Jopilipi 4 - Baibuli I Leb Kumam 2013

Acora

¹ Pi mano, imiegu kede amiegu na kame amaro, doko kame omua, jo kame yomo cunya doko kame cal bala ocoro na me angosibib, cungunu di itekunu i Rwot kamanoni, wun jo na kame amaro.

² Ango akwao Eudia kede Sunutuke pi bedo kede tam acel i Rwot.

³ Doko akwao ida ngatic ngawota me ateni, kony mon nogi, pien gin kicane karacel keda i tic me ejiri, karacel kede Kelementi kede jotic jowota apat dedede, gin jo kame nying gi tie i itabu me kuo.

⁴ Lelunu i Rwot i kare lung. Amedo doko waco be lelunu.

⁵ Wek jo dedede ngei mwolo wu. Rwot otieko doko iyapiyapi.

⁶ Kur ibedunu kede par i kom gimoro, do i gi dedede miunu Rubanga ngei gikame imitunu i ilega kede i kwac, di imiunu pwoc.

⁷ Di mulem ka Rubanga, kame kalamo niang dedede me dano, ko bino gwoko cunyu kede tam wu i Kirisito Yesu.

⁸ Me ajikini mere, imiegu kede amiegu na, ketunu tam wu i gi dedede me ateni kame poore awora, i gi dedede kame opoore, i gi dedede kacil, i gi dedede kame jo maro, i gi dedede kame pirgi tek, i gi dedede kame ber adikinicel kede i gi dedede kame poore apaka.

⁹ Timunu gikame isiaonu, kede kame igamunu, kede kame iwinyunu, kede kame inenunu kibuta, di Rubanga won mulem ko bino bedo kede wu.

Pwoc pi Giamia

¹⁰ Ango alelo twatwal i Rwot, pien ingei kare alac nan igeunu doko paro pira; ateteni wun bo oudo iparunu pira, do kenekene oudo likame itienu kede kare me nyuto.

¹¹ Likame ango atie ngunguro pi jame kame amito; pien ango atieko pwonyere pi mino gikame atie kede pi roma iepone me kuo dedede kame atie iye.

¹² Ango angeo bedo me can, doko angeo epone me bedo me abar. Ango atieko pwonyere i kom mung me bedo kede yengo amoto me bedo kede kec, me bedo kede gikame oboro amoto me bedo i can iesawa moroni kenekene kede i karamoroni kenekene.

¹³ Ango akaruno timo gi dedede i Kirisito ngat kame mia adoko tek.

¹⁴ Do wun itimunu gikaber pi nywako keda peko kame oudo dia.

¹⁵ Doko wun Jopilipi ingeunu kenu be, i kare kame ango ageo tuco kede ejiri, di ayai ki Makedonia, likame tie jo mogo koyei Kirisito kame onywako keda timo tic me gin mino kede ango gamo, do kwanyo wun kenekene.

¹⁶ Pien akadi di oudo ango atie i Tesalonika da, bin wun icwaunu na kony kalamo tien acel.

¹⁷ Likame be pien tam nango tie i kom giamia, do ango atie mono gikame nyai pi kelo ne wu bero.

¹⁸ Ango atieko gamo cul na dedede kede kalamo. Ango atieko udo gikame oroma, pien Epaporodito omia giamia kame icwaunu na. En ebedo giamia kame ngwe kur, giayala kame Rubanga gamo, doko kame yomo cunye.

¹⁹ Rubanga na bino mino wu gi dedede kame imitunu di lubere kede abar mere me deyo kame tie i Kirisito Yesu.

²⁰ Deyo bed but Rubanga Papa wa ikar kede ikar. Amen.

Amot me Ajikini

²¹ Motanu jokacil dedede i Kirisito Yesu. Imiegu kede amiegu kame tie keda moto wu.

²² Jokacil dedede moto wu, twatwal mere jo me ot ka Kaisari.

²³ Kisa ka Rwot wa Yesu Kirisito bed kede cunyu.