Danieri 12 - Baibuli I Leb Kumam 2013

Kare me Ajikini

¹ Malaika koudo tie ngapo igoen aliamaliam nono oko waco be, “I kare nono Emikairi malaika adwong, en ngat kame daro jo ni, bino neeno. Di kare ko bino bedo tie me twon peko, kame epone mere lem pwodi likame otimere cako atekerin bedo tie. Ka kare nono otuno, jo me ateker ni kame kowandiko nying gi i itabu ka Rubanga kobino lako.

² Jo atot kikom jo kotieko to bino kuo bobo; mogo bino bedo kede kuo abedo nakanaka, kede mogo bino bedo kede lewic kede acae kame bedo nakanaka.

³ Jo ariek bino rieny rieny kacal bala me edou me malo; kede jo koudo opwonyo jo timo gikame opoore bino rieny bala acerin pi ikar kede ikar.

⁴ “Do in Danieri mwon itabu noni iko mino kope nogi bed mung paka tuno i kare me ajikini. Jo atot bino bino donyo wire tuni kede tuca, di ngec ko meede.”

⁵ Di ako neno di cuo are tie cungo i nget ecilet, ngat acel i doge tetuni kede ngat ocelu i doge tetuca.

⁶ Ngat acel kikom gi oko penyo malaika kongapo igoen aliamaliam koudo tie malo i bad kame ecilet mol wok kiye be, “Ebino tero kare karom nadi di pwodi giaura nogi likame ojik?”

⁷ Malaika nono oko kiarao bade are dedede malo, di ako winye di elairo i nying Ngat Abedo Nakanaka be, “Ebino tero mwakini adek kede dul. Kame tidilo jo ka Rubanga ojik, udo gi nogi dedede otieko timere.”

⁸ Ango awinyo gikame ewaco do likame ako karuno niang iye. Omio ango ako penye be, “Adwong na, do nyo kame bino bedo adwogini me timere me gi nogi?”

⁹ En eko dwoko na be, “Danieri in nan do oti, pien kope nogi kopoore kano gi kibed me mung tuno i kare me ajikini.

¹⁰ Jo atot kobino lonyo, do jodubo bino meede kede tim gi me dub; likame tie ngadubo moro kame bino niang iye, do jo kame riek bino niang iye.

¹¹ “Cako i kare kame kobino gengo kede giayala awanga me ceng dedede di oko lunyo keto gikame munao kabedo kacil, ceng tutumia acel kede tol are kede ot kanyangon (1,290) bino kato.

¹² Kitie kede yomcuny jo kame bino kanyakino tuno ceng tutumia acel i tol adek kede ot adek kiwie kany (1,335) okato!

¹³ “Do in Danieri lub yongayo ni nono tuno i ajikini. Kuo ni bino kwanyere, do iko bino yai gamo giamia ni me pwoc i kare me ajikini.”