Luka 17 - Baibuli I Leb Kumam 2013

Dub

¹ Yesu oko waco ne josiao mege be, “Atama me poto i dub ateteni oyaro bino; do etie i can ngat kame bino mino gi kibino.

² Oudo koto bedo ber ka kotweo ne kidi me riego i ngute di oko uce kede i nam, akaka en mino jo kame titino gi poto i dub.

³ Pi mano, gwokerenu! “Ka omini odubo, ronkino en, doko ka eswilaro, sasiro en.

⁴ Ka dano acel nono odubo buti tien kanyaare i ceng acel, di tien acelacel kame edubo kede ebino buti di ewaco be, ‘Aswilaro,’ in miero isasiro en.”

Yei

⁵ Joor oko waco ne Rwot be, “Med yei wa.”

⁶ Di Rwot oko waco ne gi be, “Ka koto di oudo itienu kede yei kame rom kede nyige me karadali, oudo koto itwerunu waco ne cukamori ni be, ‘Putere ki kan iko ot pitere i nam,’ di koto en eko winyo dwanu.

Gikame Ngatic Timo

⁷ “Ngai kikom wu ka etie kede ngatic mere kame puro ne ecuka arabo kwao ne romini mege, di en eko dwogo paco ingei tic, ewaco ne ngatic nono be, ‘Susunyo do ber bino cam’?

⁸ Mam elunyo waco ne be, ‘In do ber iik nango cam me otieno, iko ngapere iko kelo na cam, iko donyo dara di ango acamo kede di amato, di do kame ango atieko, ida iko do cam kede mato.’

⁹ Iparunu be en emio pwoc but ngatic mere be pien etimo gikame en ewaco ne pi timo?

¹⁰ Kamanono da, ka wuda itimunu gi dedede kame kowaco ne wu pi timo, poore iwacunu be, ‘Wan kom jotic kenekene; wan otieko timo tic kame oudo mako wa.’ ”

Yesu Ocango Jodobo Tomon

¹¹ Bin di Yesu oudo tie ot Yerusalem, en oudo etie beo ki adul kame tie dierediere me Samaria kede Galilaya.

¹² Kakame oudo etie donyo kede i calo moro, en eko riamo kede jodobo tomon. Gin kiko cungo kakabor,

¹³ di kiko lwongere be, “Adwong, Yesu, mi kisa maki i kom wa.”

¹⁴ Kakame Yesu oneno gi kede, en eko waco ne gi be, “Otunu imiunu ngasaseredoti ngic wu.” Kakame oudo kitie ot kede, kom gi oko cango.

¹⁵ Di bin ngat acel kikom gi oneno be etieko do cango, en eko lokere edok but Yesu di epako Rubanga kede dwan amalo.

¹⁶ En eko riebere i tien Yesu di epwoye. Oudo en ebedo Ngasamaria.

¹⁷ Yesu oko penyere be, “Mam oudo jo tomon en kame kocango? Do jo kanyangon icegun tie tuai?

¹⁸ Pinyo komio jo icegun likame oko dwogo mino Rubanga pwoc, kwanyo ngakumbor ni kenekene?”

¹⁹ Di do Yesu oko waco ne icuo nono be, “Yai ioti; yei ni ocangi.”

Bino me Ajakanut ka Rubanga

²⁰ Bin i kare moro Iparisayon openyo Yesu awene en kame Ajakanut ka Rubanga oyaro bino kede, en eko dwoko ne gi be, “Ajakanut ka Rubanga likame oyaro bino kede gianena mogo kame neeno.

²¹ Doko likame tie jo mogo kame bino waco be, ‘Neningo, en ine!’ arabo be, ‘En ica!’ Pien Ajakanut ka Rubanga tie i diere wu.”

²² Di do en eko waco ne josiao mege be, “Kare tie bino kame ibinunu mito neno kede acel kikom ceng ka Wot ka dano, do likame ibinunu neno.

²³ Jo bino waco ne wu be, ‘Nenunu, en ica!’ arabo be, ‘En ine kan!’ Do kur iyeunu ot, akadi lubo gi da.

²⁴ Pien bala kite kame kot meny kede di eko caro malo cako ki tetu cel tuno kede tetu ocelu, ebino bedo kamanono da kede Wot ka dano i ceng mere.

²⁵ Do miero ber en ebei i can atot, di jo me i kare ni ko dage.

²⁶ Bala kite kame riki etimere kede i kare ka Nua, en epone nono da kame ebino timere kede i kare me dwogo ka Wot ka dano.

²⁷ Jo oudo tie cam kede amata, di kinyomere doko di kimio anyira gi me anyoma, paka tuno i ceng kame Nua odonyo kede i yi yee, di alele oko bino oko neko gin dedede.

²⁸ Kamanono da, bala kite kame riki etimere kede i kare ka Lot; jo dedede oudo tie cam kede amata, mogo di tie cat kede wil, doko mogo di tie pito jame, di mogo gedo,

²⁹ do ceng kame Lot oyai kede ki Sodoma, mac kede salupa kame tie liel oko cwei di oko neko gin dedede.

³⁰ Ebino bedo kamanono da i ceng kame Wot ka dano da bino nyutere kede.

³¹ “Cenge no, ngat kame tie i wi ot, di jame mege tie i ot miero kur doko wok piny pi kwanyo gi; iepone nono da, ngat kame oudo tie i poto kur doko dok paco.

³² Yutununu gikame otimere ne dako ka Lot.

³³ Pien ngat kame mito gwoko kuo mere, ebino rwenye, do ngat kame rwenyo kuo mere ebino gwoke.

³⁴ Awaco ne wu be, iwor me cenge no, kikom jo are kame tie ribo apien kobino kwanyo dano acel oko tero di oweko ngat ocelu.

³⁵ Doko kikom mon are kame tie riego karacel, kobino kwanyo ngat acel oko tero di oweko ngat acel dong.”

³⁶ (Kikom jo are kame tie pur i poto, kobino tero ngat acel di ngat acel dong.)

³⁷ Josiao mege oko penye be, “Rwot, tuai inonono?” Di Yesu oko dwoko ne gi be, “Kakame gi oto tie iye, kunono en kame acut da cokere iye.”