Jokolosai 1 - Baibuli I Leb Kumam 2013

Amot

¹ Baluwa kowok kibut Paulo, ngat kame odoko ngaor ka Kirisito Yesu pi mit ka Rubanga, kede kibut omin wa Temeseo.

² But jokacil kede imiegu kede amiegu kame genere i Kirisito, kame tie Kolosai. Kisa kede mulem ka Rubanga Papa wa bed butu.

Ilega me Pwoc

³ Wan opwoyo Rubanga papa me Rwot wa Yesu Kirisito nakanaka kame otie lego ne wu.

⁴ Pien wan otieko winyo kop i kom yei kame itienu kede i Kirisito Yesu, kede amara kame itienu kede but jokacil dedede,

⁵ pi gen kame kokano piru i malo. Wun oudo igeunu winyo kop i kom gen noni sek, i kop me ateni kame obedo ejiri

⁶ kame otieko tuno butu. Ateteni kop noni tie nyako anyakini di enyai i piny lung; etie timere kamanono da i diere wu cako i ceng kame iwinyenu kede di ikounu niang i kom kisa ka Rubanga i ateni.

⁷ Itiekunu ngeno kop noni kibut Epapura, ngat kame obedo ngatic wad wa kame omaro. En etie ngatic agenere ka Kirisito. En etie pi konyo wa.

⁸ Doko en etieko mino wa ongeo amara kame itienu kede i Tipo.

⁹ Pi mano, cako i ceng kame owinyo kede kop noni, likame oweko lego ne wu. Wan okwao be wek ipongunu kede ngec me gikame Rubanga mito pi rieko kede niang dedede kame Tipo mio.

¹⁰ Man bino mino ibedunu kede kuo kopoore i nyim Rwot, kame yomo cunye atwal, di inyakunu anyakini i tice dedede kame beco kede di ngec wu i kom Rubanga meede.

¹¹ Wek emi wu idokunu tek kede twer dedede, di lubere kede twer me deyo mere, tetekeny itwerunu kanyakino gi dedede di idiunu cunyu kede kilel,

¹² di imiunu pwoc but Rubanga Papa, ngat kame mio wa odoko jo apoore pi nywako gikame Rubanga oiko ne jo mege i ajakanut me lero.

¹³ En etieko lako wa ki twer me colo di eko kobo wa i ajakanut ka Wode kame emaro,

¹⁴ ngat kame alako kede isasir wa ki dub wok kibute.

Kirisito kede Tic mere

¹⁵ Kirisito en cal ka Rubanga ngat kalikame neeno, en kao me cwec dedede.

¹⁶ Pien kocweo gi dedede i en, gikame tie i malo kede i wi lobo, gikame neeno kede kalikame neeno, kiton ajakanuto, amoto loc, tipere kame pugo, kede akarunikin, kocweo gi dedede di beo kibute, doko pire.

¹⁷ En egeo bedo tie ne jame dedede, doko gi dedede ribere karacel i en.

¹⁸ En kame ebedo wi ekodet me jo koyei en, kame obedo kome. En agege, en kao kikom jo oto, tetekeny en ebed ngat kame telo i gi dedede.

¹⁹ Pien Rubanga i tie mere lung oudo mito bedo i en,

²⁰ doko i en Rubanga oudo cunye yom pi dwoko jame dedede bobo inywak kede en, jame kame tie i wi lobo amoto i malo, di ekelo mulem pi remo me to ka Kirisito i kom musalaba.

²¹ Wun bin jo koparao di itienu kede tam me gero, di itimunu tim areco,

²² do nan Rubanga otieko dwoko wu inywak kede en pi to me kom kame Kirisito obeo iye, tetekeny ekel wu i nyime di itienu jokacil kame li kede raco moro, abongo gimoro kame obunano wu iye i nyime.

²³ Ipoorenu meede i yei, di icungunu di itekunu iye abongo yangere, abongo yai tenge ki gen kame wok ki ejiri kame wun itiekunu winyo, kame kotieko tuco ne giacwea dedede kame tie i piny. Ango Paulo atieko doko ngatic me ejiri noni.

Tic ka Paulo bala Ngatic me Ekodet me Jokirisito

²⁴ Ango nan alelo pi can kame atie neno piru, doko can kame ango atie beo iye i koma pongo kakorem i can kame Kirisito oneno pi kome, kame obedo ekodet me jokirisito.

²⁵ Ango adoko ngat kame tio ne ekodet noni di lubere kede tic kame Rubanga omia pi timo ne wu, pi mino kop ka Rubanga ngere atwal.

²⁶ Manoni en mung kame oudo kokano pi kare alac, kede kibut lwak me kare atot, do nan etieko mino engere ne jo mege.

²⁷ Rubanga oyei pi mino gi ngeno epone kame abar me deyo me mung noni pire dwong kede i dier jo kalikame Iyudayan. Manoni obedo Kirisito kame tie i wun, en gen me udo deyo.

²⁸ Wan opwonyo kop i kome di okwenyaro ngat acelacel, doko di opwonyo jo dedede epone me rieko dedede, tetekeny okel ngat acelacel i nyim Rubanga di etieko cato i Kirisito.

²⁹ Man en komio ango atio di acane kede teko dedede kame Kirisito mia.