Gianyuta 12 - Baibuli I Leb Kumam 2013

Dako kede Twol Kiyiliyili

¹ Twon gianena me aura oko neeno i malo. Dako moro oko neeno kame ongapo ceng, di duwe tie i dud tiene, kede di engapo i wie ocoro me angosibib kame tie kede acerin tomon kiwie are.

² En oudo eyac eyapuno nywal; di eko kok pi aramo kede acanitoi me nywal.

³ Di bobo gianena me aura ace oko neeno i malo. Twon twol kiyiliyili akwar oko neeno, kame tie kede wie kanyaare kede tunge tomon, di icoron kanyaare me angosibib oudo tie i wie nogo.

⁴ En eko wano acel i kom adek me acerin dedede ki malo kede yibe, di eko uco gi piny i lobo. Di twol kiyiliyili nono oko cungo i nyim dako kame oudo oyapuno nywal nono, me wek ka enywal ecamaro atin mere cucuto.

⁵ En eko nywalo atin awobi, kame bino pugo atekerin dedede kede ebela me lilim. Do oko waraso atin nono di oko tere but Rubanga i kom meren me ajakanut.

⁶ Dako nono oko ringo i tim, kabedo kame Rubanga oudo oiko ne, kakame kobino pite kiye pi ceng tutumia acel kede tol are kede ot kanyape.

⁷ Kikano yi oko cakere i malo. Emikairi kede imalaikan mege oko yi kede twol kiyiliyili nono, di twol kiyiliyili nono kede imalaikan mege oko yi kede gi,

⁸ do oko bwono gi di kiko doko li kede kabedo i malo.

⁹ Di oko uco twon twol kiyiliyili nono piny, twol me anakacia nono, kame kolwongo be Sitani, ngat kame ngalo jo dedede me piny. Bin oko uce piny i lobo, en karacel kede imalaikan mege.

¹⁰ Di ango ako winyo dwan amalo di yamo i malo be, “Nan do alako, twer kede Ajakanut ka Rubanga wa, kede akarunikin ka Kirisito mere otieko bino. Pien kotieko uco ngat kame pido imiegu kede amiegu wa piny, ngat kame pido gi i nyim Rubanga wa iwor kede iceng.

¹¹ Gin kibwone pi remo me Katin Romo kede pi kop me ijura kame gin kimio, pien gin oudo likame kiparo pi kuo gi akadi paka tuno i to.

¹² Pi mano, lel do, in malo kede wun dedede kame ibedunu iye! Do itienu i can, wun lobo kede nam, pien Sitani otieko bino butu kede twon lilo, piento en engeo be kare mere cecek!”

¹³ Kakame twol kiyiliyili nono oneno kede be kotieko uce piny i lobo, en eko cako diebere kede dako kame oudo onywalo atin awobi nono.

¹⁴ Do oko mino dako nono bwome are me ekokom adwong, me wek epor tenge kibut twol nono di eko ot i tim, kakame kobino pite kiye pi mwakini adek kede dul.

¹⁵ Twol nono oko nyeto pii ki doge, kame ineno bala ecilet, pi koto molo dako nono.

¹⁶ Do lobo oko konyo dako nono; lobo ongamo doge di eko mwonyo ecilet me pii kame twol kiyiliyili nono oudo onyeto ki doge.

¹⁷ Di cuny twol kiyiliyili nono oko wang i kom dako nono di eko ot yi kede ikwae mege, gin jo kame lubo cik ka Rubanga kede kame mio ijura i kom Yesu.

¹⁸ Di twol nono oko ot cungo i asinge me dog nam.