Sabuli 108 - Baibuli I Leb Kumam 2013

Ilega me Kwano Rubanga Kony

¹ Cunya likame kwanyere ki komi, Okwe Rubanga, cunya likame kwanyere ki komi. Abino wer kede dwan amit. Ango abino cei.

² Ceunu, wun adungu kede arigirigi! Ango abino cei di pwodi piny obai.

³ Abino mini pwoc, Okwe Rubanga, i diere me jo apat, doko abino wero wer me paki i diere me atekerin.

⁴ Pien amara nin kalikame lokere bor kalamo malo, doko genere nin bor tuno i idoun.

⁵ Nyut dwongo ni i malo, Okwe Rubanga, doko mi deyo ni rom wi lobo lung.

⁶ Mia aloi yi pi cingi me twer; gam kwac na, tetekeny ilak jo kame in imaro.

⁷ Rubanga ocikere i kabedo mere kacil be, “Abino popoko Sekem di akuko, abino da popoko aditot me Sukot.

⁸ Gilead obedo mera; Manase da obedo mera; Epuraimu obedo ocoro atek kame gwoko wia; Yuda en ebela na me pug.

⁹ Moab tie bala kalaya na me bol; abino uco amuka na i kom Edom pi nyuto be en ebedo mera; abino ikuk i wi Pilistia pi bwone.”

¹⁰ Okwe Rubanga, ngai kame bino tera i bomba kame kocelo kede apama atek? Ngai bino tela tera Edom?

¹¹ Ateteni mam in itieko daga? Okwe Rubanga, in likame do iupere kede isirikalen wa ot yi.

¹² Okwe kony wa yi kede jokwor wa, pien kony kame dano mio kony mere li.

¹³ Ka Rubanga tie kede wa wan obino lono; en ebino nyono jokwor wa piny i tiene.