Jolebi 4 - Baibuli I Leb Kumam 2013

Giayala pi Dub kalikame Dano Otimo Akaa

¹ Di Rwot oko waco ne Musa

² pi ot yamo ne jo me Isirael be, ngat kame turo cik ka Rwot di eko dubo, do di udo likame etimo akaa, en ebino timo gi acel kikom magi:

³ Ka Ngatel me Josaseredoti en odubo di eko kelo raco i wi jo, en ebino kwanyo twon kame li kede peko moro i kome, di eko yale but Rwot pi dub mere.

⁴ En ebino tero twon i nyim Rwot, i ekeko me Eema me ariamakin kede Rwot, di en eko cibo cinge i wi twon nono, di eko ngole i nyim Rwot.

⁵ Ngatel me Josaseredoti bino kwanyo remo me twon nono di eko tere i yi Eema me ariamakin kede Rwot.

⁶ En eko bino gwelo remo nono di eko kikiro en tien kanyaare i nyim Rwot, i nyim esuka apoko Kabedo Kacil.

⁷ En eko bino keto remo mogo i iswonge me isondana me alutari me wango odok angwe kur, kame tie kanono i yi Eema me ariamakin kede Rwot. Remo apat mere en ebino onyo piny i dud alutari me wango giayala, kame tie i nget ekeko me Eema me ariamakin kede Rwot.

⁸ En ebino waro kakamio dedede ki kom twon me giayala me kwanyo dub, kede mo dedede kame tie i amontena mere,

⁹ kede engalur are kede mo kame umo gi, kede lak emany,

¹⁰ di cal acala bala kame kotimo i kom le kame koneko bala giayala me nywak.

¹¹ Do en ebino mino kotero lau mere, ringo mere, wie, tiene, amontena mere kede we mere,

¹² jamini ace dedede me kom twon nono en ebino mino kotero kabedo kalikame opwokere kame tie ooko me kimere, i oduru me buru, di en eko wango gi kunono kede mac kame komoko.

¹³ Ka jo dedede me Isirael en odubo i yore me turo cik ka Rwot abongo ngatamoro niang iye, di kiko bedo tie kede raco, do di oudo likame kitimo akaa;

¹⁴ cucuto ka dub nono ongere, jo dedede poore kwanyo twon pi bedo giayala me kwanyo dub di kiko tere i nyim Eema me ariamakin kede Rwot.

¹⁵ Joadongo me ekodet ko cibo cing gi i wi twon nono i nyim Rwot, di oko ngolo twon nono kanono i nyim Rwot.

¹⁶ Ngatel me Josaseredoti ko tero remo mogo me twon nono i Eema me ariamakin kede Rwot.

¹⁷ En eko bino gwelo remo nono di eko kikiro en tien kanyaare i nyim Rwot, i nyim esuka apoko Kabedo Kacil.

¹⁸ En eko bino keto remo mogo i iswonge me isondana me alutari me wango odok angwe kur, kame tie kanono i yi Eema me ariamakin kede Rwot. Remo apat mere en ebino onyo piny i dud alutari me wango giayala, kame tie i nget ekeko me Eema me riamo kede Rwot.

¹⁹ Di do eko waro kakamio mere dedede di eko wange eduny yiro i wi alutari.

²⁰ Ebino timo i kom twon nono gikame cal acala bala kame kotimo i kom twon kobedo giayala me kwanyo dub. Iepone noni, ngasaseredoti mio giayala me kwanyo dub kame jo otimo, di Rubanga ko sasiro gi ki dub gi.

²¹ Di do en eko bino tero twon nono tenge me kimere di eko wange, bala kame ewango kede twon kame en eyalo pi dub mere; manono obedo giayala pi dub me jo.

²² Ka ngatel en odubo, i yore me turo cik moro kikom cik ka Rwot di eko bedo kede raco, do di likame etimo manono akaa,

²³ cucuto ka en eko niang i dub mere nono, en ebino tero giayala me ekoroi ali kede peko moro i kome.

²⁴ En ebino cibo cinge i wi ekoroi nono di eko ngole i kakame kongolo iye giayala awanga i nyim Rwot. Manoni obedo giayala me kwanyo dub.

²⁵ Ngasaseredoti bino gwelo remo me ekoroi nono di eko kikiro en i iswonge me isondana me alutari, di eko onyo remo ace kodong piny i dud alutari me giayala awanga.

²⁶ Di do en eko waro kakamio mere dedede di eko wange eduny yiro i wi alutari, bala kame kowango kede kakamio me giayala me nywak. I yore noni, ngasaseredoti bino mino giayala me kwanyo dub me ngapug nono, di Rubanga ko sasiro en.

²⁷ Ka dano adana moro en odubo, i yore me turo cik moro kikom cik ka Rwot di eko bedo kede raco, do di likame etimo manono akaa,

²⁸ cucuto ka en eko niang dub mere nono, en ebino tero giayala me diel adako ali kede peko moro i kome.

²⁹ En ebino cibo cinge i wi diel adako nono di eko ngole i kakame kongolo iye giayala awanga. Manoni en giayala me kwanyo dub.

³⁰ Ngasaseredoti ko bino gwelo remo me diel nono di eko kikiro en i iswonge me isondana me alutari, di eko onyo remo ace kodong piny i dud alutari.

³¹ Di do en eko waro kakamio mere dedede, bala kame kokwanyo kede kakamio me giayala me nywak, di ngasaseredoti ko wange eduny yiro i wi alutari, di ngwece mere ko yomo cuny Rwot. I yore noni, ngasaseredoti bino mino giayala me kwanyo dub me dano nono, di Rubanga ko sasiro en.

³² Ka dano otero oromo pi bedo giayala akwanyo dub, poore ebed oromo adako kame li kede peko moro i kome.

³³ En eko bino cibo cinge i wie i kakame kongolo iye giayala awanga.

³⁴ Ngasaseredoti ko bino gwelo remo me giayala me kwanyo dub nono di eko kikiro en i iswonge me isondana me alutari me wango giayala, di eko onyo remo ace kodong piny i dud alutari.

³⁵ Di do en eko waro kakamio mere dedede, bala kame kokwanyo kede kakamio me oromo kobedo giayala me nywak, di ngasaseredoti ko wange eduny yiro i wi alutari, di ngwece mere ko yomo cuny Rwot. Iepone noni, ngasaseredoti bino mino giayala me kwanyo dub me dano nono, di Rubanga ko sasiro en.