Esera 8 - Baibuli I Leb Kumam 2013

Jo kame bin oko Dok Yerusalem kede Esera

¹ Manoni en nying jotel me ikekon me Isirael kame bin oko yai kede Esera ki Babilon di kiko dok Yerusalem i kare me apugan ka Abaka Aretasereses:

^2-14 Geresom en kame bin telo jo me ot ka Penekasi Danieri en koudo telo jo me ot ka Itamar Katus wot ka Sekania, en koudo telo jo me ot ka Daudi Sakaria en koudo telo jo me ot ka Paros. En bin eyai kede cuo tol acel kede ot kany (150) me yi ot gi Eliekoenai wot ka Serakia en koudo telo jo me ot ka Pakat Moab. Cuo kame bin owandiko nying gi bute oudo tie tol are (200) Sekania wot ka Yakasiel en koudo telo cuo tol adek me yi ot ka Satu Ebed wot ka Jonasan en koudo telo cuo ot kany me ot ka Adin Yesaya wot ka Atalia en koudo telo cuo ot kanyaare me ot ka Elam Sebadia wot ka Emikairi en koudo telo cuo ot kanyauni me yi ot ka Sepatia Obadia wot ka Yekiel en koudo telo cuo tol are kede tomon kiwie kanyauni (218) me yi ot ka Joab Selomit wot ka Yosipia en koudo telo cuo tol acel kede ot kanyape (160) me yi ot ka Bani Sakaria wot ka Bebai en koudo telo cuo ot are kiwie kanyauni me ot ka Bebai Yokanan wot ka Kakatan en koudo telo cuo tol acel kede tomon (110) me yi ot ka Asagad Elipelet, Yekuel, kede Semaya en koudo telo cuo ot kanyape me ot ka Adonikam (gin bin kiko dwogo icen ingei kare moro) Utai kede Sakur en koudo telo cuo ot kanyaare me ot ka Bigibai.

Esera Oudo Jolebi pi Timo Tic me Tempulo

¹⁵ Ango bin ako coko jo nogo lung i nget ecilet kame mol eoto i bomba me Akaba, di wan oko bedo kunono pi ceng adek. Ango ako udo be josaseredoti oudo tie i dier jo nogo do Jolebi li.

¹⁶ Di ango ako cwano jo ot lwongo Elieser, Ariel, Semaya, Elinatan, Yarib, Elinatan, Natan, Sakaria, kede Mesulam; gin en oudo kibedo jotel, kede ako mino kolwongo da jopwony are nogi: Yoyarib kede Elinatan.

¹⁷ Ango ako cwano gi but Ido, ngatel me jo kame bin tie Kasipia, pi kwane kede jowote, gin jotic me tempulo pi cwano ne wan jo kame timo tic ka Rubanga i tempulo.

¹⁸ Pi kisa ka Rubanga wa, gin kiko cwano ne wan Serebia, en dano atwero tic, Ngalebi me ot ka Makali. En eko bino kede awobe mege kede imiegu mege, gin jo tomon kiwie kanyauni.

¹⁹ Gin bin kiko cwano da Kasabia kede Yesaya, cuo kame bin yai ki ot ka Merari. Gin kiko bino karacel kede cuo ot are kame ribo imiegu gi kede awobe gi.

²⁰ Medo i kom jo nogo, bin tie da cuo tol are kede ot are (220) kame timo tic me tempulo, cuo kame bin Daudi kede jotic mege opoko joakwari gi pi konyo Jolebi. Gin dedede bin kowandiko nying gi.

Esera Otelo Jo i Kanyo Kec kede i Lega

²¹ I kare kame wan oudo otie kede i nget ecilet me Akaba, ango ako mino cik pi wan dedede bedo i kanyo kec di oko mwole i nyim Rubanga wa di oko kwane pi telo wa kede gwoko wa i sapali wa, wan kede idwe wa kede jamini kame oudo otie kede dedede.

²² Ango oudo lewic omaka penyo abaka pi mino wa isirikalen kame koto ogwoko wa kibut jokwor wa i kare me sapali wa, pien wan oudo otieko waco ne be Rubanga wa gwoko jo dedede kame wore, do elilo ne jo dedede kame lokere tenge ki bute.

²³ Aso, wan oko bedo i kanyo kec di oko lego but Rubanga wa pi gwoko wa, di en eko gamo kwac wa.

Giamia pi Tempulo

²⁴ Di do ango ako yero josaseredoti tomon kiwie are: Serebia, Kasabia, kede josaseredoti tomon apat.

²⁵ Ango ako pimo negi siliba kede saabu, kede da jamini me tic kame abaka, jo amie tam kede jotic mege, kede jo Isirael dedede kame oudo tie kunono, bin omio be tim kede tic me tempulo.

^26-27 Jamini kame ango ako mino gin ige: kilo tutumia ot are kiwie are (22,000) me siliba jamini tol acel kame kotimo kede siliba, kame peko gi romo kilo ot kanyaare saabu kilo tutumia adek kede tol ongwon (3,400) bakulin ot are kame kotimo kede saabu, kame peko gi buco romo kilo kanyauni kede dul bakulin are kame kotimo kede buronsi kame kojililo kiber, kame wel gi rom aroma kede bakulin kame kotimo kede saabu.

²⁸ Ango ako waco negi be, “Wun ibedunu jo kacil i nyim Rwot, Rubanga ka joakwari wu, kede jamini nogi da tie jamini kacil. Siliba kede saabu kame jo okelo obedo giayala me bercuny but Rwot.

²⁹ Gwokunu gi kiber paka wun tuno Yerusalem. Di wun ikounu pimo gi i agolai me tempulo, i nyim jotel me josaseredoti kede Jolebi, kede jotel me diakale me Isirael.”

³⁰ Aso, josaseredoti kede Jolebi oko donyo gwoko siliba, saabu, kede jamini me tic kame oudo opimo, pi gin tero Yerusalem i ot ka Rubanga wa.

Dok Yerusalem

³¹ Wan bin oko yai ki ecilet me Akaba pi ot Yerusalem, i buto duwe tomon kiwie are me duwe me acel. Rubanga wa oudo tie kede wa di en eko gwoko wa ki cing jokwor wa kede ki asura kame obeo iye i yongayo.

³² Kakame otuno kede Yerusalem, wan oko ber wei pi ceng adek.

³³ I ceng me ongwon mere wan oko ot i tempulo, oko pimo siliba, saabu, kede jamini me tic, di oko mino gi i cing ngasaseredoti Meremot wot ka Uria. En oudo etie kede Eleasar wot ka Penekasi karacel kede Jolebi are, Yosabad wot ka Yesua kede Noadia wot ka Binui.

³⁴ Omaro gin dedede di oko pimo gi, di oko wandiko rom me peko gi.

³⁵ Di do jo kame bin odwogo ki obukui oko mino giayala awanga but Rubanga me Isirael. Gin kimio giayala me twonin tomon kiwie are pi jo Isirael lung, imerekekin ot kanyangon kiwie kanyape, kede idwe romini ot kanyaare kiwie kanyaare, kede ikoroi tomon kiwie are bala giayala me kwanyo dub. Leini nogi dedede oko mino bala giayala awanga but Rwot.

³⁶ Gin kiko tero da kop kame oudo abaka owandiko di kiko mino but jopug kede jotic me adul me bad tetu tim me ecilet me Eupurate. Jo nogo oko bedo mino kony but jo kede i tempulo.