Iswilia 2 - Baibuli I Leb Kumam 2013

¹ Wan bin okounu mako sapali dok i wi tim tetu Nam Akwar, bala kame Rwot oudo ociko na, di okounu bedo wire i nget piny kobedo mori mori me Seir tieko kare kalac.

² “Di Rwot oko waco nango be,

³ ‘Wun ibedunu wire i nget piny kobedo mori mori noni pi kare kalac kame romo; cakunu do ot tetu malo.’

⁴ En eko waco na be ami wu cik kame waco be, ‘Wun iyapununu beo i lobo ka joawade wu, ikwae ka Esau kame bedo i piny me Seir. Gin kibino bedo kede lworo i komu, do mito wun igwokerenu

⁵ kur isurunu gi, pien ango likame ayaro mino wu imaunu akadi kakatitidi me lobo gi, pien ango atieko mino piny kobedo mori mori me Seir nono but ikwae ka Esau pi bedo mergi.

⁶ Wun itwerunu bino wilo cam kede pii kibut gin.’

⁷ “Ateteni Rwot Rubanga wu otieko mino wu winyo i gi dedede kame wun ibedunu timo. En engeo gi dedede kotimere ne wu i kare kame oudo ibeunu kede i twon wi tim noni. En ebedo tie kede wu i mwakini ot ongwon nogi lung, di eko mino wun ibedunu tie kede gi dedede kame oudo imitunu.

⁸ “Aso wan okounu kato owekunu joawade wa, ikwae ka Esau kame bedo Seir; owekunu yongayo me Araba, di oko kato bomban me Elat kede Esiongeber, di okounu lokere ot tetu wi tim me Moab.

⁹ Rwot oko waco nango be, ‘Kur ilolunu jo me Moab, ikwae ka Lot arabo yi kede gi. Ango atieko mino gin bomba me Ar pi bedo mergi, doko likame abino mino wun dul moro me lobo gi.’ ”

¹⁰ (Jo Emim en kame bin kong bedo i bomba nono, itucio me jo kame oudo tot nyidinyidi, doko di kibocoboco bala jo Anakim.

¹¹ Jo Emim nogi oudo komaro gi i kom jo Repaim bala jo Anakim, do jo Moab oudo lwongo gi be jo Emim.

¹² Jo Kori da bin kong bedo Seir, do ikwae ka Esau oko riamo gi tenge, kimuducaro ateker gi di gin kiko lunyo kunono, bala kame jo me Isirael da i cen mere oko timo ne jo kame oudo bedo i lobo kame Rubanga omio gi pi doko mergi.)

¹³ “Di wan okounu ngolo ecilet me Sered bala kame oudo Rwot owaco ne wa.

¹⁴ Cako wan yai ki Kades Barenea tuno ngolo ecilet me Sered oudo mwakini oromo do ot adek kiwie kanyauni. I kare nono oudo do jo yi me lwak nono otieko totoun bala kame oudo Rwot okwongere kede i kom gi.

¹⁵ Ateteni Rwot obedo mino gi alola tuno en muducaro gin dedede.

¹⁶ “Aso ingei gin dedede to,

¹⁷ Rwot oko waco ne wa be,

¹⁸ ‘Tin wun iyarunu beo ingolunu i adul me Moab ki nget bomba me Ar.

¹⁹ Ka inokunu jo Amon, ikwae ka Lot, kur ilolunu gi arabo i yiunu kede gi, pien ango likame abino mino wun dul moro me lobo kame ango atieko mino gin.’ ”

²⁰ (Lobo noni da kolwongo be lobo me jo Repaim. Jo Repaim bin bedo kanono, do jo Amon lwongo gi be jo Samsumim.

²¹ Gin oudo itucio me jo di kibocoboco bala jo Anakim doko di kitot nyidinyidi. Do Rwot oko muducaro gi en omio jo Amon oko lunyo lobo gi nono di kiko donyo bedo iye.

²² Rwot oudo otieko timo gi acel nono ne ikwae ka Esau kame bedo Seir. En emuducaro jo Kori tetekeny ikwae ka Esau luny lobo gi nono di kiko donyo bedo iye; gin kitie kunono tuno tin.

²³ Gi acel nono da en kame bin oko timere ne jo Abim kame oudo bedo i lak nam me Mediterania ape tuno i bad tetu piny i bomba me Gasa. Jo kame bin owok ki cula me Kurete omuducaro jo Abim di gin kiko lunyo lobo gi lung.)

²⁴ “Kakame wan bin otiekunu ngolo kede lobo me Moab, Rwot oko waco ne wa be, ‘Meedenu kede ot di ikounu ngolo ecilet me Arunon. Ango atie mino i cingu Sikon abaka me jo Amor, en abaka me bomba me Kesibon, karacel kede lobo mere. Surenu di ikounu cako mako lobo mere.

²⁵ Cako ceng atin ango abino mino jo me pinye dedede bedo kede lworo i komu. Jo dedede bino bedo kede mielkom pi lworo ka gin kiwinyo rwonge wun.’

Jo me Isirael Obwono Abaka Sikon

²⁶ “Di ango ako oro jo oyai ki wi tim me Kedemot pi ot but Abaka Sikon me Kesibon kede kop me kwano mulem kame waco be,

²⁷ ‘Wek wan obei ongol ki piny nin. Wan obino lubo yongayo kenekene abongo parao karamoro.

²⁸ Cam kame wan obino camo kede pii kame obino mato in ibino mino wa owilo awila kede sente. Kenekene in yei ne wan beo ki lobo ni,

²⁹ tuno wan ngolo ecilet me Yorodan di oko donyo i lobo kame Rwot Rubanga wa tie mino wa. In tim ne wa bala kame ikwae ka Esau kame bedo i lobo me Edom, kede jo Amor kame bedo i bomba me Ar otimo ne wa; gin kiyei ne wa beo ki adul gi.’

³⁰ “Do Abaka Sikon likame oko yei ne wa beo ngolo ki piny mere, pien Rwot Rubanga wu oudo omie ebedo ngaepali kede ngajemo, tetekeny wan obwonenu di okounu mano piny mere, bala kame nataman en etieko timo.

³¹ “Rwot oko waco nango be, ‘Neningo, ango atieko cako mino Sikon kede lobo mere butu. Nataman gamenu di ikounu donyo bedo iye.’

³² Sikon oko wok ki bomba en kede isirikalen mege dedede, pi yi kede wa i nget bomba me Yakas,

³³ do Rwot Rubanga wa oko mine i cing wa, di wan okounu neke karacel kede awobe mege kede isirikalen mege dedede.

³⁴ I kare nono da wan bin okounu mako bomban mege dedede di okounu neneko jo dedede kame bin bedo i bomban nogo; cuo, mon kede idwe. Likame tie ngatamoro kame owekunu oko dong di ekuo.

³⁵ Kenekene doke, diegi kede romini en kame bin okounu weko pi wan tero, karacel kede jamini kame oudo oyakunu ki bomban kame bin omakunu nogo.

³⁶ Rwot bin omio wa omaunu bomban dedede, cako ki bomba me Aroer kame tie i nget aditot me Arunon ribo kiton bomba kame tie i aditot kikokome, kiton tuno i adul me Gilead. Likame bin tie bomba moro kame kocelo kede apama atek kame turo oko bwono wa.

³⁷ Do wan bin likame okounu noko adul me jo Amon, arabo ot i dog ecilet me Jabok amoto i bomban me piny kobedo mori mori, arabo karamoro ace kame Rwot Rubanga wa likame owaco ne wa.