Esekeri 19 - Baibuli I Leb Kumam 2013

Wer me Iturur

¹ Rwot oko waco na be awer wer me iturur noni ne jotel me Isirael.

² En ewaco na be awer kaman: toto ni oudo cal bala twon engu adako i diere me inguon! En oudo ecal bala engu adako kobuto piny pito idwe mege, i diere me inguon.

³ En eko pito atin mere acel; di atin nono oko pwonyere mako le me amwoda; en eko donyo camo jo.

⁴ Atekerin oko winyo kop i kome di gin kiko cike kede bur di eko poto iye. Gin kiko pene kede golu di kiko tere Misiri.

⁵ Kakame toto mere oneno kede be oudo edubo kare mere kure, gen kame oudo etie kede da otiek, en eko kwanyo atin ace kikom idwe mege di en eko pite edongo edoko engu ager.

⁶ Kakame bin en edongo kede, eko donyo irim i diere me inguon icegun. Di eda eko pwonyo mako le me amwoda; eda eko donyo camo jo.

⁷ En eko tuturo apama atek me cel gi, di eko dudubo bomban gi; ka en edorano, lworo atek oudo mako jo kede gi dedede kame bin tie i lobo nono.

⁸ Atekerin oko iikere pi sure; gin kibino ki adulion dedede. Gin kiko rieno bwoi gi pi cike, di kiko make i bur kame oudo kikunyo.

⁹ Gin kiko pene kede golu di kiko twene i gi me yene, di kiko tere but abaka me Babilon. Gin kiko kete kakame kocelo kitek, tetekeny kur bobo kowiny dorano mere i wi mori me Isirael.

¹⁰ Toto ni oudo cal bala yat olok kame kopito i nget pii. Pien oudo kopite kakame pii romo kiber, omio eko janyo di eko nyak.

¹¹ Jange mege atek oko doko ibelai me jopug. Olok noni bin odongo bor malo twatwal; en oudo wie neno pi boro mere kede janyo mere.

¹² Do jogero mogo bin oko pute di gin kiko rete piny; yamo awok ki bad tetu kide oko mino anyakini mege otuo di kiko ony piny. Jange kame bin tek oko tuwo di mac oko wange.

¹³ Nataman okobo pite i wi tim, i lobo kotuo, kakame pii li iye.

¹⁴ Mac oko moko i kor olok; di eko wango jange kede anyakini mege. Likame bobo tie jange moro atek kodong, ibelai me pug likame bobo bino bedo tie. Manoni obedo wer me iturur; kotio kede me iturur.