Malaki 1 - Baibuli I Leb Kumam 2013

¹ Manoni en kop kame Rwot bin omio Malaki pi waco ne jo me Isirael.

Amara ka Rwot pi Jo Isirael

² Rwot waco ne jo Isirael be, “Ango abedo maro wu nakanaka. Do wun ipenyerenu be, ‘Imaro wa i yore mene?’ Benyo, mam Esau obedo omin me Yakobo? Do ango ako maro Yakobo

³ di ako dagi Esau. Ango adudubo lobo ka Esau kobedo imukuran imukuran di ako mine edoko kabedo me ikween.”

⁴ Ka ikwae ka Esau, gin jo Edom, oko waco be, “Kotieko dudubo bomban wa, do wan bobo obino gero gi.” Rwot bino gamo be, “Wek gin kigeri. Ango bobo abino rereto gi piny, tuno jo donyo lwongo piny gi be, ‘Piny me gikareco’ kede be, ‘Ateker kame Rwot otieko lilo kede atwal.’ ”

⁵ Wun ibinunu neno manoni kede wangu di ikounu waco be, “Rwot dwong akadi kiton i lobere apat kalikame obedo me Isirael!”

Rwot Obunano Josaseredoti

⁶ Rwot waco ne josaseredoti be, “Atin mio wor but papa mere, ngatic da mio wor but ngadwong mere. Ka ango en papa wu, pinyo kamio likame imianu wor? Doko ka ango en ngadwong wu, pinyo kamio likame imianu wor? Wun icaanu, do di doko ipenyerenu be, ‘Kara wan ocai i yore mene?’

⁷ Wun icaanu i yore me mino giayala kopwokere i wi alutari na. Di wun ipenyerenu be, ‘Wan opwoke i yore mene?’ Wun ipwokenu i yore me bedo kede acae i kom alutari na.

⁸ Ka wun ikelunu leini kame wang gi oto arabo atuwo, amoto kongwalo pi mino bala giayala buta, benyo, iparunu be manono ber? Kong tamunu mino le kame cal kamanono but ngapug! Iparunu be cunye bino bedo yom kede wu arabo ebino pwono wu?”

⁹ Aso nataman wun josaseredoti, kong tamunu kwano Rubanga pi timo ne wa bero. En likame ebino gamo ilega ka ngatamoro kikom wu. Manono obedo raco wun.

¹⁰ Rwot Rubanga waco be, “Ango oudo amito be koto ngatamoro kikom wu ocego ikekon me tempulo, tetekeny geng wu cwinyo mace kame kony gi li i alutari na. Ango cunya likame yom kede wu, doko likame abino gamo giayala moro kame wun ikelunu buta.

¹¹ Cako ki bad tetu kide tuno i bad tetu poto ceng, atekerin dedede mia wor. I kabedere dedede gin kiwango odok angwe kur me yala, kede giayala apat kame poore. Gin dedede kimia wor!

¹² Do wun likame inyutunu na wor ka iwacunu be alutari na kony mere li, kede ka imiunu i wie giayala kame kony mere li.

¹³ Wun iwacunu be, ‘Kite kame tic noni do otieko olo wa kede!’ Di ikounu junye na. Wun ikelunu na bala giayala le kame oyako tetek, arabo le kame tuwo. Benyo, iparunu be ango miero agam gi kibut wu?

¹⁴ Ilam poore mak ngat kame mio bala giayala, le kame tie kede peko moro i kome, do di en etie kede le ace aber kame en oudo ecikere pi mina! Pien ango en Abaka adwong, doko jo me atekerin dedede lwora.”