Tice 1 - Baibuli I Leb Kumam 2013

¹ Adwong Teopilo, i itabu na me agege, ango awandiko kop kame mako gi dedede kame bin Yesu ocako timo, kede pwonyo,

² tuno i ceng kame kotere kede malo, ingei en ciko joor mege i twer me Tipo Kacil, joor mege kame oudo en eyero.

³ Ingei can kede to mere, en eko nyutere but gi i yote apapat kame moko be, en oudo ekuo ateteni, di epwonyo kop kame mako Ajakanut ka Rubanga.

⁴ I kare kame oudo pwodi etie kede gi karacel, en oudo eciko gi be miero kur kiyai ki Yerusalem, do kidar ki kuno gikame Papa ocikere pi mino. En ewaco ne gi be, “Wun bin iwinyunu kibuta be,

⁵ Yokana bin batiso jo kede pii, do di pwodi likame ceng atot okato, wun kobino batiso wu kede Tipo Kacil.”

Kotero Yesu i Malo

⁶ I kare kame joor oriamakin karacel kede Yesu, gin kiko penye be, “Rwot, mam kare noni en kame iyaro dwoko kede Ajakanut but jo me Isirael?”

⁷ Yesu oko waco ne gi be, “Likame tic wun obedo me ngeno ceng arabo kare kame Papa otieko moko kede akarunikin mere.

⁸ Do kame Tipo Kacil obino i komu, ibinunu udo twer di ikounu bino bedo ijurak na i Yerusalem kede i Yudea dedede, kede i Samaria da, tuno kede i ajikini me lobo.”

⁹ Ingei en yamo kope nogi, Rubanga oko tinge otere malo di gida kitie neno; di en eko rwenyo i edou.

¹⁰ Di pwodi oudo wang gi omoko ngino malo kakame en oudo etie ot kede, cuo mogo are oko cungo i nget gi di kingapo ikanson atar,

¹¹ di kiko waco ne gi be, “Wun cuo me Galilaya, pinyo komio itienu cungo di ingiunu malo? Yesu noni kame kokwanyo kibutu di oko tero malo, oyaro bobo dwogo iepone acel nono bala kite kame inenenu kede di eoto malo.”

Koyero Ngaluny wang Yuda

¹² Joor oko yai ki moru kame kolwongo be Olibeti, kame iyapiyapi kede Yerusalem, kame buco romo bala mairo acel, di kiko dok Yerusalem.

¹³ Kakame kituno kede i bomba, kiko ot donyo i agola me malo kakame oudo kibedo iye; gin oudo Petero, Yokana, Yakobo kede Anderia, Pilipo kede Tomasi, Batulumayo kede Matayo, Yakobo wot ka Alipayo, Simoni kame bin tie i ekodet me jo kalikame mito apugan me kare nono, karacel kede Yuda wot ka Yakobo.

¹⁴ Jogi dedede oko bedo kede cuny acel me ilega nakanaka, karacel kede mon kede Maria toto me Yesu kede imiegu mege da.

¹⁵ I ceng nogo, Petero oko cungo i nyim ekodet me jokirisito, kame oudo ocokere, wel gi oudo romo tol acel kede ot are; en eko waco ne gi be,

¹⁶ “Jowota, iwandik kacil oudo miero cobere kakare, kame bin Tipo Kacil owaco i dog Daudi i kom Yuda, ngat kame bin otelo jo pi ot mako Yesu.

¹⁷ Yuda oudo obedo ngat acel kikom wa; doko bin kopoko ne tic i epelu wa noni.”

¹⁸ (Icuo ni oko wilo poto kede sente kame bin kocule kede pi tim mere arac nono; en eko poto adule, di eko mwoc i diere, di jamini me yie oko bwote ooko dedede.

¹⁹ Jo kame bin bedo Yerusalem dedede oko ngeno kop noni, di kiko lwongo poto nono kede leb gi be Akeldama, kame dwong mere be, Poto me Remo.)

²⁰ “Pien kowandiko i Sabuli be, “‘Wek kabedo mere dong nono, doko kur ngatamoro bed iye da.’ “Doko kowandiko da be, “‘Poore ngatamoro luny tic mere me nganeno.’

²¹ “Pi mano, ngat acel kikom cuo kame lem obedo upere kede wa i kare dedede kame bin Rwot Yesu obedo wire kede i diere wa,

²² cako i kare me batisimu ka Yokana, tuno kede ceng kame kotere kede i malo kibut wa, miero do bed mujura karacel kede wa i kom yaruno ka Yesu.”

²³ Gin kiko kelo nying jo are: Yosepu kame oudo kolwongo be Barasaba, kame bin oudo nyinge me pene Yusito, en kede Matiya.

²⁴ Joor oko lego di kiwaco be, “Rwot, in en kame ingeo cuny jo dedede; nyut ne wa kikom jo are gi ngat kame in iyero

²⁵ pi lunyo wang tic kede or kame Yuda oweko, pi ot i kabedo mere.”

²⁶ Gin kiko uco alulu pirgi di alulu oko mako Matiya. Di do oko ribe i kom joor tomon kiwie acel noka.