Yai 38 - Baibuli I Leb Kumam 2013

Timo Alutari me Wango Giayala

¹ Basalel oko timo alutari me wango giayala kede ebao me yat akasia; boro kede laco mere oudo rorom; boro mere oudo tie puti kanyaare kede dul, laco mere da kamanono, kede boro mere malo oudo tie puti ongwon kede dul.

² Eko timo ne iswonge i isondana mege ongwon dedede, di iswonge nogo tie kicel kede alutari, di eko puno alutari lung kede nyonyo buronsi.

³ En etimo da jamini dedede kame kotimo kede tic me alutari, agune, gi me kikiso wi alutari, kalayan, ilumai, kede itatany. En eko timo jamini nogi dedede kede nyonyo buronsi.

⁴ Eko timo kekei me alutari kede nyonyo buronsi di eko kete i alutari i dierediere me wie malo kede dude piny.

⁵ Di eko timo alung ongwon eko keto gi i isondana ongwon me kekei nono pi bedo me rwako atekai;

⁶ en eko timo atekai me yat akasia, di eko puno gi kede nyonyo buronsi.

⁷ Di en eko rwako gi i wang alung kame tie i nget alutari pi bedo me yene. Alutari nono oudo kotime kede ibaon di yie twolo.

Timo Kalaya me Nyonyo Buronsi

⁸ En eko timo kalaya me nyonyo buronsi karacel kede gicibe; etime kede ilaburan me nyonyo buronsi me mon kame oudo timo tic i dog ekeko me Eema me ariamakin kede Rwot.

Timo Cel me Diakal me Taberenakol

⁹ En eko timo cel me diakal me Taberenakol kede isukan ameny. I bad tetu piny boro me isukan oudo tie puti tol acel kede ot kany;

¹⁰ ipirin gi me nyonyo buronsi oudo tie ot are kede agangeta gi da ot are me nyonyo buronsi. Do akodeta kame oudo tie i kom ipirin, kede atad gi oudo kotimo kede nyonyo siliba.

¹¹ En eko timo cel nono i bad me tetu malo da kamanono.

¹² I bad tetu tim boro me isukan oudo tie puti ot kanyaare kiwie kany; ipirin oudo tie iye tomon kede agangeta tomon; akodeta kame oudo tie i kom ipirin kede atad gi oudo kotimo kede nyonyo siliba.

¹³ I bad tetu kide, kakame oudo erute tie iye, laco me cel oudo tie puti ot kanyaare kiwie kany.

^14-15 I nget erute tuni tuni oudo tie iye isukan kame tie puti ot are kiwie are kede dul, ipirin adek kede agangeta adek.

¹⁶ Cel dedede oudo kotimo kede isukan me egoe ameny.

¹⁷ Agangeta me ipirin oudo kotimo kede nyonyo buronsi, do akodeta, atad, kede aum me wi ipirin oudo kotimo kede nyonyo siliba. Ipirin dedede me cel oudo kotweo kede atad me nyonyo siliba.

¹⁸ Esuka me galao dog erute me diakal oudo kotimo kede egoe ameny kame kotubuso kede ausin ebululu ebululu, akwakwar kede kame kwar mere. Boro mere aria oudo tie puti ot adek kede boro mere malo oudo tie puti kanyaare kede dul, bala isukan me cel.

¹⁹ Ipirin kame oliere iye oudo tie ongwon kede agangeta gi da ongwon kame kotimo kede nyonyo buronsi. Do akodeta me ipirin nogo, aum me wi gi, kede atad gi oudo kotimo kede nyonyo siliba.

²⁰ Loce me tweno Eema kede me cel dedede oudo kotimo kede nyonyo buronsi.

Jamini kame Kotio kede me Timo Taberenakol

²¹ Magi en jamini kame oko timo kede taberenakol, kakame oudo koketo iye kide abatal are kame oudo kowandiko cik tomon i kom gi. Musa en oudo ociko be wandiko gi di Jolebi en oko timo, di Itamar wot ka Aaron ngasaseredoti en kame telo gi.

²² Basalel wot ka Uri, akwar Kur, dano me ekeko ka Yuda, oko timo jamini dedede kame oudo Rwot ociko ne Musa.

²³ En oudo etimo tic karacel kede Okoliab wot ka Akisamak, me ekeko ka Dan, dano kame oudo tie kede apiranut me goro kidi, pwakuno timo jamini, kede timo igoen ameny kede tubuso gi kede ausin ebululu ebululu, akwakwar, kede kame kwar mere.

²⁴ Saabu dedede kame jo oudo omio but Rwot, kame oko timo kede tic me gero Kabedo Kacil, oudo tie kilo tutumia acel, di kopime kede gipim me Kabedo Kacil.

²⁵ Siliba kame jo kame oudo Komaro wel gi okwanyo oudo tie kilo tutumia adek kede tol ongwon ki ot adek (3,430) di kopime kede gipim me kabedo kacil.

²⁶ Manono en rom me siliba kame jo dedede kame oudo komaro wel gi oculo, di dano acelacel oudo culo wel kame komito, di lubere kede gipim me Kabedo Kacil. Jo kame oudo komaro wel gi oudo tie tutumia tol kanyape kede adek, kede tol kany kede ot kany (603,550), magonogi oudo obedo cuo me mwakini ot are ot malo.

²⁷ Siliba kilo tutumia adek kede tol ongwon (3,400) en kame oudo kotimo kede agangeta tol acel me Kabedo Kacil kede me isenge. Agang acelacel oudo kotimo kede kilo ot adek kiwie ongwon me siliba.

²⁸ Basalel oko tic kede kilo ot adek odong me timo atad, akodeta me ipirin, kede aum me wi gi.

²⁹ Nyonyo buronsi kame oudo jo omio but Rwot oudo tie kilo tutumia are kede tol ongwon kede ot are kiwie kany (2,425).

³⁰ Basalel oko tic kede me timo agangeta me erute me Eema me ariamakin kede Rwot, alutari me nyonyo buronsi karacel kede kekei mere me buronsi, jamini dedede kame kotio kede i alutari,

³¹ agangeta me cel kede me erute me diakal, loce dedede me tweno Eema kede me tweno cel me diakal.