Isaya 16 - Baibuli I Leb Kumam 2013

Kuo Atek kame Jo me Moab tie Iye

¹ Jo me Moab ocwao idwe romini but ngat kame pugo lobo nono; kicwao gi yai ki Sela beo i wi tim tuno i moru me Sion.

² Gin kiraramun kakame kongolo kiye ecilet me Arunon, di kiwire atatai bala winy kame kotwaruno ki ude gi.

³ Gin kiwaco ne jo me Yuda be, “Miunu wa tam, timunu ne wa bero; gwokunu wa bala yat agalao ceng aliet di eko bedo kede tipo angic, di wan oko wei i tipo wu esawa kame ceng liet kede; wan obedo jo koringo ayela, kanunu wa, kur irupaunu wa.

⁴ Wekunu wa obed i diere wu; bedunu jo kame wan oringino gwokere but gi kibut jo kame mito muducaro wa.” Moab, jo kame tero wu kirac bino doko li, doko da tim me asura kede me dudubo lobo wu bino jik, kede tim me yak da bino rwenyo.

⁵ Di do ngat acel kikom ikwae ka Daudi ko bino doko abaka, di en eko bino pugo jo kede amara kalikame lokere, kede genere. En ebino bedo kede mitkom timo gi kopoore, di eko neno be kotimo gi dedede i yore me ateni.

⁶ Jo me Yuda waco be, “Wan otieko winyo kop i kom ewaka me Moab kede deng mere, do ewaka mere nono tie gi me nono.”

⁷ Pi manono, Moab miero koki; jo dedede poore kok pi Moab. Gin miero kikok kede cwercuny alit pi mugati abeco me Kir Keres.

⁸ Poti me olok me Kesibon kede Sibima otieko dubere, poti me olok kame lem kongo gi mero jodongo me atekerin apapat. Poti nogo oudo yarere tuno i bomba me Yaser, di kiko tuno i wi tim i bad tetu kide, kede i bad tetu tim oudo kituno loka tetucel me Nam Oto.

⁹ Nan akok pi poti me olok me Sibima bala kame akok kede pi Yaser. Pigewanga ony pi Kesibon kede Eleale, pien ilelem me yomcuny kame oudo itienu kede i kare me ngwedo anyakini kede i kare me kac otieko jik.

¹⁰ Yomcuny kede kilel otieko rwenyo i poti anyako cam kitek nogo; likame doko tie ilelem moro arabo wer kame doko winyere i poti me olok. Likame doko tie dano moro arieco olok kede tiene pi bine i bur me biino bwini; ilelem dedede me kilel kotieko jiko.

¹¹ Pi manono, cunya dipere kitek bala adungu pi Moab, atie kede par alit i kuo na pi Kir Keres.

¹² Jo me Moab lolo kom gi nono pi ot ilega i abila gi atie i wi moru, manono likame sobolo konyo gi.

¹³ Manoni en oudo kop kame Rwot owaco i kare kokato i kom Moab.

¹⁴ Do nan Rwot waco be, “Di mwakini adek likame okato, udo kotieko mino deyo me Moab odoko gi me acae. Jo anonok kenekene en kame bino dong kikom jo atot kame tie iye, doko da jo odong nogo bino bedo jo agoro twatwal.”