Jolebi 1 - Baibuli I Leb Kumam 2013

Giayala kame Kowango Dedede

¹ Rwot oko lwongo Musa di eko yamo kede i Eema me ariamakin kede en Rwot, di eko mine

² iswilia kame jo me Isirael poore lubo ka kitie mino giayala kaman: Ka ngatamoro kibutu okelo le mere me giayala, poore ekel diang arabo oromo amoto diel.

³ Ka dano tie mino giayala awanga me diang, miero ebed twon kame li kede peko moro i kome. Poore en etere i ekeko me Eema me ariamakin kede Rwot, tetekeny Rwot gam giayala nono kawang dano nono.

⁴ Ngat nono poore cibo cinge i wi giayala awanga mere di Rwot ko bino gamo giayala nono pi kwanyo dub ka wone.

⁵ En ebino ngolo twon nono kanono i nyim Rwot, di awobe ka Aaron, kobedo josaseredoti, ko kikiro remo mere i kom alutari i bad dedede, alutari kame tie i ekeko me Eema me ariamakin kede Rwot.

⁶ Di do en eko yango le me giayala awanga nono di eko ngongolo en i adulion,

⁷ di josaseredoti awobe ka Aaron ko napo yen i alutari di kiko moko mac.

⁸ Di kiko napo i mac me alutari nono adulion me ringo nogo, ribo kiton wie kede kakamio mere da;

⁹ do miero lwok amontena kede tiene. Di ngasaseredoti atie telo tic ko wango kom giayala nono dedede i wi alutari di yiro mere ko duny. Ngwece me giayala awanga nono yomo cuny Rwot.

¹⁰ Ka dano tie mino giayala me oromo amoto diel, giayala nono poore bed ekoroi kame li kede peko moro i kome.

¹¹ En epoore ngole i bad tetu malo me alutari i nyim Rwot, di josaseredoti awobe ka Aaron ko kikiro remo mere i kom alutari i bad dedede.

¹² En eko bino ngongolo ringo nono i adulion, di ngasaseredoti atie telo tic ko napo ringo nono i mac me alutari, ribo kiton wie kede kakamio.

¹³ Do miero lwok amontena kede tiene. Di ngasaseredoti atie telo tic ko wango kom giayala nono dedede i wi alutari di yiro mere ko duny. Ngwece me giayala awanga nono yomo cuny Rwot.

¹⁴ Ka dano tie mino giayala awanga me winyo, miero winyo nono bed amam amoto eluke.

¹⁵ Ngasaseredoti ko tere i alutari, eko mojoro ngute di eko wango wie i mac me alutari, di do eko biino remo mere cwer i nget alutari.

¹⁶ En ebino kwanyo icukuliro me winyo nono kede gikame tie iye di eko uce i bad tetu kide me alutari, kakame oonyo iye buru.

¹⁷ En ebino mako bwome di eko nyile epedere apeda do di likame eko mine ecot; di ngasaseredoti ko wango kom giayala nono i wi alutari di yiro mere ko duny. Ngwece me giayala awanga nono yomo cuny Rwot.