Jopilipi 1 - Baibuli I Leb Kumam 2013

Amot

¹ Baluwa kowok kibut Paulo kede Temeseo, jotic ka Kirisito Yesu. But jokacil dedede kame tie Pilipi, kame tie i Kirisito Yesu, karacel kede bisop kede dikonin.

² Kisa kede mulem kame wok kibut Rubanga Papa wa kede Rwot wa Yesu Kirisito bed butu.

Ilega ka Paulo ne Jo kame Somo Baluwa mere

³ Ango apwoyo Rubanga na i kare dedede kame ayutuno wu kede,

⁴ di alego kede yomcuny piru dedede nakanaka i ilega na acelacel,

⁵ pi epone kame inywakunu keda timo tic me ejiri, cako i ceng me agege tuno nan.

⁶ Doko ango angeo kiber be, ngat kogeo tic aber i diere wu bino mine ecobere i ceng me dwogo ka Yesu Kirisito.

⁷ Etie gi opoore pi ango paro piru iepone noni, pien wun itienu i cunya, bala kame wun dedede inywakunu karacel keda kisa kame komia di nan ango atie mabus, kede i kare me jurao kede mino ejiri cungo di etek.

⁸ Rubanga en mujura na kame ngeo be, ango aparo wun dedede kede amara ka Kirisito Yesu.

⁹ Ango alego be, wek amara wu meede ameda kede dongo, di epong kede ngec kede niang atut,

¹⁰ tetekeny ikarununu ngeno yero gikaber. Manono bino mino ibedunu jo kame li kede raco moro, kede abongo gimoro kame koromo bunano wu iye i ceng me dwogo ka Kirisito,

¹¹ di kuo wu opong kede anyakini me kuo kopoore, kame wok kibut Yesu Kirisito, pi mino Rubanga deyo kede pi pake.

Bedo Kuo en Kirisito

¹² Imiegu kede amiegu na, ango amito ingeunu be, gikame otimere na ateteni okonyo pi sarakino ejiri.

¹³ Manoni omio isirikalen kame daro paco me abaka kede jo apat ongeo be kotwea i mabus pi Kirisito.

¹⁴ Omio imiegu kede amiegu atot obedo kede gen i kom Rwot pi kite kame otwea kede i otkol, di kitie kede nwangcuny adwong pi pwonyo kop ka Rubanga abongo lworo.

¹⁵ Ateteni jo mogo pwonyo kop i kom Kirisito pien kitie kede nyeko kede lok, do apat mege pi cuny aber.

¹⁶ Jo kame tatamo kop i kome kede cuny aber timo pi amara di kingeo be ango koketa kan pien ajurao ejiri;

¹⁷ do jo apat timo pi mit gi kede pi cuny me apokapoka, do weko kede ateni, di kiparo pi medo na can di atie i otkol.

¹⁸ Nan do nyo? Gikame pire tek en ine be, i yore moroni kenekene kotie tatamo kop i kom Kirisito bed bala me ecuke arabo me ateni; pi man ango alelo. Ebo, doko abino meede kede kilel,

¹⁹ pien ango angeo be, pi ilega wu kede pi kony me Tipo ka Yesu Kirisito, man bino doko alako nango.

²⁰ Ki mit kede gen na, likame lewic bino maka atwal, do nataman kede tekcuny adwong koma bino mino Kirisito wor bala lem nakanaka, akadi bed bala akuo amoto ato.

²¹ Pien kibuta, bedo kuo en Kirisito, to en ameda.

²² Do ka bedo nango kuo i koma bino mino tic na nyai, likame angeo be ayer do mene.

²³ Kope are gi dia twatwal. Mit nango tie be koto atoi di ako ot bedo kede Kirisito, pien mano ber kalamo.

²⁴ Do ango dong di akuo i koma mitere twatwal piru.

²⁵ Bala kame angeo kede kiber, ango angeo be abino dong kuo di ako meede kede wu dedede, pi wun meede anyim kede pi kilel i yei.

²⁶ Mano bino mina anywako kede wu wakere i Kirisito Yesu ka adwogo bobo butu.

²⁷ Kenekene miunu ekite me kuo wu bed bala kame ejiri ka Kirisito mito, tetekeny akadi ka ango abino pi neno wu arabo li, abino winyo kop i komu be icungunu di itekunu kede cuny acel, kede tam acel, di itienu cane karacel pi yei kame ejiri okelo,

²⁸ doko di likame jokwor wu kelo ne wu lworo. Man tie gikame nyuto kakaler be gin kibino rwenyo, do wun ibinunu udo alako. Man Rubanga en kame bino timo.

²⁹ Piento en etieko mino wu winyo pi kisa mere, likame winyo me yei Kirisito kenekene, do da me neno can pire,

³⁰ bala kame nataman itienu kede auta kame oudo inenunu doko nan iwinyunu be ango atie iye.