Mika 1 - Baibuli I Leb Kumam 2013

¹ Man en kop kame bin Rwot owaco ne Mika, dano me Moreset, i kom Samaria kede Yerusalem, i kare ka Yotam, Akas, kede Esekia, gin abakai me Yuda.

Wer me Koko Samaria kede Yerusalem

² Winyunu, wun atekerin dedede; winyunu, Okwe wun gi dedede kame tie i wi lobo! Rwot Rubanga bino mino ijura i komu ki tempulo mere kacil me malo.

³ Nenunu! Rwot tie wok piny ki kabedo mere kacil; en eyaro bino piny di eko dero wi mori me wi lobo.

⁴ Di mori ko bino calar i kakame en enyono, kibino calar bala adipor kame koketo i mac; gin kibino mol ot i aditoto, bala pii kame mol piny wok ki wi emukura.

⁵ Manoni bino timere pi dub me jo Isirael. Ngai komio jo Isirael odubo? Jo me bomba me Samaria en kotero jo Isirael i dub! Kabedo mene en kame koworo kiye caljwogi i Yuda? Mam Yerusalem inonono?

⁶ Pi manono, Rwot waco be, “Ango abino mino Samaria doko ameje kame tie obar, kakame kopuro iye olok. Abino bwoto kide mege i aditot di ako delelo acakini me apama mere ooko.

⁷ Cal acwea mege dedede kobino ngingido, cul dedede kame komio but imalayan mege me tempulo kobino wango kede mac, doko caljwogi mege dedede ango abino dudubo. Samaria obedo coko gi nogi ki cul kame komio but imalayan. Nataman kobino yeno gi kotero gi me culo imalayan i kabedo kapat.”

⁸ Di do Mika oko waco be, “Ango abino tururo di akok pi kop noni. Abino ot nono abongo egoe moro i koma, kede abongo amuka i tiena, pi nyuto cwer cunya. Abino delaro kede koko bala ekwee, di atururo bala ekululu.

⁹ Apore ka Samaria likame cango, doko can nono otieko tuno Yuda da; amuducar nono otieko tuno i erute me Yerusalem, kakame jo na bedo iye.”

Jokwor Onoko Yerusalem

¹⁰ Kur iwacenu jokwor wa i Gat gikame tie timere ne wa; kur ikokunu atwal atwala. Wun jo me Bet Leapera, bebelunu i apua pi nyuto cwercunyu!

¹¹ Wun jo me Sapir, katunu i piny me obukui bala mabus, di itienu nono doko di lewic omako wu. Jo me Sanan likame twero donyo ooko me bomba gi. Jo me Betesel tie koko kitek, manono nyuto be gin likame bobo kikaruno konyo wu.

¹² Jo me Marot tie kuro gikame ber pi timere, di kitie kede par, pien Rwot otieko kelo can otuno i erute me Yerusalem.

¹³ Wun jo me Lakis, tweunu ne asigiran cabalan. Wun en kame bin icakunu kelo dub Yerusalem, pien wun ilubunu dub me Isirael.

¹⁴ Pi mano, wun jo me Yuda, miunu giamia me twaro wele but jo me bomba me Moreset Gat. Abakai me Isirael bino mito kony kibut jo me bomba me Akisib, do likame kibino udo.

¹⁵ Wun jo me Maresa, Rwot bino kelo ne wu ngakwor kame bino bwono wu. Jotel, gin en jo kame kelo ne Isirael deyo, kibino ot pwono i abo me Adulam.

¹⁶ Wun jo me Yuda, lielunu wi wu pi koko idwe wu kame imarunu. Lielunu wi wu dong ler bala me acut, pien kobino tero gi bala mabus i piny me obukui.