono kakacol, doko emio kakacol cucucuc doko kakaler.

²³ En etwero mino atekerin doko tek, di eko muducaro gi; etwero mino atekerin nyai, di eko sasaro gi.

²⁴ En etwero kwanyo rieko kibut jotel me wi lobo, di wi gi ko totolun bala jo atie mono yongayo i wi tim.

²⁵ Gin kirarapo piny i kakacol cucucuc di kigete bala jo omer.