Sabuli 55 - Baibuli I Leb Kumam 2013

Ilega me Dano kame Ngawote Orupao

¹ Cik yiti iwinyi ilega na, Okwe Rubanga; kur ipwoni iko dagi winyo kwac na.

² Winy kop na di iko gamo doga; atie kede cwercuny pi peko kame atie kede.

³ Yia orubere pi woo me jokwor na, pi icelakin me jo areco. Pien gin kikelo na peko i kuo na; kiger keda, doko kidingere keda.

⁴ Cunya tie kede lito, lworo me to omaka.

⁵ Lworo kede mielkom omaka; koma oto.

⁶ Omio atie do waco be, koto di atie kede bwoma bala awele, koto apor aoto tenge di ako gira wei.

⁷ Ateteni koto aringo gira tenge kakabor; koto aoto bedo i tim.

⁸ Koto asunyo ot mono kagwokere, ki buko me yamo ager kede ki yamo me kot.

⁹ Okwe Rwot, totolo iik gi; pien atie neno tim me gero kede atwomutwomun en atie i bomba.

¹⁰ Iceng kede iwor gin kimamano apama mere; tim areco kede peko tie iye.

¹¹ Tim me nek tie iye; adiadia kede angalo likame rwenyo ki atale mere.

¹² Koto di jokwor na en kame tie yamo kop kame wango cunya, koto akanyo; koto di jo kame daga en kame tie kede acae i koma, koto apwono negi.

¹³ Do kom in, dano kame rom aroma keda, ngaupa na, diera kame onao keda.

¹⁴ Oudo obedo nywako kope amit me cuny wa kedi, di ooto ki ot ka Rubanga karacel.

¹⁵ Akwao koto to oneko gi; kidonyi di kikuo i kabedo me jo oto; pien tim areco tie i miere gi kede i cuny gi.

¹⁶ Do ango alwongo Rubanga, Rwot gire bino laka.

¹⁷ Otieno kede odiko kede i dier iceng, ango acwao koko na bute di acur, en gire ebino winyo koko na.

¹⁸ En ebino laka awok mulem ki yi kame atie iye; pien jo atot tie yi keda.

¹⁹ Rubanga ngat kobedo i kom mere me ajakanut cakere sek kede sek, bino winyo koko na di eko dwoko wi gi kidoko mwol, pien gin kidagi lokere, doko likame kilworo Rubanga.

²⁰ Ngaupa na orieo cinge yi kede ngawote, eko turo cikere kame oudo etimo keda.

²¹ Kope me doge oudo pwot bala modiang, do di oudo etie kede cuny me yi; kope mege oudo kweo cuny dano bala mo, do i ateteni oudo kical bala epima.

²² Ket yec me peko ni i kom Rwot di en eko bino konyi; likame en ebino yei mino kobwono ngat kopoore.

²³ Do in Rwot, ibino uco gi piny i bur atut wiriwir; jo kame onyo remo me jo kede joangalo likame bino tieko dul me kare me kuo gi. Do ango gira abino keto gen na i komi.