Tice 20 - Baibuli I Leb Kumam 2013

Paulo Owelao Makedonia kede Akaya

¹ Ingei logologo jik, Paulo oko lwongo jo kame bin lubo Yesu di eko dino cuny gi kede kope mogo, eko moto gi di do en eko yai eoto Makedonia.

² Kakame etieko bebeo kede i adulion me kuno, di emio gi tekcuny, en eko do kato Guris,

³ eko bedo kuno pi dwete adek. Do kakame Iyudayan otimo kede iik me mito neke i kare kame oudo eyapuno yai kede pi ot Siria, en eko moko tam mere pi dok di ebeo ki Makedonia.

⁴ En bin eko upere kede Sopata me Beroa wot ka Puro, karacel kede Arisitaku kede Sekundo, kame oudo obedo jo me Tesalonika, kede Gayo me Derube, kede Temeseo, karacel kede Tukiko kede Toropimu, gin jo me Esia.

⁵ Jo nogi oko telo ne wa yongayo di kiko donyo daro wa ki Turoa.

⁶ Ingei ceng me ebaga me Mugati kame Arup li kiye, wan oko yai ki Pilipi, oko kwang pi ceng kany di do oko tuno but gi i Turoa, kakame wan oko bedo iye pi ceng kanyaare.

Ajikini me Paulo Welao Turoa

⁷ Ceng Sabiti di wan oudo ocokere karacel pi turo mugati me anywaka, Paulo oko yamo kede gi di oudo etie kede tam me yai oru mere; en eko meede kede yamo mere nono tuno i dier iwor.

⁸ Italan atot oudo tie liel i agola me malo kakame wan oudo ocokere iye.

⁹ Atin awobi moro kame nyinge Eutiko oudo tie bedo i dirisa kunono. Di Paulo oudo pwodi tie meede kede yamo mere, nino oko cako kwalo awobi nono, tuno kede di do en eko nino atwal, di eko bulucar epoto piny yai ki malo ki ot me adek me goropa; jo oko ot pi kwanye di kiko ude etieko to.

¹⁰ Do Paulo oko wok piny eko gungo bute, di eko gwake di ewaco be, “Kur ibedunu kede par, pien pwodi ekuo.”

¹¹ Paulo oko dok malo i goropa, eko turo mugati eko camo, di eko donyo yamo kede gi tuno piny ru, di do eko yai ot.

¹² Gin di do kiko tero awobi nono di ekuo, di cuny gi okwei adikinicel.

Paulo Oyai ki Turoa Eoto Miletu

¹³ Do wan oko cako ot anyim i emeri, di oko kwang ooto Asos, di oudo otie kede gen me kwanyo Paulo ki kuno, piento en oudo eiko kamanono pi en beno i ooko ki itela.

¹⁴ Kakame eriamo kede wa i Asos kuno, wan oko mine edonyo i emeri, di oko ot tuno Mitilene.

¹⁵ Kikano, oko kwang oyai ki kuno di oko tuno kakame pimere kede Kios ceng alubo mere. Oru mere oko tuno Samos; ceng alubo mere di do oko tuno Miletu.

¹⁶ Pien Paulo oudo omoko tam mere pi kwang naco Epeso, tetekeny kur eter kare alac Esia. Pien oudo etie susunyo ot Yerusalem, ka twerere wek koto ceng me Pentekoti ude kuno.

Yamo ka Paulo me Peruno Joadongo me Epeso

¹⁷ I kare kame Paulo oudo pwodi tie kede Miletu, en eko cwano kop Epeso, di elwongo joadongo me ekodet me jokirisito pi bino bute.

¹⁸ Kakame kituno kede bute, en eko waco ne gi be, “Wuda kikomu ingeunu epone kame ango abedo kede wu kare go dedede, cako i ceng kame ango atuno kede Esia.

¹⁹ Ango oudo atio ne Rwot kede mwolo adwong kede di akok akoka, doko di abeo i atama kame oudo opoto na pi kite kame Iyudayan oiko kede tam me neka.

²⁰ Doko da wun ingeunu ekite kalikame ango alworo tuco ne wu kede gi dedede kame romo konyo wu, di apwonyo wu obe i dier jo kede ot i ot.

²¹ Ango oudo apwonyo Iyudayan karacel kede Jogurik be miero gin kiswilaro i nyim Rubanga, doko di kiko yei Rwot wa Yesu Kirisito.

²² Doko nenunu, ango nan Tipo Kacil tie dina ot Yerusalem, do di likame angeo gikame bino timere na ki kuno.

²³ Kenekene gikame Tipo Kacil otieko kwenyaro ango iye i bomba acelacel en ine be, kobino rwaka i otkol kede mina neno can adwong adikinicel.

²⁴ Do ango likame atero kuo na bala gikame tie kede kony, arabo gikame pire dwong kibuta, kwanyo kenekene ka koto ango angetakino tic kame Rwot Yesu bin omia, me tuco ejiri me kisa ka Rubanga.

²⁵ “Doko nan nenunu, ango atieko ngeno be wun dedede jo kame ango abedo tuco ne wu kop me Ajakanut ka Rubanga, likame ibinunu neno wanga bobo.

²⁶ Pi mano, ango tin awaco ne wu be, remo wu likame bino dwogo i wia,

²⁷ pien ango likame bin alworo tuco ne wu gi dedede kame Rubanga oudo oiko pi timo.

²⁸ Gwokerenu kenu kede igwokunu romini ka Rubanga, kame Tipo Kacil oketo wu pi bedo jogwok gi, pi gwoko jo koyei Rubanga, jo kame en eloko odoko mege kede remo ka mere kikome.

²⁹ Ango angeo be ingei ango yai, ipeon ager oyaro bino i diere wu, gin likame kibino weko aweka romini ka Rubanga.

³⁰ Doko jo mogo bino wokun kibutu, kame bino yamo kop me angalo pi loko tam me jokirisito but gin.

³¹ Pi mano, bedunu di igwokerenu, di iyutununu be, ango atieko mwakini adek di acoro wu iceng kede iwor, di pige wanga cwer.

³² “Doko nan ango aweko wu i cing Rubanga, kede i kop me kisa mere, kop kame twero gero wu di eko mino iudunu kabedo i dier jo dedede kame Rubanga otieko lonyo.

³³ Ango bin likame angobelo siliba, saabu arabo igoen ka ngatamoro.

³⁴ Wuda kikomu ingeunu be cinga gi en kame omia audo jame kame oudo amito, karacel kede jo kame oudo bedo keda.

³⁵ Ango atieko nyuto ne wu i gi dedede be, miero itimunu tic kamanoni, me wek ikonyunu jo agoro, di iyutununu kop kame bin Rwot Yesu owaco be, ‘Mino tie kede winyo kalamo gamo.’ ”

³⁶ Ingei en waco kamano, Paulo oko riondiko piny, di eko lego kede gin dedede.

³⁷ Gin dedede kiko kok, di kiko donyo agwakugwakun kede Paulo di kinote.

³⁸ Gin oudo kitie kede cwercuny, twatwal mere pi kop kame Paulo oudo owaco be gin likame kibino medo neno wange bobo. Di do kiko nyamaro en i emeri.